Read TAITA BIBLE – Biblia Ilagho Jiboie Kwa Wandu Wose EZEKIELI 39 Bible Online

EZEKIELI 39 - TAITA BIBLE – Biblia Ilagho Jiboie Kwa Wandu Wose bible

EZEKIELI 39

¹Bwana MLUNGU waghamba “Mwana wa mdamu, funya wulodi aighu ya Gogu, m'baa wa wabaa wa Mesheki na Tubali kughambe kukaia ini ne m'maiza wake.

²Nichamghalua na kumghenja kufuma noko kula kutuonyi kwa kaskazinyi, wendelwa aighu ya mighondi ya Israeli.

³Nichaikaba ndana yake iko mkonu ghwake ghwa kiwaka, na kughipotua mawanu ghake mkonu ghwake ghwa kiwomi.

⁴Uchabwaghwa aighu ya mighondi ya Israeli, chiaimweri na masikari ghake wandu mkwanye. Nichamfunya ujigho ni nyonyi ra kula kichuku rijagha nyama, na nyamandu ra isakenyi.

⁵Uchabwaghwa a mlambenyi, kwa kukaia ini Bwana MLUNGU najighora ilagho iji.

⁶Nichareda modo aighu ya Magogu na kwa awo wikaiagha nicha masanga gha pwani; nawo wichamanya kukaia ini ne BWANA.

⁷Na irina japo ja wueli nichajimanyisha aghadi ya wandu wapo Israeli; hata sichaasigha irina japo jilusho sena, na iro mbari ra wandu wichamanya kukaia ini ne BWANA, uo Mweli wa Israeli.

⁸“Olenyi ituku nerejighorieghe ini Bwana MLUNGU jaawuyacha, najo jichavika. Ijo nijo ituku nerejighoragha.

⁹Wandu wikaiagha andenyi ya mizi ya Israeli wichafuma na kushoa maswagha ghisighilo andonyi na kughitumia sa mbande. Nichakora ngao ndini na mbaa, ndana na mawanu, rungu na mafumu sa mbande kwa miaka mfungade,

¹⁰hata ndewichaafuma kwendashoa mbande mlambenyi, angu kudema mudi ghungi msidunyi; wichawisoka awo werewisokieghe, ini Bwana MLUNGU naghamba.”

¹¹“Ituku ijo, nichamneka Gogu andu komrikia andenyi ya Israeli, aja Vololo ya Wacharo, noko cha mashariki ya baharinyi. Andu aho kuchabwagha chia ya wacharo, kwa kukaia Gogu na izungu ja wandu wake wicharikwa aho; nako kuchawangwa Vololo ya Ijeshi ja Gogu.

¹²Waisraeli wicharika iro gharia kwa meri mfungade, wipate kuelesha isanga.

¹³Wandu wose wa isangenyi wichawirika, nawo wichanekwa ishima kwa ijo ibonyo, ituku nichaakaia ngiwonyera wubaa ghwapo, ini Bwana MLUNGU naghamba.

¹⁴Nyuma ya meri mfungade, wichawika wandu wemara-mara isangenyi kose tulituli, na kuririka iro gharia risigharikie, wipate kuelesha ijo isanga.

¹⁵Nawo iji wakaida isangenyi, na mndumu uwone indi ja mdamu, uchawika alama aho hata awo wandu werika wacha na kumrika aho Vololo ya Ijeshi ja Gogu.

¹⁶(Wokoni muzi ghuwangwagha Homona ghoko aeni aho.) Huwo niko wichaaelesha isanga.”

¹⁷“Na oho ee mwana wa mdamu, Bwana Mlungu wakuzera huwu: Zera nyonyi ra mbari rose na nyamandu ra mlambenyi rikwanyike kufuma andu kose, riche karamunyi ya kizongona nawuyaibonya kwa wundu ghwawo; kizongona kibaa nandighi nichaachibonya aighu ya mighondi ya Israeli; naro richaja nyama, na kunywa bagha.

¹⁸Richaja nyama ra wandu wiwadie ndighi, na kunywa bagha ya wabaa wa ndoenyi sa bagha ra bauru, na ra wana wa ng'ondi, na mburi, na ra njau, agho manori ghose gha Bashani.

¹⁹Mchaja manori mghude, na kunywa bagha hata immbongere, aho karamunyi ya kizongona niibonyagha kwa wundu ghonyu.

²⁰Nenyo mchaghuda vindo vapo va nyama ra farasi na wajoki farasi, na wandu wiwadie ndighi, na ra wandu wa wuda wa kula mbari, ini Bwana MLUNGU naghamba.”

²¹BWANA waghamba, “Nichawonyera wubaa ghwapo aghadi ya iro mbari ra wandu, naro rose richawona kutanya kwapo seji nabonya, na seji nawikaba.

²²Wandu wa Israeli wichamanya kukaia ini ne BWANA Mlungu wawo kufuma ituku ijo na noko imbiri.

²³Wandu wa iro mbari wichamanya kukaia wandu wa Israeli wededwalwa wunyika kwa wundu ghwa makosa ghawo, angu werenibonyereghe kiwiwi nandighi, nani ngasigha kuwizighana: ngawisigha wingie mikonunyi kwa wamaiza wawo, wikabwaghwa wose wudenyi.

²⁴Nedebonya huwo kunughana na wuchafu na makosa ghawo, nani ngasigha kuwizighana.”

²⁵Bwana MLUNGU waghamba huwu, “Idana nichammbunjira Jakobo mali rake, na kuwiwonia wughoma wandu wa Israeli nani nichakaia na iriso kwa wundu ghwa irina japo ja wueli.

²⁶Wichaliwa ghuja waya ghwawo na ugho wuwiwi werenibonyereghe ingelo wachakaia nicha isangenyi jawo, kuseko na mndungi owikumba wowa.

²⁷Iji nachawiwunja kufuma kwa wandu, na kuwitumbanya kufuma kwa isanga ja wamaiza wawo niko nichaawonyera kwa chia yawo ugho wueli ghwapo mesonyi kwa iro mbari ra wandu.

²⁸Niko wandu wapo wichamanya kukaia, ini ne BWANA MLUNGU wawo, angu nerewibonyereghe widwalo wunyika kwa iro mbari ra wandu, sena ngawikwanya na kuwiwunja isangenyi kwawo koni; sichaasigha sena hata umweri wawo andenyi ya isanga ja iro mbari ra wandu,

²⁹hata sichaaleka kuwizighana sena, iji nadia Roho wapo kwa wandu wa Israeli. Ini Bwana MLUNGU naghamba.”