Read TAITA BIBLE – Biblia Ilagho Jiboie Kwa Wandu Wose EZEKIELI 34 Bible Online

EZEKIELI 34 - TAITA BIBLE – Biblia Ilagho Jiboie Kwa Wandu Wose bible

EZEKIELI 34

¹BWANA ukaghora nani ukighamba,

²“Mwana wa mdamu, funya wulodi aighu ya walisha wa Israeli kuwizere kukaia ini Bwana MLUNGU naghamba huwu: Ni bugha kwa walisha wa Israeli wikulishagha weni! Welee, ndeiwifwane walisha kulisha ng'ondi?

³Mwadaja mavuda, na kukurusha nguwo ra mafuri ghawo; mwadachinja iro ribandie, ela ndemrilishagha ng'ondi anduangi.

⁴Ndemteserie iro risewadie ndighi, na iro riko wakongo ndemriboisire; ndemrifungie iro richikie, iro rilaghirilo ni chia ndemuriwunjire, na iro rilagharie ndemurilolie; ela mwadaribonyera nguma kwa ndighi na kwa lubio.

⁵Kwa huwo reresaghisikieghe, angu riserewadieghe mlisha ungi; rikawuya vindo va nyamandu rose ra isakenyi.

⁶Ng'ondi rapo reresaghisikieghe, rikamara-mara aighu ya mighondi yose, na kula mghondi mlacha; ng'ondi rapo reresaghisikieghe ndoenyi kose, hata ndekuwadie mndungi orerilolieghe anduangi.

⁷“Idana inyo walisha sikirenyi seji ini BWANA nighoragha,

⁸Sa iji ini Bwana MLUNGU nikaiagha moyo, naghamba kwa kukaia ng'ondi rapo rawurie madiwo na vindo va nyamandu ra isakenyi, angu risowie mlisha ungi; na angu walisha wiserilolie ng'ondi, ela wedeeka wikikulisha weni wulalo gholisha ng'ondi,

⁹sikirenyi inyo walisha seji ini BWANA nimzeragha,

¹⁰Ini Bwana MLUNGU naghamba huwu, Olenyi nichalwa nenyo, nani nichakotia ng'ondi rapo konyu, na kumsighisha iyo kazi erilisha; nenyo ndemchaakulisha mmbeni sena anduangi. Nicharivuvua ng'ondi rapo risekaie vindo venyu sena.

¹¹“Ini Bwana MLUNGU naghamba kukaia nicharilola ng'ondi rapo hata niriwone.

¹²Na sa iji koni mlisha ulolagha ng'ondi rake risaghisikie kula, ni huwo koni nicharilola ng'ondi rapo; nani nicharivuvua kufuma andu kose reresaghisiroghe ituku ja mawingu na kira.

¹³Nani nicharifunya kufuma kwa wandu, na kufuma masangenyi. Nicharireda isangenyi jawo jeni, na kurilisha aighu mighondinyi ya Israeli, mbai na mbai ya ndoria ra machi, na andu kose kukailwagha ni wandu isangenyi.

¹⁴Nicharilisha na malisho mecha aighu ya mighondi milacha ya Israeli, rije na kudima andu kwa nyasi nyingi, aho kuko na malisho mecha aighu ya mighondi ya Israeli.

¹⁵Ini nimoni nichakaia mlisha wa ng'ondi rapo, nani nicharibonya ridime andonyi nicha, ini Bwana MLUNGU naghamba.

¹⁶“Nicharilola iro rilagharie, na kuriwunja chienyi iro rilagharilo ni chia; nicharifunga iro richikie, na kutesia iro risewadie ndighi; iro ribandie riko na ndighi, nicharitotesha; nani nicharilisha kwa hachi.

¹⁷“Na inyo chagha chapo, ini Bwana MLUNGU naghamba, Olenyi nichatanya aghadi ya ng'ondi na ng'ondi; bauru na fwandi.

¹⁸Welee ndemkatwagha ni kuja malisho mecha, hata ikaie suti mmbadie agho ghasigharika; munyo machi ghielie, na kuvurugha agho ghasigharika?

¹⁹Huwo ni suti ng'ondi rapo rije agho malisho mwaghiwadia, na kunywa machi mwaghivurugha?

²⁰“Kwa huwo ini Bwana MLUNGU namzera huwu, Olenyi Ini, Ini moni nichatanya aghadi ya iro ng'ondi ribandie, na iro ridarume.

²¹Angu mwawuyasindika iro ng'ondi ridarume na maonge, na kuritika na mbembe renyu, hata mrifunye noko,

²²nichakira ng'ondi rapo risewuye madiwo sena, nani nichatanya aghadi ya ng'ondi na ng'ondi.

²³Nani nichawika mlisha umweri aighu yawo, sa mdumiki wapo Daudi, nao ucharilisha, na kuwuya mlisha wawo.

²⁴Na ini BWANA nichakaia Mlungu wawo, na mdumiki wapo Daudi uchakaia m'baa wawo; ini BWANA najighora ilagho ijo.

²⁵Nichabonya ilaghano ja sere andwamweri naro, na kuinja nyamandu ra isakenyi rifume isangenyi; ripate kukaia banana kireti, rikilala kilembenyi.

²⁶“Nani nicharirasimia aighu ya mghondi ghwapo, na kurinyeshera vua kwa kimu charo; kuchakaia na mami gha marasimio.

²⁷Na midi ya mbuwenyi ichava matunda gharo, na mavalo gha ndoenyi ghichachurikia; richakaia banana isangenyi, naro richamanya kukaia ini ne BWANA, ingelo nichaiinja ghongolo ifume singonyi kwawo, na kurikira kufuma mikonunyi kwa awo wereribonyereghe wazumba.

²⁸Nderichaakaia madiwo sena gha iro mbari ra wandu, hata nyamandu ra isangenyi nderichaarija sena; richakaia banana na mndungi ndechaariturusa sena anduangi.

²⁹Nichawineka mbuwa inorie, nawo ndewichaapatwa ni njala sena isangenyi, angu kusholelwa ni iro mbari ra wandu.

³⁰Nawo wichamanya kukaia ini BWANA Mlungu wawo neko chiaimweri nawo, na awo wandu wa Israeli kukaia wandu wapo, ini Bwana MLUNGU naghamba.

³¹Inyo mo ng'ondi rapo, iro ng'ondi ra malisho ghapo, mo wandu wapo, na ini ne Mlungu onyu. Ini Bwana MLUNGU naghamba.”