Read TAITA BIBLE – Biblia Ilagho Jiboie Kwa Wandu Wose EZEKIELI 46 Bible Online

EZEKIELI 46 - TAITA BIBLE – Biblia Ilagho Jiboie Kwa Wandu Wose bible

EZEKIELI 46

¹Bwana MLUNGU waghamba huwu, “Mbenge ya waza ya nandenyi, iyo ilangayagha cha mashariki, ichakaia irughie kwa matuku arandadu ghebonya kazi; ela ituku ja Sabato na ituku ja Ndima ya Mori Lukombe icharughulwa.

²M'baa wa isanga uchangiria mnyango ghwa lukumbi lwa shighadi, nao uchakaia kimusi a vizingitinyi va mbengenyi; na wakohani wichafunya kizongona chake chekora, na vizongona vake va mapatano, nao uchamtasa BWANA aho kizingitinyi cha mbengenyi. Niko uchafuma shighadi, ela mbenge ichakaia iari hata luma lwa kenyi.

³Wandu wa isanga wichatasira ahoeni mbengenyi imbiri ya BWANA matuku gha Sabato na matuku gha Ndima ya Mori Lukombe.

⁴Ivo vizongona vekora, m'baa wa isanga uchaavifunya kwa BWANA ituku ja Sabato, vichakaia wana wa ng'ondi warandadu wiseko na itiko jingi, na bauru iseko na itiko jingi;

⁵Uchafunya lita ikumi na mfungade na nusu ra viro kwa kula bauru; na kwa kula mwana wa ng'ondi umweri, uchafunya seji uchaadima, chiaimweri na lita idadu ra mavuda kwa kula lita ikumi na mfungade na nusu ra viro.

⁶Ituku ibaa ja Ndima ya Mori Lukombe, uchafunya mwana wa njau, na wana wa ng'ondi warandadu, na bauru; rose riseko na itiko jingi.

⁷Uchafunya lita ikumi na mfungade na nusu ra viro kwa kula njau, na kwa kula bauru. Kwa kula mwana wa ng'ondi, uchafunya seji uchaadima, chiaimweri na lita idadu ra mavuda kwa kula lita ikumi na mfungade na nusu ra viro.

⁸M'baa wa isanga ukakangia, uchatumia mnyango ghwa lukumbi lwa shighadi, sena uchafuma kwa mnyango ugho ghoni.

⁹“Iji wandu wa isanga wacha kumtasa BWANA ngelo ra ndima rilaghirilo, uo ose uchaangia na mbenge ya kaskazinyi kumtasa BWANA, ngelo efuma uchatumia mbenge ya kusinyi; na uo ungiagha na mbenge ya kusinyi, uchafuma na mbenge ya kaskazinyi. Mndungi ndechaafuma kwa chia ya ija mbenge cheni wangiria, ela ukangia uchaghenda kiimbiri ukifuma.

¹⁰Wichangianya na m'baa wa isanga, na kufumanya nao.

¹¹Ngelo ra ndima, na vimu vilaghirilo, viro vifunywagha chiaimweri na njau angu na bauru, vichakaia va lita ikumi na mfungade na nusu; na ivo vifunywagha chiaimweri na wana wa ng'ondi, wichafunya seji wichaadima, chiaimweri na lita idadu ra mavuda kwa kula lita ikumi na mfungade na nusu ra viro.

¹²“Iji m'baa wa isanga wakunda kufunya mafunyo kwa kukunda kwake moni, ikaiagha ni vizongona vekora, angu va mapatano, vifunywagha kwa BWANA kwa kukunda, mbenge ya chia ya mashariki icharughulwa kwa wundu ghwake, nao uchafunya kizongona chake chekora angu cha mapatano sa iji koni ubonyagha ngelo ya Sabato. Niko uchafuma, na nyuma ya kufuma, mbenge icharughwa.”

¹³BWANA waghamba, “Kuchafunya mwana wa ng'ondi wa mwaka ghumweri useko na itiko jingi kula ituku, upate kukaia kizongona chekora kwa BWANA; kuchamfunya kula ituku luma lwa nakesho.

¹⁴Wokoni kuchafunya kizongona cha viro andwamweri nacho kula luma lwa nakesho cha kilo iwi ra mufu, na lita imweri ya mavuda gheranganya ugho mufu; ghikaie mafunyo gha viro kwa BWANA. Ihi ni sharia ya toe efunya vizongona vekora va ituku ituku.

¹⁵Huwo mwana wa ng'ondi, na vindo vifunyiro, na mavuda vichakaia vikifunywa kula nakesho, vikaie vizongona vekora va ituku ituku.”

¹⁶Bwana MLUNGU waghamba huwu, “M'baa wa isanga ukaneka umu wa wana wake ndoe ya ifwa ja isanga jake, iyo ndoe ichadua yake na wana wake, ni ifungu ja ifwa jawo;

¹⁷ela ukaneka umu wa wadumiki wake ndoe kufuma kwa jija ifwa ja isanga jake, ichakaia yake hata ituku jija ja wuhuru ghwake; niko ndoe ija ichawuya kwa m'baa wa isanga. Ni wana wake wiekeri widimagha kukaia na inosi ja mbuwa ya ifwa jake.

¹⁸M'baa wa isanga ndechaasoka wandu wa isanga mafwa ghawo, angu kuwikoronga kwa wundu ghwa mali rawo, ela uchaneka wana wake ifwa kufumanya na mali rake reni, eri mndungi wa wandu wapo usechetanywa na ifwa jake.”

¹⁹Niko uja mundu ukanidwa na kuniisa na chia iko mbai na mbai ya mbenge engiria vumba va wueli chia ya kaskazinyi, viwikilo kwa wundu ghwa wakohani; na aho ngawona andu kumu kula na ivo vumba chia ya magharibi kutuonyi kwaro.

²⁰Nao ukanizera, “Aha ni andu wakohani wichaadoghosera vizongona kwa wundu ghwa makosa na kaung'a, na kuocha mafunyo gha viro, eri kulindia visefunyo waza ya shighadi vicheshoghonua wandu kwa kuwibonya wiadade vindo va wueli.”

²¹Niko ukanidwa shwa-shwa hata waza ya shighadi, ukanighenja kwa kona inya ra iyo waza, na andenyi ya kula kona korekoghe na waza imu.

²²Waza iro ndini rerekoghe konenyi, rerekoghe na wulacha ghwa meta mirongo iwi, na wushapa ghwa meta ikumi na isanu. Iro waza ndini rose redekatana.

²³Andenyi ya kula waza ndini, korekoghe na wurigha ghwa magho kuimara waza, kula imu erekoghe na andu kokoria modo awurighenyi.

²⁴Nao uo mundu ukanizera, “Agha ni mariko andu wadumiki wa Hekalu wichaadoghosa vizongona vafunywa ni wandu.”