Read TAITA BIBLE – Biblia Ilagho Jiboie Kwa Wandu Wose EZEKIELI 41 Bible Online

EZEKIELI 41 - TAITA BIBLE – Biblia Ilagho Jiboie Kwa Wandu Wose bible

EZEKIELI 41

¹Uja mundu ukanireda chumba kibaa cha ghadi na ghadi cha Hekalu, aho Andu kwa Wueli; ukapima ivo vizingiti viko kula luwaru, navo verekoghe na wuighu ghwa meta idadu.

²Wushapa ghwa mnyango ghorekoghe ghwa meta isanu, na wurifu ghwa wurigha ghorekoghe ghwa meta iwi na nusu kula luwaru. Vipimo va icho chumba kibaa cherekoghe na wulacha ghwa meta mirongo iwi, na wushapa ghwa meta ikumi.

³Niko ukangia chumba cha ndenyi; ukapima vizingiti va mnyango, kula chimu cherekoghe na wurifu ghwa meta imweri; chia eidiria erekoghe na wushapa ghwa meta idadu, na wurigha ghwa kula luwaru ghorekoghe na wurifu ghwa meta idadu na nusu.

⁴Ukapima icho chumba wulacha ghwaro na wushapa ghwaro ghukakatana, meta ikumi kwa ikumi; nacho cherekoghe naimbiri ya chumba kibaa cha ghadi. Nao ukanizera, “Aha ni Andu kwa Wueli Kuchumbie.”

⁵Niko uja mundu ukapima wurifu ghwa wurigha ghwa Hekalu, ukaghuwona kukaia ghwa meta idadu, na vumba vitini vitini vereaghiloghe kuimara Hekalu, viko na wushapa ghwa meta iwi.

⁶Ivo vumba vereimarieghe Hekalu verekoghe va gorofa idadu, na kula gorofa erekoghe na vumba mirongo idadu. Korekoghe na vilambo vewadia ivo vumba a wurighenyi ghwa Hekalu, vipate kumaziria ivo vumba, eri visekusaghike na wurigha.

⁷Ivo vumba viko a wurighenyi verekoghe vikichurikia wushapa ghwaro ngelo verechurilwagha kuaghwa nokoighu, vikawadana na ivo vilambo veviwadia kwa kula gorofa kuimara ija Hekalu. Korekoghe na viluwatiro vejokia nokoighu a luwarunyi lwa Hekalu kuidiria gorofa ya imbiri hata ya kutua.

⁸Nerewiwonieghe walala ghuaghilo ighu kuimara Hekalu, ghupate kukaia msingi ghwa vija vumba ghuko na wushapa ghwa meta iwi na nusu.

⁹Wurifu ghwa wurigha ghwa shighadi ghwa ivo vumba va luwarunyi ghorekoghe meta iwi na nusu; wulalo ghwa walala ghoresigharikieghe mduu, ghorekoghe na wushapa ghwa meta iwi na nusu. Ghadi na ghadi ya ugho walala na Hekalu,

¹⁰korekoghe na wushapa ghwa meta ikumi kuimara iyo Hekalu chia rose.

¹¹Minyango ya ivo vumba ererughuloghe kulangaya cha walalenyi iyo eresighiloghe nduu; mnyango ghumu kulangaya cha kaskazinyi, na mnyango ghumu kulangaya cha kusinyi, wushapa eresigharikieeghe nduu, ghorekoghe ghwa meta ikumi.

¹²Iaghi jerelangayagha shighadi ya Hekalu chia ya magharibi jerekoghe na wushapa ghwa meta mirongo idadu na isanu, na wulacha ghwa meta mirongo ina na isanu; na wurifu ghwa wurigha ghwaro ghorekoghe ghwa meta iwi na nusu, kumara chia rose.

¹³Niko ukaipima Hekalu; wulacha ghwaro ghorekoghe meta mirongo misanu, na waza chiaimweri na iaghi na wurigha ghwaro wokoni ni meta mirongo misanu.

¹⁴Huwo koni wushapa ghwa luwaru lwa mashariki hata kufuma noko cha wazenyi ni meta mirongo misanu.

¹⁵Sena ukapima wulacha ghwa iaghi ii chia na ii chia cha magharibi na wurigha ghwaro ukapata meta mirongo misanu. Chumba kibaa cha ghadi na ghadi cha Hekalu, na chumba cha Andu kwa Wueli Kuchumbie, na lukumbi lwa cha shighadi,

¹⁶koreshakiloghe na mbau kufuma kondonyi hata madirishenyi; vose vidadu verekoghe vashakwa na mbau na madirisha ghirughilo. Kulangaya cha vizingitinyi korekoghe na mbau rishakilo kufuma kondonyi hata madirishenyi kuimara chia rose.

¹⁷Wurigha ghwa nandenyi ghwa Hekalu hata kuvikia naighu ya minyango, koreshakiloghe na mbau. Mawurigha ghose gha nandenyi kumara chia rose, hata icho chumba kibaa, cherepambiloghe

¹⁸kwa makerubi na fwana ra mtende ghorekoghe ghadi na ghadi ya makerubi. Kula ikerubi jerekoghe na mawushu awi.

¹⁹Wushu ghwa ikerubi jimu ghukalangaya cha mtendenyi, na wushu ghwa shimba ya irika ghwa ikerubi jimu ghukalangaya cha mtendenyi. Rerekoghe rawachwa kwa wuya kumara Hekalu yose;

²⁰kufuma kondonyi hata madirishenyi korepambiloghe huwo kwa makerubi na mitende.

²¹Vizingiti va mnyango ghwa Andu kwa Wueli vedeeka va mraba. Naimbiri ya andu kongiria kwa Andu kwa Wueli Kuchumbie, korekoghe na kilambo chimu chiwonekagha

²²sa madhabahu ya mudi. Erekoghe na wuighu ghwa meta imweri na nusu, na wushapa ghwa meta imweri. Midi yaro ya konenyi, na andu kwaro kwa nandonyi, na chuwarunyi kwaro kose, korebonyeroghe kwa mudi. Uja mundu ukanizera, “Ihi ni meza ikaiagha imbiri ya BWANA.”

²³Andu kwa wueli na Andu Kwa Wueli Kuchumbie korekoghe na minyango, kula andu irughukagha mando awi.

²⁴Iyo minyango erekoghe erughua kuwi na kukwania ghadi na ghadi.

²⁵Sena korekoghe na fwana ya ikerubi na mtende minyangonyi ya Andu kwa Wueli, ifwanane na ija erekoghe wurighenyi; na mterengo ghwa mudi ghorugha lukumbi cha shighadi.

²⁶Korekoghe na madirisha ghirughilo a wurighenyi, na mitende kula luwaru awurighenyi ghwa lukumbi.