Read TAITA BIBLE – Biblia Ilagho Jiboie Kwa Wandu Wose EZEKIELI 4 Bible Online

EZEKIELI 4 - TAITA BIBLE – Biblia Ilagho Jiboie Kwa Wandu Wose bible

EZEKIELI 4

¹“Na oho ee mwana wa mdamu, wada itofali kujiwike imbiri kwako, na kuchora muzi ghwa Jerusalemu aighu yaro.

²Kuwonyere kazi eghurughaia; kuaghe wurigha, kubonye kitungu cha ndoe, kuwike kambi eghurughaia, na kuwike vilingo veghuvuchua ugho muzi chia rose.

³Nao kuwade sahani ya chuma, kuiwike sa wurigha ghwa chuma aghadi yako na ugho muzi, ima kughuzighaneghe ugho muzi. Kughusighe ghuwonekeghe seji ghoorughailwa, na oho kuchurie kughurughaia. Iyo ichakaia alama kwa wundu ghwa wandu wa Israeli.

⁴“Niko aho kuchalala na luwaru lwa mkonu ghwa kiwaka, nani nichakubonya kuduke ikabo ja wandu wa Israeli aighu yako; kuchaduka ikabo jawo andenyi ya matuku kuchaalala aho.

⁵Angu nakuwikia mtalo ghwa matuku kuchaalala aho; matuku maghana adadu na mirongo ikenda, ghikatane na miaka ya kukabwa kwawo, kunughana na matuku ghose kuchaaduka ikabo ja wandu wa Israeli.

⁶Kukameria mtalo ghwa agho matuku, kuchaghaluka luwaru, kulale indo ja kawi na luwaru lwa mkonu ghwa kiwomi, kupate kuduka ikabo ja wandu wa Juda; mtalo ghwaro nikuwikie ghuchakaia matuku mirongo ina, ituku jimweri jikatanisho na mwaka ghumweri.

⁷“Kukaie kukizighana kurughailwa kwa Jerusalemu, na kughukuchira ngonde; na oho kuchafunya wulodi aighu ya ugho muzi.

⁸Nao ola nichakufunga na kamba, eri kusedime kughaluka kufuma luwaru ulu hata luwaru ulu, hata kwameria kukatisha mtalo ghwa matuku gheghurughaia.

⁹“Idana kuwade ngano, na shairi, na mngulu, na dengu, na mwemba, na msae; kuviranganye chiaimweri andenyi ya chombo chimu, nao kuvibonye mkate. Andenyi ya agho matuku maghana adadu na mirongo ikenda kuchaakaia kukilala na luwaru, kuchakaia kukija ugho mkate.

¹⁰Ivo vindo kuchaakaia kukija vichakaia vikipimwa gramu maghana awi na mirongo idadu kwa ituku. Kuchakaia kukija indo jimweri kwa ituku.

¹¹Wokoni na machi kuchanywa kwa kipimo, vikombe viwi kwa ituku.

¹²Kuchatumia mavi gha mdamu ghiomeshero ghikaie modo ghoocha ugho mkate imbiri ya wandu, na oho kuchaghuja seji kujagha mkate ghwa shairi.”

¹³Nao BWANA ukaghamba, “Wandu wa Israeli wichaja mkate ghwawo ghuseelie huwo, aghadi ya wandu wa iro mbari nichaawighenja.”

¹⁴Niko ngaghamba, “Ai e Bwana MLUNGU! Ola jingi sikulushire nimoni kwa kuja vindo viseelie; kufuma wanake ghwapo hata linu. Jingi sijie nyamandu ifue cheni, angu ibwaghilo ni mmbao, hata nyama ingi iseelie jingi ndeingirie momunyi kwapo.”

¹⁵Mlungu ukaghamba, “Haya nichakuleka kutumie mavi gha ng'ombe ghiomeshero wulalo ghwaro, kupate kukanga nagho mkate ghwako.”

¹⁶Ukachuria kughamba, “Mwana wa mdamu, ola nichapunguza mkate andenyi ya muzi ghwa Jerusalemu, nawo wichakaia wikija mkate kwa kipimo, sena wikilindia; nawo wichakaia wikinywa machi kwa kipimo wikakambwa ni chongo.

¹⁷Nichabonya huwo eri wipungukilo ni mkate na machi; wichazighanana wikishinika, nawo wichadaruma kwa wundu ghwa ikabo jawo.