Read TAITA BIBLE – Biblia Ilagho Jiboie Kwa Wandu Wose EZEKIELI 37 Bible Online

EZEKIELI 37 - TAITA BIBLE – Biblia Ilagho Jiboie Kwa Wandu Wose bible

EZEKIELI 37

¹Neresikireghe ndighi ya BWANA, na Roho wake ukanifunya shighadi; ukaniwika ghadi na ghadi ya vololo ichue maindi.

²Ukanighenja andu kose vololonyi aghadi ya agho maindi, ngawona maindi mengi nandighi a vololonyi, ghiomie nandighi.

³Nao ukanikotia, “Mwana wa mdamu, welee, agha maindi ghadima kukaia moyo?” Nani ngatumbulia, “Ee Bwana MLUNGU, oho kwamanya.”

⁴Ukanizera sena, “Ghifunyire agha maindi wulodi kughizere, Inyo maindi ghiomie, sikirenyi ilagho ja BWANA.

⁵Bwana MLUNGU waghizera agha maindi huwu, Olenyi nichabonya miruke imngie, nenyo mchakaia moyo.

⁶Nani nichammbikiria chugha na mighenu, na kufinikira nyama aighu yaro na kummbikiria mrongo; nani nichamfuria miruke, nenyo mchakaia moyo; nenyo mchamanya kukaia ini ne BWANA.”

⁷Niko ngaghifunyira agho maindi wulodi, sa iji koni nerelaghiriloghe; hata iji nerekoghe ngighifunyira wulodi, korekoghe lwaka na mchekecho; maindi ghikazoya kusoghoderana kula indi na mmbao.

⁸Hata iji nerekoghe ngizighanira, ngawona chugha na mighenu aighu ya agho maindi, na nyama aighu yaro, na mrongo ghukafinikira; ela miruke ndeerekoghe andenyi kwaro anduangi.

⁹Mlungu ukanizera, “Idana funya wulodi aighu ya miruke, ee mwana wa mdamu, kuizere, Bwana MLUNGU waghamba huwu: Choo kufuma mbembe inya ra wurumwengu ee miruke, kuwingie awa wandu werebwaghiloghe wipate kukaia moyo.”

¹⁰Niko ngafunya wulodi seji nerezereloghe; na miruke ikawingia, wikakaia moyo; wikawuka kimusi kwa maghu ghawo, ijeshi ibaa na ndighi.

¹¹Niko Mlungu ukanizera, “Mwana wa mdamu, maindi agha ni wandu wose wa Israeli. Wadaghamba, ‘Maindi ghedu ghaomie na isuwirio jamerie kusia, deesia putu.’

¹²Kwa huwo, funya wulodi kuwizere, Ini Bwana MLUNGU naghamba huwu, Nicharughua makaburi ghenyu, na kumrukisha mfume makaburinyi konyu, wandu wapo, nani nichamreda isangenyi mzenyu ja Israeli.

¹³Na ingelo nichaarughua makaburi ghenyu na kumrukisha, niko mchaamanya kukaia ini ne BWANA, ee wandu wapo.

¹⁴Nani nichangira Roho wapo andenyi konyu, nenyo mchakaia moyo; nichammbunja andenyi ya isanga jenyu jeni, nenyo mchamanya kukaia ini BWANA namerie kughora na kughibonya; waghamba BWANA.”

¹⁵BWANA ukaghora nani ukighamba,

¹⁶“Mwana wa mdamu, wada chenga cha mudi kuandike aighu yaro, ‘Kwa wundu ghwa Juda na wandu wa Israeli wikwanye,’ sena kuwade chenga cha mudi kizima kuchiandike aighu yaro, ‘Kwa wundu ghwa Josefu (ni chenga cha Efraimu) na wandu wa Israeli wose wikwanye;’

¹⁷nao kuviwasanye chiaimweri vose viwuye chenga chimweri mkonunyi kwako.

¹⁸Na wandu wako wikakukotia kutambua kwaro maza iro

¹⁹kuwizere ini BWANA Mlungu naghamba huwu: Olenyi nichawada chenga cha mudi cha Josefu (chiko mkonunyi kwa Efraimu) na wandu wa Israeli wikwanye, nichikwanye chiaimweri na chenga cha Juda, na kuchibonya chikaie chenga chimweri, eri wipate kukaia umweri mkonunyi kwapo.

²⁰“Kukameria kuviwadia ivo venga va mudi kwaviandika imbiri kwawo,

²¹kuwizere, kukaia ini Bwana MLUNGU nichawireda wandu wa Israeli kufuma kwa iro mbari ra wandu andu werekoghe wadwalwa wunyika. Nichawitumbanya kufuma andu kose, na kuwireda andenyi ya isanga jawo jeni.

²²Nani nichawibonya wikaie mbari imweri isangenyi, aighu ya mighondi ya Israeli; na mzuri umweri uchawibonyera nguma wose, nawo ndewichaakaia mbari iwi sena, hata ndewichaawaghika wikaie mawuzuri awi sena anduangi.

²³Ndewichaakulusha na milimu yawo hata kukunona na vilambo vizamie sena, angu makosa ghangi ghawo; ela nichawikira na uko kuwuya nyuma kwawo kose, uko werenibonyereghe nako kaung'a. Nichawielesha wikaie wandu wapo, nani nikaie Mlungu wawo.

²⁴“Mdumiki wapo Daudi uchakaia mzuri wawo, na wose wichakaia na mlisha umweri. Wichanugha memu yapo, na kuritala sharia rapo.

²⁵Wichakaia isangenyi ijo jerekailoghe ni weke ndee, ijo neremnekieghe mdumiki wapo Jakobo. Wichakaia aho, na wana wawo, na weke wawae kwa kala na kala, na mdumiki wapo Daudi uchakaia m'baa wawo kwa kala na kala.

²⁶Nichabonya ilaghano ja sere nawo, najo jichakaia ilaghano ja kala na kala. Nichawimangisha na kuwibonya wichurikie; na Andu Kwapo kwa Wueli nichakuwika aghadi kwawo kwa kala na kala.

²⁷Nichakaia aghadi kwawo, nani nichakaia Mlungu wawo, nawo wichakaia wandu wapo.

²⁸Niko iro mbari ra wandu richamanya kukaia ini BWANA namueleshagha Israeli ingelo Andu kwapo kwa Wueli kuchaakaia aghadi kwawo kwa kala na kala.”