Read TAITA BIBLE – Biblia Ilagho Jiboie Kwa Wandu Wose DANIELI 1 Bible Online

DANIELI 1 - TAITA BIBLE – Biblia Ilagho Jiboie Kwa Wandu Wose bible

DANIELI 1

¹Mwaka ghwa kadadu iji Jehoiakimu orekoghe mzuri wa Juda, Nebukadnezari mzuri wa Babuloni orechieghe ukaghurughaia muzi ghwa Jerusalemu.

²BWANA ukamngira Jehoiakimu mzuri wa Juda mikonunyi kwake chiaimweri na vilambo vimu va Hekalunyi. Ukavireda isanga ja Babuloni kwa nyumba ya mlungu ghwake, na vilambo va hekalunyi ukaviranganya na vilambo va mlungu ghwake.

³Niko mzuri Nebukadnezari ukamlaghira Ashpenazi, uo orekoghe m'baa wa wanjama wake, urede wandu wamu wa Israeli, wose wa nyumba ya kiwuzuri, na awo werekoghe wabaa.

⁴Werekoghe wikaie wandu wa irika wiseko na itiko, wighokie sena wiko na kumanya kwa hikima yose. Wichulo ni kumanya, na hikima ekunda kukufundisha, widimagha kudumika andenyi ya ngome ya mzuri. Ashpenazi orekoghe uwifundishe hata wimanye kiteto cha Kibabuloni.

⁵Mzuri ukafunya momu kukaia wineko vindo vinorie kula ituku, ivo veni verejighwagha ni mzuri, na divei icheni erenyughwagha ni mzuri. Wifundisho kwa miaka idadu, na nyuma ya ngelo iyo kukata, wiredo kwa mzuri kudumika.

⁶Wamu wa awo wandu, werekoghe Danieli, na Hanania, na Mishaeli na Azaria wa kichuku cha Juda.

⁷Uja m'baa wa wanjama wa mzuri orewinekieghe marina: Danieli ukammbanga Belteshazari, na Hanania ukammbanga Shadraka, na Mishaeli ukammbanga Meshaki, na Azaria ukammbanga Abednego.

⁸Ela Danieli ukaririkanya na kudumbua malagho ghake moni kukaia, ndechaakulusha na ivo vindo va mzuri vinorie, na divei iyo erenyughwagha ni mzuri; niko ukamlomba uja m'baa wa wanjama umleke na ivo vindo.

⁹Mlungu ukam'bonya Danieli urumirikie mesonyi kwa uja m'baa wa m'baa wa wanjama;

¹⁰ukamzera Danieli, “Naawuyamuobua bwana wapo mzuri, uo ulaghirie vindo venyu na kunywa konyu. Ukamkua mdarume kuchumba wambenyu wa irika jenyu, wadima kunibwagha.”

¹¹Niko Danieli ukamzera uja mzighaniri orewikilo ni m'baa wa wanjama umzighaneghe uo, na Hanania, na Mishaeli, na Azaria,

¹²“Ditime isi wadumiki wako kwa matuku ikumi; dineko mbogha dije, na machi dinyo.

¹³Nao kufwananishe fwana redu na ra wambenyu wandu wa irika awo wawuyaja vindo vinorie kwawuyawineka; kutanye kumoni seji kwawuyadiwona isi wadumiki wako.”

¹⁴Nao ukawisikira kwa ijo ilagho, ukawitima kwa matuku ikumi.

¹⁵Hata kutua kwa agho matuku ikumi, ikawoneka kukaia fwana ra weke Danieli rerekoghe righokie, na mimbi yawo ibandie, kuchumba ya wandu wa irika wambao werekoghe wikija vindo vinorie va mzuri.

¹⁶Kwa huwo uja mzighaniri ukaviinja vija vindo vawo, vinorie na divei; ukakaia ukiwineka mbogha.

¹⁷Mlungu ukawineka awa wandu wa irika bana hikima na kumanya kokufundisha; ukamneka Danieli kumanya, kutambua mawono, na ndodo rose.

¹⁸Kutua kwa iyo ngelo, mzuri ukafunya momu awo wandu wa irika wighenjo kwake. Uja m'baa wanjama kolowi ukawighenja kwa Nebukadnezari.

¹⁹Nao mzuri ukadedanya nawo wose, ela aghadi kwawo ndekorekoghe na mndungi orewonekieghe udimagha kufwananishwa na weke Danieli, Hanania, Mishaeli, na Azaria. Kwa huwo awo wikarumirilwa widumike imbiri ya mzuri.

²⁰Kwa malagho ghose gha hikima na kumanya, agho mzuri oreghikotereghe, ukawiwona awo kukaia wiboie mando ikumi kuchumba waghanga na wasawi wose werekoghe andenyi ya wuzuri ghwake.

²¹Danieli ukasigharika aho ngomenyi kwa mzuri, hata mwaka ghwa imbiri ghwa mzuri Koreshi.