Read TAITA BIBLE – Biblia Ilagho Jiboie Kwa Wandu Wose EZEKIELI 33 Bible Online

EZEKIELI 33 - TAITA BIBLE – Biblia Ilagho Jiboie Kwa Wandu Wose bible

EZEKIELI 33

¹BWANA ukaghora nani ukighamba,

²“Mwana wa mdamu, dedanya na wandu wako kuwizere: Ngareda wuda isangenyi, waisanga wichaawika mndumu ukaie mlindiri wawo.

³Uo mlindiri ukawona m'maiza ukicha isangenyi, uchawighoria wandu kwa kukaba tarumbeta.

⁴Mndungi ukatoteshwa ni ugo wuda kwa kuleghatala lwaka lwa tarumbeta, bagha yake ichakaia aighu yake moni.

⁵Wasikira tarumbeta putu, nao ukaaleghatala moni; kwa huwo bagha yake ichakaia aighu yake. Angu na wei odesikira nao ukatala, kumangu wakirie irangi jake.

⁶Ela mlindiri ukawona m'maiza ukicha, nao ulemo ni kukaba tarumbeta emanyisha wandu, mndumu wadima kutota. Uja mundu uchafwa kwa wundu ghwa ikosa jake loli, ela bagha yake nichaikotia kwa uja mlindiri.

⁷“Kwa huwo ee mwana wa mdamu, nakuwika oho kukaie mlindiri aighu ya wandu wa Israeli. Iji kwasikira ilagho kufuma kwapo, kuchawionya wandu.

⁸Ngamzera mundu mmbiwi kukaia uchafwa, na oho kuleghe kumghoria uo mundu mmbiwi eri upate kughaluka na kusigha wuwiwi ghwake, uo mundu mmbiwi uchafwa kwa wundu ghwa makosa ghake, ela bagha yake nichaikotia kwako.

⁹Ela kukamghoria usighe wuwiwi ghwake, nao uleghe kughaluka na kusigha ugho wuwiwi, uchafwa kwa wundu ghwa wuwiwi ghwake, ela oho kuchakira irangi jako.

¹⁰“Na oho ee mwana wa mdamu, ghoria wandu wa Israeli huwu: Inyo mwaawuyaghamba, ‘Makosa ghedu na kaung'a redu diribonyere reeka nyingi, naro raawuyadidarumisha; welee, dikaia wada moyo?’

¹¹Wizere, Sa iji koni ini Bwana MLUNGU nikaigha moyo, naghamba, Siboilwagha ni kifwa cha mundu mmbiwi, ela neekunda uo mmbiwi ughaluke na kurisigha chia rake mbiwi ukaie moyo. Ghalukenyi msighe chia renyu mbiwi, ee wandu wa Israeli; ado mfuyaki wandu wa Israeli?

¹²Na oho ee mwana wa mdamu, wizere wandu wako huwu: Hachi ya mundu wa hachi ndeichaamkira iji wabonya mawiwi. Kwa uo mundu mmbiwi, ndechaafwa kwa ugho wuwiwi ghwake, iji waghaluka na kusigha wuwiwi ghwake. Mhachi ndechaakaia moyo kwa hachi yake iji wabonya kaung'a.

¹³Hata ngera namzera mundu wa hachi kukaia uchakaia moyo kwa wundu ghwa hachi yake, nao ubonye kaung'a, ibonyo jingi ja hachi yake ndejichaakumbukwa; ela uchafwa kwa wundu ghwa ugho wuwiwi waghubonya.

¹⁴Sena ngamzera mundu mmbiwi, ‘Loli kuchafwa,’ nao ughaluke na kuisigha kaung'a yake, na kubonya agho ghiko gha loli na gha hachi,

¹⁵ukawunja mali orekopieghe, na kuwunja icho oresokieghe, na kughenda kwa kuinugha memu iredagha irangi, usebonyagha mawiwi, kwa loli uchakaia moyo, ndechaafwa anduangi.

¹⁶Ndekuwadie ingi ya kaung'a rake oreribonyereghe ichaakumbukwa. Wabonyere agho ghiko gha loli na gha hachi, nao loli uchakaia moyo.

¹⁷“Sena niko wandu wako wawuyaghamba wei chia rapo si ra hachi kungi; na hoku chia rawo niro riseko ra hachi.

¹⁸Mundu wa hachi ukaisigha hachi yake na kubonya mawiwi, uchafwa kwa wundu ghwa agho mawiwi.

¹⁹Na mundu mmbiwi ukaghaluka na kusigha wuwiwi ghwake na kubonya agho ghiko gha loli na gha hachi, uchakaia moyo kwa agho mabonyo.

²⁰Sena muaghamba wei chia rapo si ra hachi kungi. Ee wandu wa Israeli, nichamtanya kula mundu kunughana na mabonyo ghake.”

²¹Ituku ja kasanu ja mori ghwa ikumi, mwaka ghwa ikumi na iwi ghwa kudwalwa wunyika kodu, mndumu ufufunukie kufuma Jerusalemu ukanichea ukaghamba, “Muzi ghwamerie kuwadwa.”

²²Luma lwa kenyi, imbiri ya uo mkimbii usechee, nerekoghe ngisikira ndighi ra BWANA; nakesho yaro, iji uo mkimbii orechieghe, BWANA ukafungua momu ghwapo nidede.

²³BWANA ukaghora nani ukighamba,

²⁴“Mwana wa mdamu, wandu wikaiagha andu kunonelo kwa isanga ja Israeli waawuyaghamba, ‘Abrahamu odeeka mundu umweri, nao ukanekwa iji isanga ujiwuse; isi dakaia wengi; loli danekelo iji isanga dijiwuse.’

²⁵Kwa huwo kuwighorie seji ini, Bwana MLUNGU nawuyaghamba: Inyo mwadaja nyama iko na bagha, na kutasa milimu yenyu, na kubwagha wandu; welee, mwadima kujiwusa iji isanga?

²⁶Mwakusaghika na lufu, na kubonya wuchafu; kula umu onyu waawuyakulusha kwa kulala na muka wa mmbao. Welee, mwadima kujiwusa iji isanga?

²⁷“Kuwighorie malagho kukaia, Sa iji ini Bwana MLUNGU nikaiagha moyo, naghamba loli awo wawuyakaia andenyi ya andu kunonelo wichabwaghwa wudenyi, na uo uko cha mbuwenyi nichamfunya kwa nyamandu ujigho, na awo wikuvisire ngomenyi na mbangenyi wichafwa kwa saka izamie.

²⁸Nichajibonya ijo isanga jisigho iduu putu, na iro ndighi wandu werekukasagha naro richasia; na mighondi ya Israeli ichasighwa miduu putu hata usoweke mundu oida aho.

²⁹Aho niko wichamanya kukaia ini ne BWANA, ingelo nabonya isanga jisigho iduu kwa wundu gwa ugho wuchafu ghwawo ghose wereghubonyereghe.

³⁰“Na oho mwana wa mdamu, wandu wako waawuyaja malagho aighu yako kaavui na wurigha, na minyangonyi ya nyumba, wikizerana kula mundu na mmbao, ‘Choonyi msikire ijo ilagho jafuma kwa BWANA.’

³¹Nawo wadaacha kwako sa ngelo rose, na kusea kidombo imbiri kwako sa wandu wapo, na kusikira agho kughoragha, ela ndewibonyagha sa iji wazerwa; kwa kukaia wawonyera lukundo kwa memu yawo, ela ngolo rawo rianugha fwaida rawo.

³²Koowuya kwawo sa mundu uboragha chumbo ra lukundo kwa lwaka lusingie, ukilukaba na chombo charo; kwa kukaia wadasikira malagho kughorie ela ndewibonyagha.

³³Iji malagho kughorie ghakatia, na loli ghichakatia; aho niko wichaamanya kukaia mlodi orekoghe aghadi kwawo.”