Read TAITA BIBLE – Biblia Ilagho Jiboie Kwa Wandu Wose EZEKIELI 29 Bible Online

EZEKIELI 29 - TAITA BIBLE – Biblia Ilagho Jiboie Kwa Wandu Wose bible

EZEKIELI 29

¹Ituku ja ikumi na iwi, ja mori ghwa ikumi, mwaka ghwa ikumi ghwa kudwalwa wunyika kodu, BWANA oreghorieghe nani ukighamba,

²“Mwana wa mdamu, mzighane mzuri wa Misri, kufunye wulodi aighu yake na aighu ya Misri yose

³kughambe, ini Bwana MLUNGU naghamba huwu: Ne m'maiza wako oho mzuri wa Misri, Oho choka mbaa kukaiagha aghadi ya meda yako, kukighamba, ‘Moda ghwa Naili ni ghwapo, ni ini nereghubonyereghe.’

⁴Nichangira koleo mizunyi kwako, na kubonya samaki riko andenyi ya meda yako rikakadie andenyi ya makoko ghako; nani nichakubonya kufume medenyi yako, chiaimweri na samaki rako rikakadie andenyi ya makoko ghako.

⁵Nani nichakufunya nikukumbe kireti, oho chiaimweri na samaki rose ra meda yako. Kuchaghwa andoenyi hata kusesholo na kurikwa ni mndungi. Nichakufunya kuwuye vindo va nyamandu ra isakenyi, na nyonyi ra mbeonyi.

⁶“Niko aho wandu wose wa Misri wichamanya kukaia Ini ne BWANA; kwa kukaia oho kodeeka sa mzata ghwa mrangi kwa wandu wa Israeli.

⁷Ngelo werekuwadieghe na mkonu korechikieghe na kuwishaghua maonge ghawo, na ngelo werekusaghikieghe na oho, korechikieghe na kubonya viwonu vawo visughusike.

⁸Kwa huwo ini Bwana MLUNGU naghamba huwu, Ola nichareda wandu wikubwaghe kwa lufu, nawo wichabwagha mdamu na nyamandu;

⁹na isanga ja Misri jichasighwa iduu; nawo wichamanya kukaia Ini ne BWANA. “Kwa kukaia kwaghambie wei, ‘Naili ni yapo, ni ini nereibonyereghe,’

¹⁰kwa wundu ugho, ola ne m'maiza wako na wa iyo meda yako. Nichajibonya isanga ja Misri jiwuye iduu putu kufuma muzi ghwa Migdoli hata muzi ghwa Aswani, hata mpakenyi na Ethiopia.

¹¹Mdamu ungi ndechaawadia aho, hata nyamandu ndeichaawadia aho; jichakaia iduu kwa miaka mirongo ina.

¹²Nani nichajibonya isanga ja Misri jiwoneke iduu kuchumba masanga ghose ghiko maduu; na mizi yake ichasighwa miduu kwa miaka mirongo ina aghadi ya mizi yose isighilo miduu. Nichasasara Wamisri aghadi ya iro mbari ra wandu, na kuwisaghisa masangenyi.”

¹³Bwana MLUNGU waghamba huwu, “Kutua kwa miaka mirongo ina nichawikwanya Wamisri kufuma kwa wandu andu weresaghisiroghe,

¹⁴nani nichawunja wandu wa Misri isangenyi Pathrosi andu werefumieghe; na aho wichazoya wuzuri ghwa ndonyi.

¹⁵Wuzuri ghwawo ghuchakaia ghwa ndonyi kuchumba mawuzuri ghose, hata ndewichaakujosa sena aghadi ya iro mbari ra wandu; nichawisera nandighi hata wisedime sena kuwibonyera mbari zima nguma.

¹⁶Misri ndeichaakaia isuwirio ja Waisraeli sena, ela ichakaia lukumbuso lokumbusa Waisraeli ikosa jawo jekusaghika na Wamisri. Aho niko wichamanya kukaia ini ne Bwana MLUNGU.”

¹⁷Ituku ja imbiri, ja mori ghwa imbiri, mwaka ghwa mirongo iwi na mfungade ghwa kudwalwa wunyika kodu, BWANA oreghorieghe nani ukighamba,

¹⁸“Mwana wa mdamu, Nebukadnezari mzuri wa Babuloni wabonyere ijeshi jake jibonye kazi ikurie elwa na Tiro. Misigo ilemere yashekerie vongo va masikari vikakangaluka, na maonge ghikazurua; ela sena uo, na ijeshi jake, ndewipatire fwaida ingi Tiro edima kukatanishwa na iyo kazi wiibonyere.

¹⁹Kwa huwo, ini Bwana MLUNGU naghamba huwu: Olenyi nichamneka Nebukadnezari isanga ja Misri, nao uchawada mali raro na kuridwa wunyika, ripate kuwuya malipo gha iyo kazi ikurie ibonyero ni ijeshi jake.

²⁰Namnekie isanga ja Misri jikaie malipo ghake gha wudumiki orenidumikieghe, ini Bwana MLUNGU naghamba.

²¹“Ngelo maza iro richaabonyeka, nichawibonya wandu wa Israeli wikaie na ndighi, nani nichakubonya oho Ezekieli kughore nawo aghadi kwawo. Aho niko wichaamanya kukaia Ini ne BWANA.”