Read TAITA BIBLE – Biblia Ilagho Jiboie Kwa Wandu Wose EZEKIELI 31 Bible Online

EZEKIELI 31 - TAITA BIBLE – Biblia Ilagho Jiboie Kwa Wandu Wose bible

EZEKIELI 31

¹Ituku ja imbiri, ja mori ghwa kadadu, mwaka ghwa ikumi na imweri ghwa kudwalwa wunyika kodu, BWANA oreghorieghe nani ukighamba,

²“Mwana wa mdamu, mzere mzuri wa Misri na wandu wake wose huwu: Nani udimagha kufwanana na oho kwa wubaa ghwako?

³Nichakufwananisha na mudi ghwa sida ghwa Lebanoni, ghuko na mbashu righokie na malemba mawishi ghikambie kwa kiju, ghuzoghue na kujoka ighu mawingunyi.

⁴Ghwanyue machi nicha, na mbashu ra nandonyi rikaghubonya ghuzoghuo na kubonya meda yaro idike dike machi mbai mbai ya kirimba charo; na kunyoshera midi yose ya msidunyi.

⁵Kwa kukaia ghunyue machi mengi, ghukazoghua ighu kuchumba midi yose ya msidunyi, na mbashu raro rikazoghua na kuwuya mbaa; mbashu rikawuya ndacha nandighi.

⁶Nyonyi rose ra mbeonyi rikabonya vijungu mbashunyi kwaro, na nyamandu rose ra isakenyi rikakuvisa aisi ya iro mbashu rikambie; na mbari mbaa rose ra wandu rerekaieghe aisi ya kiju chake.

⁷Ghorekoghe mudi m'baa ghughokie kwa wubaa ghwake, na mbashu rake ndacha; kwa kukaia miri yaro erengirieghe ndenyi ikanywa machi mengi.

⁸Mudi ghwa sida ghuko andenyi ya mbuwa ya Mlungu, ndeghudimagha kusimana nagho; hata msumbesu ndeghukatanagha na mbashu raro; hata miamori ndeerewonekagha kukaia kindo chingi kufwananishwa na mbashu raro; ndekuwadie mudi ghungi andenyi ya mbuwa ya Mlungu, ghudimagha kufwananishwa nagho kwa kughoka kwake.

⁹Nereghubonyereghe ghukaghoka kwa wundu ghwa mbashu rake nyingi, na midi yose ya Edeni ikaghuwonia iriso, ee iyo midi yose erekoghe andenyi ya mbuwa ya Mlungu.

¹⁰“Kwa huwo ini Bwana MLUNGU naghamba huwu: Kwa kukaia mudi ugho ghwazoghue ighu, na mdo ghwaro ghukavika mawingunyi, ghwakukasire kwa wundu ghwa wuighu ghwake.

¹¹Nichaghufunya na kughungira mikonunyi kwa mndumu uko na ndighi wa iro mbari ra wandu; nao kwa loli uchaghubonyera kunughana na ugho wuwiwi ghwake. Nameria kughulegha.

¹²Waghenyi, awo wizamie nandighi wa iro mbari ra wandu, wichaghudema na kughusigha. Mbashu richaghuya mighondinyi na mavongonyi, na mbonge raro richachika-chika a medenyi isangenyi; wandu wose wa ndoenyi wichasigha kukaia aisi ya kiju chake.

¹³Nyonyi ra mbeonyi richakaria aighu ya ugho mudi ghughuye, na nyamandu ra isakenyi richasela aighu ya mbonge raro.

¹⁴Agho ghose gheebonyeka eri kughiria midi ingi mizima isezoghuo kuchumba kuvikia mawingunyi, hata ngera yanyoshere machi saki. Midi yose ewikilwa kufwa sa wadamu na kusea chiaimweri na awo wiseagha Andu kwa Wafu.”

¹⁵Bwana MLUNGU waghamba huwu, “Ituku ugho mudi ghuseagha Andu kwa Wafu, nichabonya andu aho kulilie ugho mudi na kughubonyera ifwa; nani nichaiomera meda, na machi mengi ghichasia; nichabonya Lebanoni ichulo ni wasi, na midi yose ya mbuwenyi ichanyaya kwa wundu ghwa ugho mudi.

¹⁶Wandu wa iro mbari wichasughusika kwa wundu ghwa kughwa kwa ugho mudi, ingelo nichaaghukumba andenyi ya Andu kwa Wafu chiaimweri na awo wiseagha aho; midi yose ya Edeni, na iyo yose ikumikie ighokie ya Lebanoni, na yose inywagha machi aho, ichahoreshwa andenyi ya ugo wurumwengu ghwa wafu.

¹⁷Awo werekoghe wikikaia aisi ya kiju chake, awo werewadaneghe nagho aghadi ya iro mbari ra wandu, wichaseanya nagho cha Andu kwa Wafu kuwinugha awo werebwaghiloghe wudenyi.

¹⁸“Ni mudi ghuao aghadi ya midi ya Edeni ghufwananagha na oho kwa kughoka na wubaa? Ela kuchaserwa andwamweri na midi ya Edeni hata ugho wurumwengu ghwa wafu; kuchalala aghadi ya wandu wisemuichi Mlungu chiaimweri na awo werebwaghiloghe wudenyi. “Mudi ugho ni mzuri wa Misri chiaimweri na wandu wake wose, ini Bwana MLUNGU naghamba.”