Read TAITA BIBLE – Biblia Ilagho Jiboie Kwa Wandu Wose EZEKIELI 36 Bible Online

EZEKIELI 36 - TAITA BIBLE – Biblia Ilagho Jiboie Kwa Wandu Wose bible

EZEKIELI 36

¹“Na oho ee mwana wa mdamu, funya wulodi aighu ya mighondi ya Israeli kughambe, Ee mighondi ya Israeli, sikirenyi seji BWANA ughoragha.

²Bwana MLUNGU waghamba huwu, Angu uo m'maiza ukusekie ‘Aha! Ihi mighondi ya kala yawurie yedu,’

³funya wulodi kughambe, Ini Bwana MLUNGU naghamba huwu, Kwa kukaia, ee, angu werekubonyereghe kukawoneka mduu, wikakufasha-fasha kufuma kula chia, hata kukawuya mali ya iro mbari rose ra wandu, wikikughora kisha-kisha wandunyi,

⁴kwa huwo ee mighondi ya Israeli, sikira seji ini Bwana MLUNGU nighambagha aighu ya mighondi mibaa na mitini, mavongo na vololo, andu kusighilo kuduu, na mizi ya kireti iwurie madiwo na kusekwa ni wandu wa mbari riko mbai-mbai;

⁵“Ini Bwana MLUNGU naawuyaghora niko na iriso ibaa aighu ya iro mbari ra wandu risigharikie, na Edomu yose, awo wiwusire isanga japo kwa kuboilwa kubaa, wikighora kwa lung'eto wei wajiwusire ijo isanga kwa ndighi.

⁶Kwa huwo funya wulodi aighu ya isanga ja Israeli, kuizere mighondi mibaa na mitini, vololo na mavongo, kukaia ini Bwana MLUNGU naawuyaghora niko na iriso, na machu mabaa angu mjie wasi ghosholelwa ni iro mbari ra wandu.

⁷Kwa wundu ugho ini Bwana MLUNGU; naghema kukaia iro mbari ra wandu risigharikie richapatwa ni wasi ghosholelwa wokoni.

⁸“Ela inyo ee mighondi ya Israeli, midi yenyu ichadungia na kubonya mbashu, nayo ichava matunda kwa wundu ghwa wandu wapo Israeli, angu kafwani koni wichaghala.

⁹Ola ini neko luwaru lonyu, nani nichamghalukia na kubonya isanga jawo jilimo na kuwalwa.

¹⁰Nichawibonya wandu wa Israeli wose wichurikie aighu yenyu, na iyo mizi erenoneloghe na kusighwa, ichaaghwa na kukailwa sena.

¹¹Nichawibonya wandu na nyamandu richurikie aighu yenyu, naro richava na kuchurikia, nenyo mchakailwa ni wandu sa iji koni morekoghe imbiri; nani nicham'bonyera mecha kuchumba imbiri. Niko mchamanya kukaia ini ne BWANA.

¹²Ee nichawibonya awo wandu wapo Israeli wisele aighu yenyu, nawo wichammbusa mmbuye mali yawo; nenyo ndemchaawingira wasi kwa wundu ghwa wana wawo anduangi.

¹³“Ini Bwana MLUNGU naghamba huwu, Kwa kukaia wandu wawuyakuzera, ‘Kwadaja wandu, na kuisoka mbari yako wana waro.’

¹⁴Kwa wundu ugho, ndekuchaaja wandu angu kuisoka mbari yako wana waro sena anduangi, Ini Bwana MLUNGU naghamba.

¹⁵Sichaakubonya kusikire masholio kufuma kwa iro mbari ra wandu sena hata wandu ndewichaakufusha waya, hata ndekuchaaikuwisha mbari yako sena, anduangi, ini Bwana MLUNGU naghamba.”

¹⁶BWANA ukaghora nani ukighamba,

¹⁷“Mwana wa mdamu, iji wandu wa Israeli werekoghe andenyi ya isanga jawo jeni, werejilushireghe kwa wundu ghwa mighendo yawo, na mabonyo ghawo ghizamie. Tabia rawo imbiri kwapo redeeka sa wuchafu ghwa muka uko merinyi.

¹⁸Kwa huwo machu ghapo ghikawuka aighu yawo kwa wundu ghwa kubwagha wandu isangenyi na kulusha isanga na iyo milimu yawo.

¹⁹Nani ngawisaghisa aghadi ya iro mbari ra wandu, wikasasarika masangenyi; ngawitanya kunughana na tabia rawo, na mabonyo ghawo ghizamie.

²⁰Ela andu kose wereghendieghe kwa iro mbari ra wandu, werejilushireghe irina japo jielie; na kwa wundu ugho, wandu wikakaia wikiwizera, ‘Awa ni wandu wa BWANA, ela sena ikakaia wifume isangenyi kwake.’

²¹Ela nerekoghe ngijitala irina japo ja wueli, ijo jilushiro ni wandu wa Israeli aghadi ya iro mbari ra wandu wererighendieghe.

²²“Kwa huwo kuwizere wandu wa Israeli kukaia ini Bwana MLUNGU siwuebonya maza iro kwa wundu ghonyu, ela ni kwa wundu ghwa irina japo ja wueli, ijo mujilushire aghadi ya iro mbari ra wandu morerighendieghe.

²³Nani nichadederia wueli ghwa irina japo ibaa ijo jilushiro aghadi ya iro mbari ra wandu, nenyo mmbeni mkajilusha aghadi kwawo; na iro mbari richamanya kukaia ini ne BWANA. Ini Bwana MLUNGU naghamba, iji nichaadederia wueli ghwapo imbiri kwawo ngimtumia inyo.

²⁴Nichamfunya mfume kwa iro mbari ra wandu, nani nichamtumbanya kufuma masangenyi, na kumreda kwa isanga jenyu jeni.

²⁵Nani nichamnyinyiria machi ghielie aighu konyu, nenyo mchaela kufuma kwa wuchafu ghonyu, na wutasi milimu ghonyu ghose.

²⁶Nichamneka ngolo mbishi, na roho mbishi nichaingira andenyi konyu; nani nichafunya ngolo ikurie sa igho kufuma konyu, na kumneka ngolo inyafue.

²⁷Nichangira roho yapo andenyi konyu, na kumghenja kwa kunugha sharia rapo, nenyo mchailindia na kuitala memu yapo.

²⁸Mchakaia andenyi ya isanga nerejinekieghe weke ndeyo, nenyo mchakaia wandu wapo na ini nichakaia Mlungu onyu.

²⁹Nichamfunya wuchafunyi ghonyu ghose, nani nichalaghira viro vichurikie konyu kwa wungi; hata njala ingi ndeichaakaia konyu sena anduangi.

³⁰Midi yenyu ya matunda ichava kwa wungi, na mavalo gha mbuwenyi; eri msekaie na wasi ghungi ghwa njala sena ghommenyesha aghadi ya iro mbari ra wandu.

³¹Mchakumbuka chia renyu rizamie na agho mabonyo ghenyu ghizamie, nenyo mchakuzamia mmbeni kwa agho mabonyo ghenyu ghizamie gha wuchafu moreghibonyereghe.

³²Nakunde mmanye angu siwuebonya huwo kwa wundu ghonyu ini Bwana MLUNGU naghamba. Fonyi waya mkambo ni chongo kwa wandu ghwa mighendo enyu, ee wandu wa Israeli.”

³³Bwana MLUNGU waghamba huwu, “Ngameria kumuelesha kufuma kwa wuwiwi ghonyu, nichaibonya mizi ikailo ni wandu, na andu korenonekieghe kuagho sena.

³⁴Isanga jeresighiloghe iduu jichalimwa, wulalo ghokaia iduu na kuwonwagha ni wandu wiidagha.

³⁵Nawo wichaghamba, ‘Iji isanga jeresighiloghe iduu, hoku idana jawuya sa mbuwa ya Edeni, mizi eresighiloghe maghacho, na andu koresighiloghe kuduu na kunoneka, idana kwaaghilo na kukailwa ni wandu.’

³⁶Aho niko iro mbari ra wandu risigharikie rimmarie chia rose richamanya kukaia ini BWANA, namerie kuiagha iyo mizi, na kuibonya iyo mizi eresighiloghe miduu ikailo ni wandu. Ini BWANA najighora ilagho iji, nani nichajikatisha.”

³⁷Bwana MLUNGU waghamba huwu, “Nichawibonya wandu wa Israeli winilombeghe, nani nichawibonya wichurikie kwa wungi sa ng'ondi.

³⁸Mizi ichachulwa ni wandu kwa wungi, sa ng'ondi refunya kizongona, sa ng'ondi nyingi rifunyiro Jerusalemu kwa wundu ghwa ndima riwikilo. Huwo niko iyo mizi erekoghe miduu ichaachulwa ni wandu; nawo wichamanya kukaia Ini ne BWANA.”