Read TAITA BIBLE – Biblia Ilagho Jiboie Kwa Wandu Wose EZEKIELI 40 Bible Online

EZEKIELI 40 - TAITA BIBLE – Biblia Ilagho Jiboie Kwa Wandu Wose bible

EZEKIELI 40

¹Ituku ja ikumi ja mori ghwa imbiri ja kuzoya kwa mwaka, nagho ni mwaka ghwa mirongo iwi na isanu ghwa kubarishwa kodu, sena ni mwaka ghwa ikumi na inya nyuma ya Jerusalemu kuwadwa; ituku ijo jeni, neresikireghe wulemeri ghwa ndighi ra BWANA, nao ukanidwa noko.

²Andenyi ya mawono Mlungu orenidwaeghe cha isanga ja Israeli, na kuniwika aighu ya mghondi mlacha nandighi; naimbiri yapo chia ya kusinyi korekoghe na kilambo chiwonekagha sa muzi.

³Hata iji BWANA wanireda aho, neremmbonieghe mundu uwonekagha sa shaba; nao orekoghe na uzi wa kitani na mrangi ghopima mkonunyi kwake, wakaia kimusi a mbengenyi.

⁴Uo mundu ukanizera, “Mwana wa mdamu, zighana, kusikire, kuwadie malagho ghose nichaakuwonyera; kwa kukaia koderedwa aha nikuwonyere agho malagho, nao kuwighorie wandu wa Israeli.”

⁵Nao ngawona wurigha ghumarie cha shighadi ya Hekalu, na mundu opima ukawada mrangi ghopima ghorekoghe na wulacha ghwa meta idadu, nao ukaghupima ugho wurigha, ghukawoneka kukaia na wuighu ghwa meta idadu, na wurifu ghwa meta idadu.

⁶Niko ukaighendia mbenge ilangayagha cha mashariki, ukajoka viluwatiro varo, na kupima kizingiti cha mnyango ghwa mbenge, nagho ghorekoghe na wuighu ghwa meta idadu.

⁷Naimbiri yaro, korekoghe na chia eidiria na vumba va walindiri vidadu ii chia na vidadu ii chia, kula chimu cherekoghe na wulacha na wushapa ghukatane ghwa meta idadu idadu, na wushapa ghwa iyo chia ya ghadi na ghadi ni meta iwi na nusu.

⁸Niko ukapima luja lukumbi lwa chia eghenda Hekalunyi meta inya.

⁹Vizingiti va mnyango ghongia nokondenyi verekoghe va meta imweri wurifu, na wuighu ghwa lukumbi ghorekoghe meta inya.

¹⁰Ivo vumba vidadu vidadu va walindiri va chia ya mbenge ya mashariki vedeeka vikatane, na vizingiti va minyango yaro wori vedeeka vikatane.

¹¹Niko ukapima wushapa ghwa chia engiria ya mbengenyi meta isanu, na wulacha ghwaro meta irandadu na nusu.

¹²Naimbiri ya kula chumba cha walindiri, koreaghiloghe wurigha mvui ghwa sentimeta mirongo misanu wuighu, na wurifu ghwaro sentimeta mirongo misanu, (ela vumba veni vedeeka va mraba vikatane meta idadu kwa meta idadu.)

¹³Ukapima kusighana kwa ivo vumba va luwaru lwa ii chia, na luwaru lwa ii chia ukawona kufuma ipaa hata ipaa ni meta ikumi na iwi na nusu.

¹⁴Wokoni ukapima lukumbi kufuma kondenyi hata wazenyi lumaragha chia rose ukapata meta ikumi.

¹⁵Wukula ghwa kufuma andu kongiria mbengenyi hata nandenyi cha kutuonyi kwa lukumbi ni meta mirongo iwi na isanu.

¹⁶Vumba va walindiri verekoghe wurighenyi, verekoghe na madirisha cha nandenyi ghilangayagha chia ya mbengenyi; sa iji koni lukumbi lorekoghe na madirisha chia rose. Na avizingitinyi, korekoghe na fwana ra mitende.

¹⁷Nao ukanireda cha waza ya shighadi, ngawona vumba na sakafu kuimara ija waza, vumba mirongo idadu vilangayagha iyo sakafu.

¹⁸Iyo sakafu erengiriloghe wazenyi andu kose, nayo erekoghe ndonyi kuchumba iyo ya nandenyi kunughana na wulacha ghwa mbenge.

¹⁹Niko ukapima wukula kufuma naimbiri ya mbenge ya nandonyi hata naimbiri ya waza ya nandenyi ikakaia meta mirongo misanu.

²⁰Niko ukapima wulacha na wushapa ghwa mbenge ilangayagha kaskazinyi ifumiagha waza ya shighadi.

²¹Vumba varo va chuwaru iwi, vumba vidadu vidadu na vizingiti varo, na lukumbi lwaro vedeeka vikatane sa vija va mbenge ya imbiri. Wulacha ghwaro ghorekoghe ghwa meta mirongo iwi na isanu, na wushapa ghwa meta ikumi na iwi na nusu.

²²Madirisha gharo, na lukumbi lwaro na fwana ra mitende yaro, edeeka ya kipimo chifwanane sa vija va imbiri va mbenge ilangayagha cha mashariki, na viluwatiro varo mfungade vejoka cha mbengenyi; lukumbi lwaro lorekoghe cha nandenyi.

²³Korekoghe na mbenge engia cha wazenyi, ilangayagha ija ya kaskazinyi ifwanane na ya mashariki; nayo cheni ukaipima kufuma mbenge hata mbenge meta mirongo misanu.

²⁴Nao ukanidwa na kunilongoza cha kusinyi, ngawona mbenge aho kusinyi; nao ukapima vizingiti varo na lukumbi lwaro, vipimo varo vikakaia vikatane na wambao.

²⁵Korekoghe na madirisha kumara ivo vumba, na andenyi ya lukumbi, ghifwanane na gha vija vumba vizima; wulacha ghwaro ghorekoghe meta mirongo iwi na isanu na wushapa ghwaro ghorekoghe meta ikumi na iwi na nusu.

²⁶Korekoghe na viluwatiro mfungade vejoka cha mbengenyi, na lukumbi lwaro lodeeka cha nandenyi; sena korekoghe na fwana ra mitende a vizingitinyi ii chia na ii chia.

²⁷Na sena korekoghe na mbenge chia ya kusinyi ya waza ya ndenyi; ukapima kufuma mbengenyi hata mbengenyi ukapata meta mirongo misanu.

²⁸Niko ukanidwa cha waza ya ndenyi chia ya kusinyi, ukaipima iyo mbenge ya kusinyi, nayo ikawoneka ikatane na wambao.

²⁹Vumba va luwarunyi na vizingiti varo, na baraza yaro vedeeka vikatane sa vija vizima wori; sena korekoghe na madirisha kumara wurigha ghose, na lukumbi lwaro; wulacha ghwaro ghorekoghe meta mirongo iwi na isanu na wushapa ghwaro meta ikumi na iwi na nusu.

³⁰Chukumbi ra nandenyi ra chia ra mbengenyi kumara chia rose rerekoghe na wulacha ghwa meta mirongo iwi na isanu na wushapa ghwaro meta ikumi na iwi na nusu.

³¹Lukumbi lwaro lorekoghe lukilangaya waza ya shighadi, na fwana ra mitende yaro rerekoghe avizingitinyi, na chia yaro ejoka erekoghe na viluwatiro wunyanya.

³²Niko ukanidwa cha waza ya ndenyi, chia ya mashariki; ukaipima iyo mbenge; nayo erekoghe na vipimo vija veni va wambao.

³³Vumba varo va luwarunyi, na vizingiti varo, na lukumbi lwaro, vedekatana na wambao; sena korekoghe na madirisha chia rose ra lukumbi lwaro. Wulacha ghwaro ghorekoghe meta mirongo iwi na isanu, na wushapa ghwaro meta ikumi na iwi na nusu.

³⁴Lukumbi lwaro lorekoghe lukilangaya waza ya cha shighadi, na fwana ra mitende riko avizingitinyi varo; mtende ghumweri kula luwaru, na chia yaro ejoka erekoghe na viluwatiro wunyanya.

³⁵Niko ukanidwa cha mbengenyi ya kaskazinyi; ukaipima, nayo erekoghe na vipimo vija veni va wambao.

³⁶Vumba varo va chuwarunyi, vizingiti varo na lukumbi lwaro, lorekoghe na vipimo vikatane na va wambao; nayo erekoghe na madirisha kumara chia rose; wulacha ghwaro ghorekoghe meta mirongo iwi na isanu, na wushapa ghwaro meta ikumi na iwi na nusu.

³⁷Lukumbi lwaro lorekoghe lwalangaya waza ya shighadi, na fwana ra mitende riko avizingitinyi varo; mtende ghumweri kula luwaru, na chia yaro ejoka erekoghe na viluwatiro wunyanya.

³⁸Korekoghe na chumba chimu a mbengenyi ya lukumbi chiko na mnyango ghwaro, andu vizongona vekorwa vioghosherwagha.

³⁹Na aeni aho lukumbinyi lwa mbengenyi, korekoghe na meza iwi kula luwaru, andu vizongona vekorwa, na vizongona va kaung'a, na vizongona va malipo vibwaghilwagha.

⁴⁰Mbengenyi cha shighadi ya lukumbi ichia ya mbenge ya kaskazinyi, korekoghe na meza iwi, na ija chia ya lukumbi lwa mbengenyi, korekoghe na meza rimu iwi.

⁴¹Korekoghe na meza inya nandenyi na meza inya cha shighadi ya mbenge; rose ni meza wunyanya andu nyamandu ra vizongona ribwaghilwagha.

⁴²Sena wokoni korekoghe na meza ra magho ghiwachilo kwa wundu ghwa vizongona vekora; wulacha ghwaro na wushapa ghodekatana, sentimeta mirongo mfungade na isanu kwa mirongo mfungade na isanu; na wuighu ghwaro ghwa sentimeta mirongo misanu; vilambo vebwagha vizongona verewikiloghe aighu yaro.

⁴³Koleo ra wulacha ghwa milimeta mirongo mfungade na isanu rikafungwa kurimara iro meza nandenyi. Nyama refunya kizongona rikakaia riwiko aighu mezenyi.

⁴⁴Niko ukanireda kufuma shighadi, na kuningira andenyi ya waza ya nandenyi. Ngawona vumba viwi andenyi ya iyo waza, chimu cherekoghe chia ya mbenge ya kaskazinyi ilangayagha cha kusinyi, na chimu cherekoghe chia ya kusinyi ilangayagha cha kaskazinyi.

⁴⁵Nao ukanizera, Ichi chumba chilangayagha cha kusinyi ni cha wakohani awo widumikagha Hekalunyi;

⁴⁶na icho chilangayagha cha kaskazinyi ni cha wakohani awo widumikagha madhabahunyi. Awo ni wana wa Zadoku, nawo niwo wiekeri aghadi ya kichuku cha Lawi widimagha kusughuda kaavui na BWANA wikimdumikia.

⁴⁷Niko uja mundu ukaipima ija waza, nayo erekoghe na wulacha ghukatane na wushapa ghwaro meta mirongo misanu kwa mirongo misanu; na erekoghe naimbiri ya Hekalu.

⁴⁸Nao ukanidwa hata lukumbi lwa Hekalu; ukapima vizingiti va lukumbi, na wuighu ghwaro ghorekoghe meta iwi na nusu, na wushapa ghwa mbenge meta mfungade. Wurigha ghwaro ghorekoghe na wurifu ghwa meta imweri na nusu chuwaru rose.

⁴⁹Wulacha ghwa lukumbi ghorekoghe meta ikumi, na wushapa ghwaro meta irandadu. Korekoghe na viluwatiro ikumi vejoka nokoighu, na nguro kula luwaru mbai na mbai ya kula kizingiti.