Read TAITA BIBLE – Biblia Ilagho Jiboie Kwa Wandu Wose EZEKIELI 44 Bible Online

EZEKIELI 44 - TAITA BIBLE – Biblia Ilagho Jiboie Kwa Wandu Wose bible

EZEKIELI 44

¹Niko uo mundu ukaniwunja aho mbengenyi ya shighadi ya Hekalu ilangayagha cha mashariki, nayo erekoghe irughie.

²Nao BWANA ukanizera, “Mbenge ihi ichakaia irughie ndeichaarughulwa, hata mndungi ndechaangia kwa kuidia aho; kwa kukaia ini BWANA, Mlungu wa Israeli, nerengirieghe kwa kuidia aho; kwa huwo ichakaia irughie.

³M'baa wa isanga uekeri nuo udimagha kusea kidombo aho uje vindo va wueli imbiri kwapo. Uchangiria mnyango ghwa chumba cha lukumbinyi na kufuma kwa ugho mnyango ghoni.”

⁴Niko uo mundu ukanireda kwa chia ya mbenge ya kaskazinyi, na kuniwika imbiri ya Hekalu; hata iji nerekoghe ngizighana, ngawona wubaa ghwa BWANA ghwaichura Hekalu yake; nani ngaghwa kiwushu wushu.

⁵Nao BWANA ukanizera, “Mwana wa mdamu, Zighana kulindie iri maza rose kuchaariwona na kurisikira kufuma kwapo, iro nichaakughoria aighu ya memu na sharia ra Hekalu. Zighana kulindie awo wichaarumirilwa kungia na kufuma andenyi ya Hekalu, na awo wichaaghirilwa wisengie aho Hekalunyi.

⁶Nao kuwizere awo waleghi, kukaia ini, Bwana MLUNGU naghamba wileke mawiwi ghawo ghose.

⁷Wawuyarumiria wandu wa kighenyi wiseshamishiro, hata wisenisikiragha, kungia andenyi ya Hekalu yapo na kuilusha, ingelo munifunyiragha vindo vapo, mavuda na bagha. Aho mwajichikanyire ilaghano japo, mkichuria ugho wuchafu ghonyu ghose.

⁸Ndemuvilindirie vilambo vapo va wueli, ela moowiwika waghenyi wikaie walindiri waro andenyi ya Hekalu yapo.

⁹“Kwa huwo, ini Bwana MLUNGU naghamba: Mghenyi ungi useshamishiro hata usenisikiragha, wiko aghadi ya wandu wa Israeli, ndeuchaangia Hekalunyi kwapo anduangi.

¹⁰“Ela Walawi, awo wereghendieghe kula nani, wikinisigha na kunugha milimu yawo ingelo wandu wa Israeli werelagharieghe chia, wichakabwa.

¹¹Wichanidumikia Hekalunyi kwa kulindia mbenge, na kudumika kwa kazi ra Hekalu. Wichabwaghia wandu nyamandu ra vizongona vekora, na vizongona vizima na kuwidumikia.

¹²Kwa kukaia werekoghe wikiwidumikia ingelo weretasagha milimu yawo, wikawikuwisha wandu wa Israeli kwa wuwiwi ghwawo, ini Bwana MLUNGU naghemie aighu yawo kukaia, wichakabwa.

¹³Ndewichaacha kaavui nani kunidumikia sa wakohani, hata ndewichaavisoghodera vilambo va wueli na vilambo va wueli vichumbie; ela wichaduka waya ghwawo kwa wundu ghwa ugho wuchafu wighubonyere.

¹⁴Ela sena nichawineka kazi elindia Hekalu, kubonya wudumiki ghwaro ghose, na iro kazi rikundikie kubonywa aho.

¹⁵“Ela wakohani wa Kilawi, icho kivalwa cha Zadoku, werelindirieghe Hekalu yapo ingelo wandu wa Israeli werenisighieghe na kunilegha, awo wichanisoghodera na kunidumikia; wichanichea na kunifunyira mavuda na bagha, Ini Bwana MLUNGU naghamba.

¹⁶Wichangia andenyi ya Hekalu yapo, na kuisoghodera meza yapo, wipate kunidumikia; nawo wichalindia mawiko ghapo.

¹⁷Iji wakangia mbengenyi ya waza ya nandenyi, wicharwa marwao gha kitani, ndewichaarwa marwao gha sufi iji wakadumika mbengenyi hata kondenyi wazenyi, na Hekalunyi.

¹⁸Wicharwa viremba va kitani, wicharwa na weke mwadeghu wa kitani; ndewichaakufunga kindo chingi kiwonunyi chewibonya wirughudie.

¹⁹Na iji wakafuma cha waza ya shighadi wandunyi, wicharua iro nguwo wadumikagha naro, na kuriwika andenyi ya vumba va wueli, na kurwa nguwo zima, eri wisakekuranganya na wandu wikikaia na marwao gha wueli, ghisecheshoghonua wandu kwa kuwibonya wandu wiadade vilambo va wueli.[9]

²⁰“Wakohani wiseare vongo vawo, angu kusigha maridia ghawo ghikaie malacha, ela wichakaia wikighidumbua.

²¹Mkohani ungi usenyo divei ingelo wakangia waza ya nandenyi.

²²Wakohani wiselowuo muka ufuilo angu uleghelo; ela wichalowua wai wa wandu wa Israeli, angu muka ufuilo ni mumi uko mkohani.

²³Wichafundisha wandu wapo wuchumbano ghwa maza ra wueli na iro riseko ra wueli sena wichawifundisha kutambua maza ra wuchafu na maza ra wueli.

²⁴Kukakaia na nganyi ingi wandunyi, Wakohani wichatanya maza iro kunughana na sharia rapo. Wichawadia malaghiro ghapo na aighu ya ndima rapo rose riwikilo, na kurielesha Sabato rapo.

²⁵“Wakohani wisekulushe kwa kuwada gharia, angu kusoghodera mundu ufue; elaima wadima kukulusha kwa gharia ra weke ndee, na weke mae, wana wawo wa womi na wa waka, na waruna wa womi na waruna wa waka wiselowolo.

²⁶Nyuma ya kueleshwa, uchawesera matuku mfungade.

²⁷Ituku uchaangia Andu kwa Wueli, andenyi ya waza ya nandenyi kudumika, uchafunya kizongona kwa wundu ghwa kaung'a rake, Ini Bwana MLUNGU naghamba.”

²⁸“Wakohani ndewichaakaia na ifwa jingi; ini nimoni nichakaia ifwa jawo, nenyo ndemchaawiwaghia ifwa jingi andenyi ya Israeli; kwa kukaia, ini nichakaia ifwa jawo.

²⁹Wichaja vizongona va viro, na vizongona vifunyiro kwa wundu ghwa kaung'a, na mafunyo kwa wundu ghwa makosa, na kula kilambo cha Waisraeli chifunyiro kwa Mlungu chichakaia chawo.

³⁰Mavalo gha imbiri gha makuwido ghose gha mbari rose, na mafunyo gha mbari rose gha mafunyo ghako ghichawuya gha wakohani; na vindo vako va imbiri kwavideka, kuchamneka mkohani; eri marasimio ghiduo nyumbenyi kwako.

³¹Wakohani ndewichaaja kindo chingi chifue cheni ikaiagha ni nyonyi angu nyamandu, hata ngera eebwaghwa ni mmbao.