Read TAITA BIBLE – Biblia Ilagho Jiboie Kwa Wandu Wose EZEKIELI 48 Bible Online

EZEKIELI 48 - TAITA BIBLE – Biblia Ilagho Jiboie Kwa Wandu Wose bible

EZEKIELI 48

¹“Agho nigho marina gha ivo vichuku viwangilwagha isanga: Dani uchapata ifungu jimweri cha kaskazinyi huwu: Mpaka ghwake ghuchanugha chia ya Hethloni hata kungia Hamathi. Hazari Enani na mpaka ghwa kaskazinyi ghwa Dameshki kaavui na Hamathi, jichakaia ifungu jake kufuma mashariki hata magharibi.

²Asheri uchapata ifungu jimweri. Mwano ghwake ghuchaanana na Dani kufuma mashariki hata magharibi.

³Naftali uchapata ifungu jimweri. Mwano ghwake ghuchaanana na Asheri mashariki hata magharibi.

⁴Manase uchapata ifungu jimweri. Mwano ghwake ghuchaanana na Naftali magharibi.

⁵Efraimu uchapata ifungu jimweri. Mwano ghwake ghuchaanana na Manase hata magharibi.

⁶Reubeni uchapata ifungu jimweri. Mwano ghwake ghuchaanana na Efraimu mashariki hata magharibi.

⁷Juda uchapata ifungu jimweri. Mwano ghwake ghuchaanana na Reubeni mashariki hata magharibi.

⁸“Mchafunya ifungu jimu ja isanga jiananagha na Juda kufuma mashariki hata magharibi. Jichakaia na wushapa ghwa kilometa ikumi na iwi na nusu, na wulacha ghwaro ghuchakatanishwa na ghuja ghwa mafungu ghiwaghilo vichuku kufuma mashariki hata magharibi. Hekalu ichakaia ghadi na ghadi.

⁹Ifungu mchaajifunya kwa Bwana jichakaia kilometa ikumi na iwi na nusu kwa ikumi.

¹⁰Ifungu ja wueli kwa wundu ghwa Wakohani jichakaia kilometa ikumi na iwi na nusu kufuma mashariki hata magharibi, na kilometa isanu kufuma kaskazinyi hata kusinyi. Hekalu ya BWANA ikikaia aghadi na ghadi.

¹¹Isanga iji jichakaia ja wakohani wiwikilo wakfu wa kivalwa cha Zadoku; awo wilindirie mawiko ghapo, hata ndewereghalukieghe nambai wa Walawi ingelo wandu wa Israeli wereghalukieghe nambai.

¹²Isanga ijo jichakaia ifungu jawo winekelo kufuma kwa ijo ifungu ja wueli jichumbie, jianane na Walawi.

¹³Walawi wichawaghilwa isanga ja wulacha ghwa kilometa ikumi na iwi na nusu na wushapa ghwa kilometa isanu.

¹⁴Ndewichaajiuza angu kujibadilisha hata kuwineka wandu wazima; ni isanga jiboie kuchumba, angu ni ja wueli, jisaghulo kwa wundu ghwa BWANA.

¹⁵“Ijo isanga jisigharikie ja wushapa ghwa kilometa iwi na nusu na wulacha ghwa kilometa ikumi na iwi na nusu, jichakaia kwa matumizi gha wandu wose wa muzi. Ifungu jimu jikailo ni wandu na jimu jikaie huru. Muzi ghuchakaia ghadi na ghadi.

¹⁶Vipimo varo vichakaia huwu: ii chia cha kaskazinyi, meta elfu iwi maghana awi na mirongo misanu, ii chia cha kusinyi, meta elfu iwi maghana awi na mirongo misanu; ii chia cha mashariki, meta elfu iwi maghana awi na mirongo misanu; na ii chia cha magharibi, meta elfu iwi na maghana awi na mirongo misanu.

¹⁷Ugho muzi ghuchakaia na andu kuko huru huwu: ii chia cha kaskazinyi, meta ighana mirongo iwi na isanu, ii chia cha kusinyi, meta ighana mirongo iwi na isanu; ii chia cha mashariki, meta ighana na mirongo iwi na isanu, na ii chia cha magharibi, meta ighana na mirongo iwi na isanu.

¹⁸Isanga jisigharikie, kaavui na ifungu ja wueli, jichakaia na wulacha ghwa kilometa isanu ii chia cha mashariki, na kilometa isanu ii chia cha magharibi. Mavalo gha isanga ijo ghichakaia vindo va wabonyi kazi wa muzi.

¹⁹Wandu wa kazi wa muzi wose, wifumagha kwa vichuku vose va Israeli, wichailima iyo ndoe.

²⁰“Ifungu jose ja isanga jifunyiro, jichakaia na wulacha ghukatane na wushapa ghwa kilometa ikumi na iwi na nusu kwa ikumi na iwi na nusu; aho ni chiaimweri na muzi.

²¹“Masighariko ghose gha isanga ja wueli na ja muzi ghichawuya gha m'baa wa isanga. Kushabuka kwa isanga ja wueli kuchakaia kilometa ikumi na iwi na nusu ii chia cha mashariki hata kutuonyi kwa mpaka; na kilometa ikumi na iwi na nusu iichia cha magharibi hata kutuonyi kwa mpaka. Isanga iji jose jikatane wulacha na ja ivo vichuku, jichawuya ja m'baa wa isanga, na Hekalu ikikaia ghadi na ghadi yaro.

²²Iwaghio ja Walawi na iwaghio ja muzi jichakaia ghadi na ghadi ya ijo isanga ja m'baa wa isanga. Ifungu ja m'baa wa isanga jichakaia ghadi na ghadi ya isanga ja Juda na ja Benjamini.

²³“Kwa wundu ghwa ivo vichuku visigharikie wisewaghilo isanga: Benjamini uchapata ifungu jimweri kufuma mashariki hata magharibi.

²⁴Simeoni uchapata ifungu jimweri. Mwano ghwake ghuchaanana na Benjamini kufuma mashariki hata magharibi.

²⁵Isakari uchapata ifungu jimweri. Mwano ghwake ghuchaanana na Simeoni kufuma mashariki hata magharibi.

²⁶Zebluni uchapata ifungu jimweri. Mwano ghwake ghuchaanana na Isakari kufuma mashariki hata magharibi.

²⁷Gadi uchapata ifungu jimweri. Mwano ghwake ghuchaanana na Zebluni kufuma mashariki hata magharibi.

²⁸Mpaka ghwa Gadi ghwa kusinyi ghuchazoia Tamari na kughenda noko cha kusinyi, hata machi gha Meribath-kadeshi na kaavui na Kamoda ka Misri, hata bahari ya Mediterania.

²⁹Iji nijo isanga mchaajiwagha jikaie ifwa aghadi ya vichuku va Israeli, na agho nigho mafungu ghawo. Ini Bwana MLUNGU naghamba.

³⁰“Mbenge refumia ra muzi gwa Jerusalemu richakaia huwu: Ii chia cha kaskazinyi kuko na kipimo cha wulacha ghwa meta elfu iwi maghana awi mirongo misanu,

³¹kuchakaia na mbenge idadu richaawangwa, mbenge ya Reubeni, na mbenge ya Juda, na mbenge ya Lawi, kunughana na marina gha vichuku va Israeli.

³²Ii chia cha mashariki kuko na kipimo cha wulacha ghwa meta elfu iwi maghana awi na mirongo misanu, kuchakaia na mbenge idadu, richaawangwa, mbenge ya Josefu, na mbenge ya Benjamini, na mbenge ya Dani.

³³Ii chia cha kusinyi, kuko na kipimo cha wulacha ghwa meta elfu iwi maghana awi na mirongo misanu, kuchakaia na mbenge idadu richaawangwa, mbenge ya Simeoni, na mbenge ya Isakari, na mbenge ya Zebluni.

³⁴Ii chia cha magharibi, kuko na kipimo cha wulacha ghwa meta elfu iwi maghana awi na mirongo misanu, kuchakaia na mbenge idadu richaawangwa, mbenge ya Gadi, na mbenge ya Asheri, na mbenge ya Naftali.

³⁵Kipimo cheghumara muzi ghose chia rose inya ni meta elfu ikenda, na irina ja ugho muzi kufuma ngelo iyo, ni BWANA-Oko-Aha.”