Read TAITA BIBLE – Biblia Ilagho Jiboie Kwa Wandu Wose EZEKIELI 32 Bible Online

EZEKIELI 32 - TAITA BIBLE – Biblia Ilagho Jiboie Kwa Wandu Wose bible

EZEKIELI 32

¹Ituku ja imbiri ja mori ghwa ikumi na iwi, mwaka ghwa ikumi na iwi ghwa kudwalwa wunyika kodu, BWANA oreghorieghe nani ukighamba,

²“Mwana wa mdamu, mlilie mzuri wa Misri kumzere naghamba huwu: Kwadakuwona kumoni sa shimba aghadi ya iro mbari ra wandu, ela kooka sa mamba uko baharinyi; kwadaida a medenyi yako na kuvurugha machi kwa maghu ghako na kughilusha.

³Ini Bwana MLUNGU naghamba huwu: Nichakumba nyavu yapo kwako, na kwa kutumia ijeshi ja wandu wengi, nichakuruda kufume machinyi.

⁴Nani nichakukumba andu kuomie, andu kuko worinyi mbuwenyi; nani nichareda nyonyi ra mbeonyi, rikarie aighu yako; na kurighudisha nyamandu ra ndoenyi kose na nyama yako.

⁵Nichasasara nyama rako aighu mighondinyi, na kukumba gharia yako mavongonyi.

⁶Nichaidia bagha yako aighu ya mighondi, nayo ichasea ikinugha chia ra machi yachua pacha.

⁷Ngelo nakunona, nichafinikira mlungunyi, na nyerinyeri richawuya kira; nichajifinikira iruwa na mawingu, na mori ndeghuchaafunya miengere yaro anduangi.

⁸Miengere yose ya mlungunyi nichaibonya iwuye kira, na kungira kira isangenyi kwako, ini Bwana MLUNGU naghamba.

⁹“Nicharisumbua ngolo ra wandu wengi, ingelo nichaakunona aghadi ya iro mbari ra wandu.

¹⁰Wandu wengi wichaturukia kwa agho nichaakubonya, na wazuri wawo wichangilwa ni kiture kwa wundu ghwako, ingelo nakalupiricha lufu lwapo imbiri kwawo; kula ngelo wichakaia wikisughusika, kula umu wawo ukililia irangi jake, ijo ituku ja kutua kwako.”

¹¹Bwana MLUNGU waghamba huwu, “Mzuri wa Babuloni uchacha na lufu lwake kulwa na oho.

¹²Nichawibonya masikari ghing'etere kufuma kwa iro mbari ra wandu wibwaghe wandu wako wengi. Wandu wako wose, na kula kilambo kukukasire nacho vichatoteshwa.

¹³Nicharinona nyamandu rako rose mbai na mbai ya machi, machi ndeghichaavurughwa ni maghu gha wandu, hata kochokocho ra nyamandu nderichaaghivurugha sena anduangi.

¹⁴Niko nichaghielesha machi ghako, na kuibonya meda yako iiseghe machi mboaeri sa mavuda. Ini Bwana MLUNGU naghamba.

¹⁵Ngelo nichaajibonya isanga ja Misri jisigho iduu, na kuinja kula kilambo chiko andenyi yaro, ngameria kuwikaba wandu wose wikaiagha aho, niko wichaamanya kukaia ini ne BWANA.

¹⁶Ulu nilo lumbo lolila luchaakaia lukiborwa, na wai wa iro mbari ra wandu wichakaia wikilubora aighu ya Misri, na aighu ya wandu wake wose. Ini Bwana MLUNGU naghamba.”

¹⁷Ituku ja ikumi na isanu, ja mori ghwa imbiri, mwaka ghwa ikumi na iwi ghwa kudwalwa wunyika kodu, BWANA oreghorieghe nani ukighamba,

¹⁸“Mwana wa mdamu, lilia wandu wengi wa Misri. Kuwisere wandu waro, na wandu wa mbari wikumikie, noko ndonyi cha wurumwengu ghwa wafu, chiaimweri na wandu awo wiseagha cha kinenyi.

¹⁹‘Kuaghesha kooghoka kukachumba wandu? Sea kulalanye na wandu wisemwichi Mlungu!’

²⁰Wandu wa Misri wichafwa chiaimweri na wandu wibwaghwagha wudenyi; wandu wake wose wichabwaghwa kwa lufu.

²¹Wabaa wiwadie ndighi, na awo werewiteserieghe wudenyi, wichakaia wikija malagho ghawo aho Andu kwa Wafu wikighamba, ‘Awo wandu wisemwichi Mlungu, wibwaghilo wudenyi, wasea kinenyi wikalala winyame chui.’

²²“Ashuru oko aho chiaimweri na izungu jake; makaburi ghawo ghammara chia rose, gha wandu wibwaghilo wudenyi.

²³Makaburi ghawo gheeka kondonyi kinenyi, na agho gha ijeshi jake jerebwaghiloghe wudenyi ghaimara kaburi yake chia rose. Wereserieghe cha wurumwengu ghwa wafu wisemwichi Mlungu. Awo niwo wereoboshereghe wandu wa wurumwengu ghwa awo wiko moyo.

²⁴“Elamu oko aho chiaimweri na izungu jake; makaburi gha wandu wake wose wibwaghilo wudenyi, ghaimara kaburi yake chia rose. Wereserieghe cha wurumwengu ghwa wafu wisemwichi Mlungu. Awo niwo wereoboshereghe wandu wa wurumwengu ghwa awo wiko moyo, na idana niwo wafushwa waya chiaimweri na awo wereserieghe kondonyi kinenyi.

²⁵Elamu walala aho aghadi ya awo werebwaghiloghe, chiaimweri na izungu ja wandu wake; makaburi ghawo ghikimmara chia rose, nawo wose ni wandu wiseshamishiro wibwaghilo wudenyi. Awo niwo werewioboshereghe wandu wa wurumwengu ghwa awo wiko moyo; nawo wiafushwa waya chiaimweri na awo wiseagha kinenyi, wawikwa chiaimweri na awo werebwaghiloghe.

²⁶“Mesheki na Tubali weko aho chiaimweri na izungu jawo. Makaburi ghawo ghawimara chia rose; wose ni wandu wisemwichi Mlungu werebwaghiloghe wudenyi, kwa kukaia wereoboshereghe wandu wa wurumwengu ghwa awo wiko moyo.

²⁷Nawo ndewerewikiloghe chiaimweri na waja wandu wa kala werekoghe mang'oni, awo wereserieghe Andu kwa Wafu chiaimweri na maswagha ghawo gha wuda, awo chufu rawo rerewikiloghe nandonyi ya vongo vawo, na wuwiwi ghwawo ghuko maindinyi kwawo; kwa kukaia kiture cheobosha cha agho mang'oni cherewiwadieghe awo wandu wa wurumwengu ghwa awo wiko moyo.

²⁸Kwa huwo kuchachikanywa na kulala aghadi ya wandu wiseshamishiro, chiaimweri na awo werebwaghiloghe wudenyi.

²⁹“Edomu oko aho, wazuri wake na wabaa wake wose, awo hata ngera werekoghe mang'oni saki, walale aho chiaimweri na awo werebwaghiloghe wudenyi, na awo wiseshamishiro, na awo wiseagha andenyi ya icho Kina.

³⁰“Wabaa wa kaskazinyi wose putu weko aho, na Wasidoni awo weresereloghe aho kwa waya, chiaimweri na awo werebwaghiloghe, angu werewikumbieghe wandu wowa kwa wundu ghwa kudima kwawo; nawo walala wisemwichi Mlungu chiaimweri na awo werebwaghiloghe wudenyi. Waserwa kwa waya chiaimweri na awo wiseagha andenyi ya icho Kina.

³¹“Mzuri wa Misri uchahoreshwa ngolo kwa kuwiwona, angu wandu wake chiaimweri naomoni na ijeshi jake werebwaghiloghe wudenyi. Ini Bwana MLUNGU naghamba.

³²Kwa kukaia nerem'bonyereghe Mzuri wa Misri uwioboshe wandu wa ugho wurumwengu ghwa awo wiko moyo, uchararishwa chiaimweri na awo wisemwichi Mlungu na awo werebwaghiloghe wudenyi; ee, uo mzuri moni na izungu jake jose. Ini Bwana MLUNGU naghamba.”