Read TAITA BIBLE – Biblia Ilagho Jiboie Kwa Wandu Wose EZEKIELI 3 Bible Online

EZEKIELI 3 - TAITA BIBLE – Biblia Ilagho Jiboie Kwa Wandu Wose bible

EZEKIELI 3

¹Mlungu ukanizera, “Mwana wa mdamu, jaa icho chuo kwanekwa, nao kughende kudedanye na wandu wa Israeli.”

²Niko ngatambarua momu ghwapo, nao ukanineka icho chuo nije.

³Nao ukanizera, “Mwana wa mdamu, jaa ichi chuo nikunekagha kughude.” Niko ngachija; chikakaia chisingie momunyi kwapo sa wuki.

⁴Mlungu ukanizera, “Mwana wa mdamu, ghenda kwa wandu wa Israeli kuwighorie malagho ghapo.

⁵Angu siwuekuduma kwa wandu wa kiteto cha kighenyi chikurie, ela naawuyakuduma kwa wandu wa Israeli;

⁶si kwa wandu wa mbari nyingi wa kiteto cha kighenyi chikurie, awo kusedimagha kutambukilwa ni madedo ghawo anduangi. Elaima kwa loli ngera nedekuduma kwa awo wandu, wadimagha kusikira malagho ghako.

⁷Ela wandu wa Israeli ndewichaakusikira, angu wisekunde kunisikira, kwa kukaia wandu wa Israeli ni wandu wikurilo ni vongo, wighilikie.

⁸Ola nakubonya kuwoneke kughilikie sena kukurilo ni chongo aghadi kwawo;

⁹nichakubonya kukaie sa igho jikurie nandighi, kusakewiobua hata kusakewifwa waya, angu awo ni wandu welegha.”

¹⁰Ukachuria kunizera, “Mwana wa mdamu, malagho nikuzeragha kughisikire na kughingira ngolonyi kwako;

¹¹nao kufume, kughende kwa waja wandu widwalo wunyika, awo wandu wako, kuwizere, ‘Bwana MLUNGU waghamba huwu;’ wisikiragha angu wisesikire.”

¹²Niko Roho wa Mlungu ukaniwusira nokoighu, nani ngasikira lwaka nanyuma yapo, lwaka lubaa losughusa ndoe lukighamba, “Wubaa ghwa BWANA ndeghukaso mlungunyi koighu.”

¹³Lorekoghe ni lwaka lwa mawawa gha rija nyamandu riko moyo ghikiadadana, na lwaka lwa ghaja magurudumu ghiko mbai na mbai, ghikiruma sa kusughusika kwa ndoe.

¹⁴Roho wa Mlungu ukaniwusira na kunidwa noko, ngaghenda naturukia na kusumbuka rohonyi kwapo, ngisikira wulemeri ghwa ndighi ra BWANA.

¹⁵Ngacha kwa waja wandu weredwaloghe wunyika aja Telabibu, awo werekoghe wikikaia kaavui na Moda ghwa Kebari. Ngakaia aho matuku mfungade nilemero nandighi ni agho nereghiwonieghe na kughisikira.

¹⁶Kutua kwa agho matuku mfungade, BWANA ukaghora nani,

¹⁷ukighamba, “Mwana wa mdamu, nakubonya kukaie mlindiri aighu ya wandu wa Israeli; kukasikira ilagho jingi kwapo, kuwionye.

¹⁸Ngamzera mmbiwi, ‘Kwa loli kuchafwa,’ nao kukaie kusemuonyere, hata kukaie kusemmbonyere chia esigha wuwiwi ghwake, eri ukire irangi jake, uja mundu mmbiwi uchafwa loli kwa wuwiwi ghwake, ela bagha yake nichailawia kwako.

¹⁹Ela kukamuonya nao uleghe kughaluka na kusigha wuwiwi ghwake angu chia yake mbiwi; uo mundu mmbiwi uchafwa kwa wuwiwi ghwake, ela oho kuchakira irangi jako.

²⁰Sena mundu wa hachi ukaghaluka na kubonya wuwiwi, nani nimmbikie kikuwaro chemtangala, uchafwa. Kwa kukaia kusemghorie, uchafwa kwa wundu ghwa kaung'a yake, na agho mabonyo ghake gha hachi oreghibonyereghe, ndeghichaakumbukwa; ela bagha yake nichailawia kwako.

²¹Elaima kukamuonya mundu wa hachi usebonye kaung'a, nao ukaie usebonyere kaung'a; loli uchakaia moyo, kwa kukaia oresikireghe maonyo; na oho kuchakaia kwakira irangi jako.”

²²Nao ngasikira wulemeri ghwa ndighi ra BWANA aho; ukanizera, “Wuka kusee cha kirindinyi, nani nichakughoria malagho aho.”

²³Nao ngawuka na kusea cha kirindinyi; ngawona wubaa ghwa BWANA aho, sa iji nereghuwonieghe kaavui na Moda ghwa Kebari, ngaghwa kiwushu-wushu.

²⁴Ela Roho wa Mlungu ukaningia na kuniwusira kimusi; nao ukadedanya nani ukighamba, “Ghenda kukurughie nyumbenyi kwako.

²⁵Na oho, ee mwana wa mdamu, ola wandu wichareda kamba na kukufunga naro, eri kusefume cha wandunyi.

²⁶Nani nichabonya lumi lwako lukakadiane na lwasasa, na oho kuchawuya kituri kusedimagha kuwionya wandu; angu awo ni wandu welegha.

²⁷Ela iji naghora na oho, nichaghutambua momu ghwako, na oho kuchawizera, ‘BWANA waghora huwu,’ uo uchaasikira, ndesikire, na uo uchaalegha kusikira, ndeleghe; kwa kukaia awo ni wandu welegha.