Read TAITA BIBLE – Biblia Ilagho Jiboie Kwa Wandu Wose EZEKIELI 38 Bible Online

EZEKIELI 38 - TAITA BIBLE – Biblia Ilagho Jiboie Kwa Wandu Wose bible

EZEKIELI 38

¹BWANA ukaghora nani ukighamba,

²“Mwana wa mdamu, zighana Gogu wa isanga ja Magogu, m'baa wa wabaa wa Mesheki na Tubali. Kufunye wulodi aighu yake

³kughamba, Ini Bwana MLUNGU naghamba huwu, Ola ne m'maiza wako ee Gogu, m'baa wa wabaa wa Mesheki na Tubali;

⁴nichakungira koleo ra muzunyi, na kukughalua ii chia na ii chia, na kukukurudua chiaimweri na ijeshi jako jose, na farasi na wajoki farasi; wose wirushiro maswagha, izungu ibaa nandighi, wiko na ngao ndini na mbaa, wiwadie chufu.

⁵Wikwanye na Pashia, Kushi na Putu, wose wiko na ngao, na kofia ra chuma.

⁶Gomeri na masikari ghake ghose, Beth-togarma chiaimweri na masikari ghawo kufuma masanga gha kula gha kaskazinyi, wikwanye na wandu wengi.

⁷“Bonya kukuwike tayari na ijeshi jako jose, awo wose wikukwanyikie na kukumara chia rose; nao kukaie kilongozi wawo.

⁸Nyuma ya matuku mengi, kuchatumbanywa; miaka ichagha kuchaghenda kulwa na isanga jisighie kulwa wuda, wandu waro werewunjiroghe kufuma kwa mbari nyingi, na kuwikwa aighu ya mighondi ya Israeli, iyo eresighiloghe miduu kwa ngelo ndacha; na wandu waro wose waawuyakaia nicha.

⁹Kuchawuka na kucha sa kiremba, na sa ikungughu ibaa kujifinikira isanga; kuchawichea na masikari ghako ghose, na wandu wengi mkwanye.”

¹⁰Bwana MLUNGU wakuzera huwu oho Gogu, “Ngelo iyo ikavika, kuchachelwa ni maghesho ghebonya mipango ya wuwiwi.

¹¹Kuchaghamba, ‘Nichaghenda kulwa na isanga ja mizi isena wurigha; nichawikaba awo wandu wawuyakaia nicha na sere. Awo wandu wose wadakaia andenyi ya mizi isene wurigha, isanju hata mbenge.’

¹²Nichawada na kusara vilambo; nichaingiria iyo mizi eresighiloghe, nayo idana yawuyakailwa ni wandu, chiaimweri na awo wandu wiwurie kufuma kwa iro mbari ra wandu wiko na ng'ombe na vilambo, awo wikaiagha ghadi na ghadi ya ndoenyi.

¹³Wandu wa Sheba na wa Dedani, na wandu wa biashara wa Tarshishi na mizi yawo mitini yose wichakuzera, ‘Welee, kwaachawada vilambo? Kwaatumbanya majeshi ghako eri kucheduka vilambo, na feza na dhahabu, na kudwa ng'ombe na vilambo kwa wungi?’”

¹⁴“Kwa huwo ee mwana wa mdamu, funya wulodi kumzere Gogu, Ini Bwana MLUNGU naghamba huwu: Ituku wandu wapo wa Israeli wichaakaia nicha, kuchamanya.

¹⁵Na oho kuchacha kufuma kula nandighi cha kaskazinyi, chiaimweri na wandu wengi; wose wijokagha farasi, ijeshi ibaa jiwadie ndighi.

¹⁶Kuchawichea wandu wapo Israeli sa ikungughu, kupate kulwa nawo; kuchafinikira isanga jose. Matuku gha kutua nichakureda kupate kujikaba isanga japo, eri iro mbari ra wandu ripate kunimanya, ingelo nichaawonyera wueli ghwapo imbiri kwawo kwa kukutumia oho ee Gogu.

¹⁷Ini Bwana MLUNGU naghamba huwu: Welee, si oho kumoni nerekughoragha ngiwitumia wadumiki wapo walodi wa Israeli kokala, wikiloda kwa miaka mingi kukaia nichakureda kupate kulwa na Israeli?”

¹⁸Bwana MLUNGU waghamba, “Ituku Gogu uchaacha kuwikaba wandu wa isanga ja Israeli, machu ghapo ghichawuka.

¹⁹Na kwa wundu ghwa iriso na machu ghapo ghibirie, naghamba, Ituku ijo kuchakaia na msughusiko m'baa andenyi ya isanga ja Israeli;

²⁰ugho msughusiko ghuchasughusa samaki baharinyi, na nyonyi ra mbeonyi, na nyamandu ra mlambenyi, na shimandu riavuagha andoenyi, na wandu wose wiko aighu ndoenyi. Ngelo ya kucha kwapo wandu wose wichasughusika, na mighondi ichang'arishwa andoenyi, na maghamba ghichaghwa, na kula wurigha ghuchaghwa andoenyi.

²¹Nichareda wuda kulwa na Gogu aighu ya mighondi yapo yose. Ini Bwana MLUNGU naghamba, na kula mundu uchamghalukia mmbao um'bwaghe.

²²Nichamtanya kwa saka izamie, na kubwagha; nani nichamnyeshera vua ya magho chiaimweri na masikari ghake, na wandu wengi wikwanye; vua ya magho mbaa, na modo na kibiriti.

²³Nani nichawonyera wubaa ghwapo na wueli ghwapo, na kukumanyisha ini moni imbiri ya iro mbari nyingi ra wandu. Niko wichamanya kukaia ini ne BWANA.”