Read TAITA BIBLE – Biblia Ilagho Jiboie Kwa Wandu Wose EZEKIELI 35 Bible Online

EZEKIELI 35 - TAITA BIBLE – Biblia Ilagho Jiboie Kwa Wandu Wose bible

EZEKIELI 35

¹BWANA oreghorieghe nani ukighamba,

²“Mwana wa mdamu, zighana cha Mghondi ghwa Edomu kufunye wulodi aighu yaro,

³kughuzere, Bwana MLUNGU waghamba huwu: Ola ne m'maiza wako oho Mghondi ghwa Edomu; nichaghorua mkonu ghwapo, na kukukaba, nani nichakubonya kusigho mduu.

⁴Nichainona mizi yako, na oho kusigho mduu; niko aho kuchamanya kukaia ini ne BWANA.

⁵Angu korekoghe na wumaiza ghwa toe na wandu wa Israeli, kwa Waisraeli, kukawifunya wibwagho wudenyi ngelo ya wasi ghwawo, ngelo ya kukabwa kwawo kwa kutua.

⁶Kwa huwo, sa iji nikaigha moyo, ini Bwana MLUNGU naghamba, nichakufunya kubwagho, na bagha ichalawia. Kwa kukaia na ikosa jebwagha, kifwa chichakunugha.

⁷Nichaghubonya mghondi ghwa Edomu ghusigho mduu, nani nichabwagha kula mundu uidiriagha aho.

⁸Mighondi yako nichaichura wafu, na hata mavongonyi kose kuchachulwa ni wafu wibwaghilo wudenyi.

⁹Nichakubonya kuwoneke mduu matuku ghose, na mizi yako ndeichaakailwa ni mndungi. Niko aho mchamanya kukaia ini ne BWANA.

¹⁰“Kwa kukaia kwaghambie wei iri mbari iwi, Juda na Israeli, richawuya rako, na masanga ghawo ghichawuya ghako, hata ngera ini BWANA nerekoghe aghadi kwawo;

¹¹niko huwo, sa iji ini BWANA nikaiagha moyo, nichakubonyera malagho kunughana na ghaja gheni gha machu na iriso koreghiwonyereghe kwa kuzamilwa ni wandu wapo, nani nichakubonya nimanyike kwawo ingelo nichaakaia ngimtanya.

¹²Na oho kuchamanya kukaia ini BWANA nasikire masholio ghose kubonyere aighu ya mighondi ya Israeli kukighamba, ‘Yasighilo miduu, nayo dainekelo dipate kuiwusa.’

¹³Mkakukasa mkideda malagho mengi aighu yapo nani ngasikira.”

¹⁴Bwana MLUNGU waghamba huwu, “Nichakubonya kusigho mduu, hata wandu wiboilo ndoenyi kose.

¹⁵Sa iji koreboiloghe aighu ya ifwa ja wandu wa Israeli, angu wei isanga jeresighiloghe iduu, huwo koni nichakubonyera agho gheni: mghondi ghwa Seiri, na isanga jose ja Edomu jichasighwa iduu putu. Niko wichamanya kukaia ini ne BWANA.