Read TAITA BIBLE – Biblia Ilagho Jiboie Kwa Wandu Wose EZEKIELI 30 Bible Online

EZEKIELI 30 - TAITA BIBLE – Biblia Ilagho Jiboie Kwa Wandu Wose bible

EZEKIELI 30

¹BWANA ukaghora nani ukighamba,

²“Mwana wa mdamu, funya wulodi kughambe, Ini Bwana MLUNGU naghamba huwu, Lila kughambe: Ni bugha kwa ijo ituku!

³Ijo ituku jalighisa, ituku ja kazi ra BWANA jakaia kaavui; ituku ja makungughu na wasi kwa iro mbari ra wandu.

⁴Wuda ghuchakaia Misri, na luwawo luchavika Ethiopia, ngelo awo wibwaghwagha na kughwa aho Misri, na mali rake kudwalwa noko, na misingi yake kuchikanywa-chikwanywa.

⁵Ugho wuda ghuchabwagha wandu kwa lufu kufuma Ethiopia, na Libya, na Lidia, na Arabia yose, na Kubu na wose wipatane na Wamisri.

⁶BWANA waghamba huwu, Awo wandu witeserie Misri wichafwa, na iro ndighi orekukasagha naro richainjwa; wandu wichabwaghwa aghadi kwawo kufuma Megido hata Siene ini Bwana MLUNGU naghamba.

⁷Ijo isanga jichasighwa iduu kuchumba masanga ghose ghisighilo maduu; na mizi yaro ichanonwa kuchumba mizi mizima inonelo.

⁸Aho wichamanya kukaia Ini ne BWANA ingelo nichaaikora Misri, na wandu wose weremteserieghe.

⁹“Ituku ijo, nichaduma wadumwa wiangue, nawo wichafuma kuwikambira Waethiopia chongo werekoghe wisemanyire ilagho jingi jizamie, nawo wichakaia na kuwawa kwa wundu ghwa wasi ghwacha aighu ya Misri; nagho hoghuja ghwaawuyacha!”

¹⁰Bwana MLUNGU waghamba huwu, “Wuzuri ghwa mali ra Misri nichaghumeria putu, kwa kumtumia Nebukadnezari mzuri wa Babuloni.

¹¹Uo na wandu wake wikwanye wioboshagha iro mbari kuchumba, wicharedwa wipate kunona ijo isanga; nawo wichabwagha wandu kwa lufu aho Misri, na isanga jichachulwa ni wafu.

¹²Nani nichaomera Naili, na kuneka wandu wawiwi ijo isanga. Nichainja kula kilambo chiko andenyi ya ijo isanga jipate kusighwa iduu, kwa kutumia mikonu ya waghenyi; ini BWANA naghora ilagho ijo.”

¹³Bwana MLUNGU waghamba huwu, “Nichainona milimu, na kuinja fwana riko Memfisi; ndekuchaakaia na m'baa ungi sena isanga ja Misri, kwa huwo nichangira kiture aho.

¹⁴Nichaibonya Pathrosi isigho nduu, nani nichakora muzi ghwa Soani; na kughutanya muzi ghwa Thebesi.

¹⁵Nichawonyera machu ghapo aighu ya muzi ghwa Pelusiumu, iyo ngome mbaa ya Misri, na kuinja wungi ghwa wandu wa Thebesi.

¹⁶Nani nichaikora Misri, na Pelusiumu ichakaia andenyi ya wasi m'baa; Thebesi ichanonwa na mawurigha gharo kuchikanywa.

¹⁷Wandu wa irika wa Oni na wa Pibesethi wichabwaghwa wudenyi, na waka wichadwalwa wunyika.

¹⁸Kira chichawiseria wandu wa Tapenesi, ingelo nichaainja nguma ra Misri, na kukukasa kwake kubaa kuchasia; uchafinikirwa ni iwingu, na wandu wake wichadwalwa wunyika.

¹⁹Huwo niko nichaatanya, aighu ya Misri, nawo wichamanya kukaia ini ne BWANA.”

²⁰Ituku ja mfungade ja mori ghwa imbiri, mwaka ghwa ikumi na imweri ghwa kudwalwa wunyika kodu BWANA oreghorieghe nani ukighamba,

²¹“Mwana wa mdamu, namerie kuchikanya mkonu ghwa mzuri wa Misri; nagho hoghu ndeghufungilo wei ghuboo, na kupata ndighi relwa wuda sena.

²²Kwa huwo ini Bwana MLUNGU naghamba huwu, Nichalwa na mzuri wa Misri, hata nichikanye mikonu yake, ugho ghuko na ndighi chiaimweri na ghuja ghorechikieghe, na lufu lwake luchapotoka.

²³Nani nichawisasara Wamisri aghadi ya iro mbari ra wandu, na kuwisaghisa masangenyi kose.

²⁴Nichamchuria ndighi mzuri wa Babuloni, na kumneka lufu lwapo mikonunyi kwake; ela nicharimeria ndighi ra mzuri wa Misri nao ucharuma sa mundu washoghonolwa kaavui na kubwaghwa.

²⁵Nichamchuria mzuri wa Babuloni ndighi, ela mzuri nichamsirisha ndighi; nawo wichamanya kukaia ini ne BWANA. Ngelo nichaamneka mzuri wa Babuloni lufu lwapo, uchawoka kulwa na wandu wa isanga ja Misri.

²⁶Nani nichawisasara Wamisri aghadi ya iro mbari, na kuwisaghisa wurumwengunyi kose. Niko wichamanya kukaia ini ne BWANA.”