Read TAITA BIBLE – Biblia Ilagho Jiboie Kwa Wandu Wose EZEKIELI 8 Bible Online

EZEKIELI 8 - TAITA BIBLE – Biblia Ilagho Jiboie Kwa Wandu Wose bible

EZEKIELI 8

¹Ituku ja kasanu ja mori ghwa karandadu, mwaka ghwa karandadu ghwa kudwalwa wunyika kodu, iji nerekoghe kidombo nyumbenyi kwapo, chiaimweri na waghosi wa Juda wiko kidombo imbiri kwapo, neresikireghe wulemeri ghwa ndighi ra Bwana MLUNGU.

²Niko nerezighanireghe, ngawona kindo chimu chiko na fwana sa ya mdamu. Nandonyi, andu korewonekagha sa kiwonu chake, korewonekieghe sa modo; na naighu ya kiwonu chake, korewonekieghe kung'ala-ng'ala kumu sa kwa shaba izughulo.

³Ukaghorua icho cherewonekieghe sa mkonu, ukaniwada iridia japo. Roho wa Mlungu ukaniwusira nokoighu ghadi na ghadi ya ndoenyi na mlungunyi. Nani ngikaia andenyi ya mawono gha Mlungu, ukanidwa hata Jerusalemu aho andu kongiria kwa chia ya mbengenyi ya waza ya ndenyi ya Hekalu, ilangayagha cha kaskazinyi. Aho korekoghe na mlimu ghowasira Mlungu iriso ja wandu wake.

⁴Nao ola wubaa ghwa Mlungu wa Israeli ghorekoghe aho, karakara na agho mawono nereghiwonieghe aho kirindinyi Moda ghwa Kebari.

⁵Mlungu ukanizera, “Mwana wa mdamu, zighana cha kaskazinyi.” Niendazighana, ngawona aho mbengenyi kaskazinyi ya madhabahu ghuja mlimu ghowasira Mlungu iriso ja wandu wake.

⁶Mlungu ukanizera, “Mwana wa mdamu, kwawona seji wibonyagha? Wandu wa Israeli wawuyabonya wuchafu m'baa ghonifunya na kuniwika kula na Andu Kwapo kwa Wueli. Ela kuchawona wuchafu m'baa kuchumba ugho.”

⁷Nao ukanidwa hata mnyangonyi ghwa waza, nani iji nerezighanireghe, ngawona mruma a wurighenyi.

⁸Niko ukanizera, “Mwana wa mdamu, Kota a wurighenyi,” nani iji nerekotereghe a wurighenyi, ngawona mnyango.

⁹Nao ukanizera, “Ngia kuwone wuchafu m'baa wawuyaghubonya aha.”

¹⁰Niko ngangia ngawona fwana rose ra shimandu riavuagha richorelo aighu ya wurigha chia rose, na nyamandu zima ra wuchafu, chiaimweri na milimu yose ya wandu wa Israeli.

¹¹Naimbiri kwawo waghosi mirongo mfungade wa Israeli werekaieghe kimusi wikwanye na Jaazania mwana wa Shafani aghadi kwawo. Kula umu orekoghe wawadia luwigha lofukiria marumba, na mosi ghwaro ghukakaia ghukifukia nokoighu.

¹²Niko Mlungu ukanizera, “Mwana wa mdamu, kwawona seji awaghosi wa wandu wa Israeli wawuyabonya akirenyi? Kula umu wawo waawuyatasa mlimu ghwake achumbenyi ukighamba, ‘BWANA ndewuediwona, BWANA wamerie kusigha iji isanga.’”

¹³BWANA ukanizera, “Kuchawona sena maza rimu mbaa ra wuchafu kuchumba iri wawuyaribonya.”

¹⁴Nao ukanidwa hata andu kongiria kwa mbenge ya cha kaskazinyi ya Hekalu ya BWANA, ngawona waka wasea kidombo wililiagha mlungu Tamuzi.[2]

¹⁵Ukaghamba, “Kwawona agha ee mwana wa mdamu? Sena kuchawona wuchafu m'baa ghuchumbagha ughu.”

¹⁶BWANA ukanireda waza ya ndenyi ya Hekalu ya BWANA; ngawona a mnyangonyi ghwa Hekalu ya BWANA, ghadi na ghadi ya lukumbi na madhabahu, wandu mirongo iwi na wasanu walangaya cha mashariki na kuwikia Hekalu ya BWANA mighongo yawo; nawo werekoghe wikitasa iruwa jerekoghe jikibuka noko cha mashariki.

¹⁷BWANA ukanizera, “Mwana wa mdamu, kwawona agha? Wandu wa Juda ndewiwuekatwa ni wuchafu wawuyaghubonya aha, wachuria wuwiwi ghobonya wuda isangenyi, na kuchuria kunibonya nijoko ni machu. Wona sena wiangira lumbashu mbuonyi kwawo.[3]

¹⁸Kwa huwo nichawibonyera malagho kwa machu, sichaawiwonia wughoma hata kuwilekia, hata wikanikemia kwa lwaka lubaa, sichaawisikiria anduangi.”