Read TAITA BIBLE – Biblia Ilagho Jiboie Kwa Wandu Wose EZEKIELI 7 Bible Online

EZEKIELI 7 - TAITA BIBLE – Biblia Ilagho Jiboie Kwa Wandu Wose bible

EZEKIELI 7

¹BWANA oreghorieghe nani ukighamba,

²“Na oho ee mwana wa mdamu, Bwana MLUNGU waghora huwu aighu ya isanga ja Israeli, Ni kutua! Kutua kwameria isanga jose.

³Idana kutua kwameria kukuvikia ee Israeli; nani nichakubonyera machu, na kukutanya karakara na mabonyo ghako; nichakukaba kwa wundu ghwa wuchafu ghwako.

⁴Sichaakuwonia wughoma hata kukulekia anduangi; ela nichakukaba kwa wundu ghwa mabonyo ghako ingelo kuko na wuchafu ghwako. Niko kuchaamanya kukaia ini ne BWANA.”

⁵Bwana MLUNGU waghamba huwu, “Wona wasi aighu ya wasi ghwaawuyacha.

⁶Ola kutua kwameria kuvika, kwameria kuvika nako kukuredia wasi.

⁷Wandu mkaiagha isangenyi, mwachelwa ni mashaka; ngelo yalighisa, eko kaavui; ni ituku ja ndoghoi iseko ya maboilo ghibonywagha aighu mighondinyi.

⁸“Idana nalighisa kuwonyera machu ghapo na kutanya kwapo kunughana na mabonyo ghenyu; nani nichamkaba kwa wundu ghwa wuchafu ghonyu ghose.

⁹Sichaakuwonia wughoma hata kukulekia anduangi; ela nichakukaba kwa wundu ghwa mabonyo ghako, ingelo kuko na wuchafu ghwako. Niko kuchaamanya angu ini ne BWANA uo ukukabagha.

¹⁰“Zighana ijo ituku! Ola hejo jiacha! Mashaka ghako ghameria kucha, hachi yasoweka, lubando lwawoneka worinyi.

¹¹Lung'eto lwachurikia lukawuya ikabo ja wuwiwi, hata ungi wawo ndechaasigharika, hata wungi ghwa wandu wawo, na mali rawo, hata kilambo chingi chiboie kuchumba aghadi kwawo.

¹²Ngelo yavika, ituku jakaia kaavui. Uo ughuagha useboilo, na uo uuzagha usekaie na wasi, angu machu ghapo ghichawichea wose.

¹³Kwa kukaia uo uuzagha ndechaawuria ivo uviuzire, ingelo wiko moyo; angu machu ghapo ghichaawichea wose, hata ndeghichaaghaluka anduangi, na kwa wundu ghwa wuwiwi ghwawo, mndungi ndechaakira irangi jake anduangi.

¹⁴Wakaba tarumbeta, na kuwika wandu wose nicha kwa wuda; ela ndekuwadie mndungi wawuyaghenda wudenyi, angu machu ghapo ghakaia aighu yawo wose.

¹⁵“Cha shighadi ni wuda ghwa lufu, na cha nandenyi ni saka izamie na njala. Uo uko cha mbuwenyi uchabwaghwa kwa lufu, na uhu uko mzinyi uamerelwa ni njala na saka izamie.

¹⁶Na wandu wangi wisigharikagha na kufufunuka, wichakaia aighu mighondinyi sa mbughi ra vololonyi, wikikulilia weni kwa wundu ghwa makosa ghawo.

¹⁷Mikonu yose ichateweleka, na vitemberu vose vichaselwa ni mbogha sa machi.

¹⁸Wachulwa ni kiture, na kuwona waya; wakufunga weni nguwo ra magunia, na kuara vongo vawo kwa wasi.

¹⁹Wakumba feza rawo achienyi na dhahabu rawo rakaia sa kilambo cha wuchafu. Feza na dhahabu rawo nderidimagha kuwikira ngelo ya machu ghapo, nderiwirediagha kukatwa hata nderighudishagha vifu vawo anduangi; angu rawurie makuwisho kwa wundu ghwa mawiwi ghawo.

²⁰Werekukasireghe duu na mapambo ghawo ghighokie, wikabonya nagho milimu yawo ya wuchafu; kwa huwo nichaghighalua ghiwuye kilambo chiseelie kwawo.

²¹“Nani nichavifunya ivo vilambo vawo kwa waghenyi, wipate kuvidwa wunyika, na kwa wandu wawiwi wa ndoenyi wiviwuse; nawo wichavilusha.

²²Nichalangaya noko nisewizighane, eri awo wandu wawiwi wipate kuilusha Hekalu yapo; viting'a vichangia na kuilusha.

²³Boisenyi minyororo, kwa kukaia isanga jachulwa ni kudia bagha, na muzi ghwachulwa ni makorongo.

²⁴Nichareda mbari ya wandu wizamie kuchumba, wipate kuriwusa nyumba rawo, na kunyamirisha uko kukukasa kwawo na kudima kwawo, na kukulusha andu kwawo kuelie.

²⁵Wikachelwa ni kuwawa kubaa, wichalola sere, ela ndewichaaiwona anduangi.

²⁶Wasi ghwaawuyacha aighu ya wasi, na malagho aighu ya malagho; wichalola wufunuo ghungi kufuma kwa mlodi, ela wakohani wichakaia walaghalwa ni sharia, na waghosi kulaghalwa ni njama.

²⁷Mzuri uchalila, na m'baa uchafwa ngolo, na mikonu ya wandu wa isangenyi ichateweleka kwa wowa. Nichawibonyera kara kara na mabonyo ghawo, na kuwitanya karakara na kutanya kwawo koni; nawo wichamanya kukaia ini ne BWANA.”