Read TAITA BIBLE – Biblia Ilagho Jiboie Kwa Wandu Wose EZEKIELI 43 Bible Online

EZEKIELI 43 - TAITA BIBLE – Biblia Ilagho Jiboie Kwa Wandu Wose bible

EZEKIELI 43

¹Konyuma uo mundu ukanireda mbengenyi ilangayagha cha mashariki.

²Ngawona wubaa ghwa Mlungu wa Israeli ghukicha kufuma mashariki. Lwaka lwake lorekoghe sa lwaka lwa machi mengi; ndoenyi kukang'ala-ng'ala kwa wundu ghwa wubaa ghwake.

³Agho mawono nereghiwonieghe gherekoghe sa ghaja nereghiwonieghe ingelo Mlungu orechagha kughunona muzi ghwa Jerusalemu, na sa ghaja nereghiwonieghe modenyi ghwa Kebari; niko ngaghwa kiwushu-wushu.

⁴Nao ugho wubaa ghwa BWANA ghukaidia ija mbenge iko chia ya mashariki, na kungia andenyi ya Hekalu.

⁵Niko Roho wa BWANA ukaniwusira na kunireda andenyi ya waza ya nandenyi, ngawona ugho wubaa ghwa BWANA ghwachura Hekalu yose.

⁶Uja mundu ukakaia kimusi kaavui nani, ngasikira BWANA ukidedanya nani kufuma Hekalunyi;

⁷ukanizera, “Mwana wa mdamu, aha ni andu kwa kifumbi chapo cha nguma, sena ni andu kowikiria chwau rapo, andu nichaakaia aghadi ya wandu wa Israeli kwa kala na kala. Wandu wa Israeli chiaimweri na wazuri wawo, ndewichaajilusha irina japo kwa kutasa milimu yawo sena, angu kwa kurika gharia ra wazuri wawo aha;

⁸angu kwa kuwika kizingiti cha mnyango ghwawo kaavui na kizingiti cha mnyango ghwapo, na minyango yawo kaavui na minyango ya Hekalu yapo; nao ghuasigharika wurigha tu aghadi yawo na ini. Wamerie kujilusha irina japo ja wueli kwa wuwiwi ghwawo wereghubonyereghe, nani ngawimeria kwa machu ghapo.

⁹Idana ndewisighe kutasa milimu kwawo na kurika gharia ra wazuri wawo aha; iro maza wiriwike kula nani, nani nichakaia aghadi kwawo kwa kala na kala.”

¹⁰BWANA ukachuria kughora, “Na oho mwana wa mdamu, kuwighorie wandu wa Israeli maza ra Hekalu, sena wikufundishe mchoro ghwaro wimanye seji ifwane; wipate kufushwa waya ni agho mabonyo ghawo ghizamie.

¹¹Na ikakaia wafwa waya kwa wundu ghwa agho ghose wibonyere, kuwiwonyere mchoro ghwa Hekalu, na mipango yaro andu kofumia na andu kongiria, na mfwano ghwaro ghose; nao kuwifundishe memu na sharia raro rose, sena kuriandike imbiri kwawo; wipate kurizighana na kurishoma na kukufundisha iyo memu na sharia raro, na kurikatisha.

¹²Ihi niyo sharia ya Hekalu, kiwacha chose kufuma mghondinyi chichakaia cha wueli nandighi. Ola ihi niyo sharia ya Hekalu.

¹³“Ivi nivo vichaakaia vipimo va madhabahu; kukitumia vipimo vija veni vitumilo kwa kupima Hekalu. Iyo madhabahu nandonyi kwaro kuchakaia na vipimo va sentimeta mirongo misanu wuighu na sentimeta mirongo misanu wushapa. Mkele ghwa shighadi ghwa naighu sentimeta mirongo iwi na isanu wuighu kuimara chia rose.

¹⁴Kufuma nandonyi kwaro hata momu ghwa isi ni meta imweri, na wushapa ghwa sentimeta mirongo misanu; na kufuma momu mtini hata momu m'baa ni meta iwi, na wushapa ghwa sentimeta mirongo misanu.

¹⁵Naighu ya madhabahu, aho vizongona vikorelwagha, erekoghe na wuighu ghwa meta iwi. Kufuma aho koredungiloghe na mbembe inya ra madhabahu.

¹⁶Aho naighu ya madhabahu, andu vizongona vikorelwagha, kuchakaia na wulacha ghukatane na wushapa, meta irandadu kwa irandadu.

¹⁷Momu ghwa madhabahu ghuchakaia ghukatane meta mfungade kwa mfungade, na mkele ghwaro ghwa sentimeta mirongo iwi na isanu. Nandonyi kwaro kuchakaia na wurifu ghwa sentimeta mirongo misanu kumara chia rose. Viluwatiro vejokia vichakaia luwaru lwa mashariki.”

¹⁸Nao uja mundu ukanizera, “Mwana wa mdamu, Bwana MLUNGU waghamba huwu, Iri niro sharia ra madhabahu: Ngelo yakaia tayari kwa kufunya vizongona vekora aighu yaro, na kumichirwa bagha,

¹⁹kuchamneka mkohani umu wa Kilawi ufumagha kwa kivalwa cha Zadoku njau ya kizongona kwa wundu ghwa kaung'a; uo nuo uchaanisoghodera kwa wudumiki, ini Bwana MLUNGU naghamba.

²⁰Na oho kuchawada bagha imu na kuishinga aighu ya mbembe inya ra madhabahu na kona raro, na ugho mkele ghuimarie chia rose; kwa chia iyo, kuchaielesha madhabahu na kuiwika wakfu.

²¹Wokoni sena kuchawada njau ya kizongona kwa wundu ghwa kaung'a, nayo ichakorelwa andu kumu kusaghulo kwa Hekalu cha shighadi ya andu kueleshero.

²²Ituku ja kawi kuchafunya fwandi iseko na itiko jingi, ikaie kizongona kwa wundu ghwa kaung'a, na madhabahu ichaeleshwa sa iji koni ereelesheroghe na kizongona cha njau.

²³Kukameria kuielesha madhabahu, kuchafunya njau iseko na itiko jingi, na bauru iseko na itiko jingi kufuma chaghenyi.

²⁴Oho kucharireda imbiri ya BWANA; na wakohani wicharinyinyiria chumbi, na kurifunya rikaie kizongona chekora kwa BWANA.

²⁵Kula ituku kuchafunya mburi imweri kufuma chaghenyi, na njau imweri na bauru imweri, risewadie itiko jingi, rikaie kizongona kwa wundu ghwa kaung'a kwa matuku mfungade.

²⁶Wichaibonyera madhabahu wukomboli na kuielesha kwa matuku mfungade, na huwo wichaiwika wakfu.

²⁷Wikameria kukatisha agho matuku, kufuma ituku ja wunyanya na matuku mazima ghose, mkohani uchakaia ukifunya vizongona aho madhabahunyi; vizongona venyu vekora na va mapatano, nani nichamrumiria, ini Bwana MLUNGU naghamba.”