Read TAITA BIBLE – Biblia Ilagho Jiboie Kwa Wandu Wose EZEKIELI 42 Bible Online

EZEKIELI 42 - TAITA BIBLE – Biblia Ilagho Jiboie Kwa Wandu Wose bible

EZEKIELI 42

¹Niko uja mundu ukanidwa hata waza ya shighadi ilangayagha cha kaskazinyi; ukanireda andenyi ya vumba vilangayagha cha shighadi ya Hekalu, na iaghi jilangayagha cha kaskazinyi.

²Wulacha ghwa iaghi jerekoghe cha kaskazinyi ghorekoghe meta mirongo misanu na wushapa meta mirongo iwi na isanu.

³Kaavui na meta ikumi ra waza ya nandenyi, kulangaya sakafu ya waza ya shighadi korekoghe na vumba va gorofa idadu vilangayane.

⁴Naimbiri ya ivo vumba, korekoghe na chia eidiria nandenyi wushapa ghwaro meta isanu, na wulacha ghwaro meta mirongo misanu; na minyango yaro erelangayeghe cha kaskazinyi.

⁵Idana vumba va ighu verokoghe vitini angu wulalo ghwawo ghorewusiroghe ni vumba va nandonyi na va ghadi na ghadi;

⁶kwa kukaia rerekoghe gorofa idadu risewadie nguro sa rija ra waza ya shighadi, na huwo wulalo ghwaro ghorekoghe mtini kuchumba ivo vumba va ndonyi na va ghadi na ghadi.

⁷Korekoghe na wurigha ghumare cha shighadi ghuwadane na ivo vumba cha waza ya shighadi vilangayane na ivo vumba, wulacha ghwa ugho wurigha ni meta mirongo iwi na isanu.

⁸Kwa kukaia vumba verekoghe waza ya shighadi verewusireghe wulacha ghwa meta mirongo iwi na isanu, na vija verelangayagha Hekalu verewusireghe wulacha ghwa meta mirongo misanu.

⁹Nandonyi ya ivo vumba, korekoghe na chia engia iko cha mashariki iji mundu wakangia ukifuma waza ya shighadi,

¹⁰andu wurigha ghwa shighadi ghuzoiagha. Wokoni cha kusinyi, kulangaya waza na ijo iaghi, korekoghe na vumba,

¹¹na chia eidiria iko naimbiri ya ivo vumba; navo vedefwanana na ivo vumba viko cha kaskazinyi, vikatane wulacha na wushapa ghwaro, na minyango efumia ifwanane wubaa ghwaro na minyango yaro.

¹²Nandonyi ya vumba viko chia ya kusinyi, korekoghe na chia engiria ii chia cha mashariki, andu mundu ungiriagha, na kulangaya ivo vumba, korekoghe na wurigha.

¹³Niko uo mundu ukanizera, “Vumba viko chia ya kaskazinyi, na vumba viko chia ya kusinyi kulangaya cha wazenyi ni va wueli, aho niko awo wakohani wikaiagha imbiri ya BWANA, wichaaja agho mafunyo gha vizongona va wueli vichumbie, na aho niko wandu wichaakaia wikifunya agho mafunyo gha wueli ghichumbie vizongona va viro, vizongona kwa wundu ghwa kaung'a, na vizongona kwa wundu ghwa wuwiwi; angu andu aho ni kwa wueli.

¹⁴Ngelo wakohani wangia Andu kwa Wueli, wikakafuma cha waza ya shighadi, wichafunya iro nguwo ra wukohani redumika angu iro ni ra wueli, wiro zima, ima wifume noko cha wandunyi.”

¹⁵Nao iji uo mundu wameria kupima nandenyi ya Hekalu, ukanidwa noko na kunifunya shighadi kwa chia ya mbenge ya mashariki, ukachipima kiwacha cha Hekalu.

¹⁶Ukawada mrangi ghopima ukapima chia ya mashariki ukafunya meta maghana awi na mirongo misanu.

¹⁷Niko ukaghaluka na kupima chia ya kaskazinyi na ugho mrangi, ukafunya meta maghana awi na mirongo misanu.

¹⁸Ukaghaluka na kupima chia ya kusinyi na ugho mrangi, ukafunya meta maghana awi na mirongo misanu.

¹⁹Ukaghaluka na kupima chia ya magharibi na ugho mrangi, ukafunya meta maghana awi na mirongo misanu.

²⁰Ukapima chuwaru ra kiwacha rose inya. Icho kiwacha cheremariloghe ni wurigha, nagho ghorekoghe na wulacha ghukatane na wushapa; meta maghana awi na mirongo misanu kwa maghana awi na mirongo misanu. Ugho wurigha ni kwa wundu ghotanya andu kwa wueli na andu kwa wandu wose.