Read TAITA BIBLE – Biblia Ilagho Jiboie Kwa Wandu Wose EZEKIELI 5 Bible Online

EZEKIELI 5 - TAITA BIBLE – Biblia Ilagho Jiboie Kwa Wandu Wose bible

EZEKIELI 5

¹“Na oho ee mwana wa mdamu, wada lufu lukalie, kulutumie sa shembe ya kinyozi, nao kuare iridia jako na sombe rako. Kupime iridia jako na ratili kupate kujiwagha mafungu adadu.

²Ifungu ja kadadu ja ijo iridia kuchajikora ghadi na ghadi ya muzi, iji matuku gha kurughailwa ghakatia. Ifungu jimu ja kadadu, kuchakaia kukijidumbua-dumbua na lufu kukimara mara mzinyi; na ifungu jimu ja kadadu kuchajikumba nokoighu jisasaro ni mbeo, nani nichawiwinga kwa lufu.

³Ela kuwade iridia itini, kujifunge kidambinyi cha nguwo yako.

⁴Kufuma kwa ijo iridia itini, kufunye jimu kujikumbe modonyi jihie putu. Kufuma aho modo ghuchacha na kuikora mbari yose ya Israeli.”

⁵Bwana MLUNGU waghamba huwu, “Wona Jerusalemu, muzi nighuwikie ghadi na ghadi ya iro mbari ra wandu, na masanga ghighumare chia rose.

⁶Ela wandu wa Jerusalemu wikailegha memu yapo, wikakuwonyera weni kukaia wawiwi kuchumba iro mbari ra wandu kwa kulegha malaghiro ghapo kuchumba wandu wa masanga agho ghighumarie ugho muzi; wikailegha memu na malaghiro ghapo.

⁷Sikira Jerusalemu seji ini Bwana MLUNGU nighoragha: Kwa kukaia kwaleghie kusikira malaghiro ghapo na sharia rapo, kwawuya mundu osumbua kuchumba mbari ra wandu rikumarie chia rose. Kwanughie mizango ya iro mbari ra wandu.

⁸Kwa huwo ini, Bwana MLUNGU nakaia m'maiza wako, nichakutanya iro mbari ra wandu rikiwona.

⁹Na kwa wundu ghwa wuchafu ghwako ghose kubonyere, nichakubonya maza jingi niseribonyere, sena nisechaaribonya jingi.

¹⁰Nichawibonya weke aba wije wana wawo, na wana wije weke ndee aghadi konyu; nani nichareda kutanya aighu yenyu. Na wangi wenyu wichaasigharika, nichawisasara noko.

¹¹“Kwa wundu ugho, sa iji nikaiagha moyo, kwa loli angu kukulushire Andu Kwapo kwa Wueli na maza rako rizamie, na wuchafu ghwako ghose; nichakuinja hata nisekuwonie wughoma, hata sichaakulekia.

¹²Ifungu jenyu ja kadadu, jichafwa kwa saka izamie na kumerelwa ni njala aghadi konyu; na ifungu jimu ja kadadu jichafwa kwa wuda ghwa lufu ghuchaammara chia rose; na ifungu jimu ja kadadu nichajisasara andu kose, na kuwinugha nyuma kwa wuda ghwa lufu.

¹³“Huwo niko machu ghapo ghichaakatia, na kuwonyera lubio lwapo aighu yawo hata nikato; nawo wichamanya kukaia ini BWANA nadaghora na kukatisha kwa wundu ghwa iriso japo, ingelo nakatisha lubio lwapo aighu yawo.

¹⁴Aighu ya agho, nichakubonya kukaie mduu, osholelwa ni mbari rose ra wandu rikumarie chia rose, na kula mundu uidagha chienyi.

¹⁵Kuchasholelwa na kusekwa; kuchaobolwa na kusekwa; kuchaobolwa na kuwuya ifundisho kwa iro mbari ra wandu rikumarie chia rose, ingelo nichaakutanya kwa machu na kubia, nani nichakuwunja kwa kubia, ini BWANA naghamba.

¹⁶Nichakuredia njala ikaie sa mawanu ghapo ghekubwagha na kukunona, iyo nichaaireda ekunona oho. Nichachuria kureda njala aighu yako, na kuinja vindo vako.

¹⁷Nichakuredia njala, na kukuredia nyamandu ra isakenyi, ripate kubwagha wana wako; nichareda saka izamie, na bagha ichadika kwa wundu ghwa wuda nichaareda aighu yako; ini BWANA naghamba.”