Read TAITA BIBLE – Biblia Ilagho Jiboie Kwa Wandu Wose DANIELI 6 Bible Online

DANIELI 6 - TAITA BIBLE – Biblia Ilagho Jiboie Kwa Wandu Wose bible

DANIELI 6

¹Dario orewonieghe nicha kuwika wabaa ighana na mirongo iwi andenyi ya wuzuri ghwake ghose.

²Na aighu ya awo, ukawika wabaa wamu wadadu wewizighana, Danieli ukikaia umu wawo. Werewikiloghe wiredeloghe mtalo ghwa maza ra isanga ni waja wabaa, eri mzuri usepate hasara.

³Danieli ukamanyika kuchumba waja wabaa wambao, kwa kukaia roho ndicha erekoghe andenyi kwake; na mzuri orekoghe ukiririkanya ummbike aighu ya wuzuri ghose.

⁴Niko waja wabaa wawi na waja wabaa wazima wikawoka kulola ilagho jingi jedima kumshitakia Danieli kwa wundu ghwa kuwona seji Danieli wawuyaghenjesha wuzuri, ela ndewerepatireghe ilagho jingi hata ikosa jingi kwa Danieli, kwa kukaia orekoghe mloli.

⁵Niko awo wandu wikaghamba, “Ndedidimagha kupata sababu ingi emshitakia Danieli disaailola kwa chia ya dini yake.”

⁶Nao waja wabaa wose, wikapatana na kumghendia mzuri wikamzera, “Ee mzuri Dario, kuduo moyo!

⁷Wabaa wose wa wuzuri, wazighaniri, na wabaa wa masanga, wanjama na wabaa wose warumiriana kukaia mzuri udunge sharia na kuimangisha, kukaia, mndungi ukalomba kilambo chingi kwa mlungu ghungi, angu kwa mdamu, isaakaia ni kwako koni ee mzuri kwa matuku mirongo idadu, uchakumbwa andenyi ya kizimba cha shimba.

⁸Idana ee mzuri, imangishe kwa kuikaba mhuri na kuingira sahihi eri iseghalulo kwa kunugha sharia ra Waamedi na Wapashia iseghaluswagha.”

⁹Kwa huwo mzuri Dario ukaingira sahihi na kuimangisha.

¹⁰Nao iji Danieli wamanya kukaia ija sharia yameria kungirwa sahihi, ukaghenda nyumbenyi kwake ukajoka gorofenyi ukarughua madirisha ghake kulangaya cha Jerusalemu, ukadunga ngokoro mando adadu kwa ituku, ukalomba na kufunya chawucha kwa Mlungu wake sa iji koni orekoghe ukibonya.

¹¹Nao waja wandu wikacha na kumkua Danieli ukilomba na kuvoya kwa Mlungu wake.

¹²Niko wikacha kwa mzuri wikamzera, “Ee mzuri, oho kwadungie sharia kukaikaba mhuri na kuingira sahihi kukaia mndungi ukalomba kindo chingi kwa mlungu ghungi angu kwa mundu, isaakaia ni kwako ee mzuri kwa matuku mirongo idadu, uchakumbwa andenyi ya kizimba cha shimba.” Mzuri ukatumbulia, “Niko koni kunughana na sharia ya Waamedi na Wapashia iseghaluswagha.”

¹³Nao wikamzera mzuri, “Danieli uja mundu wa waja wibarishiro kufuma isanga ja Juda ndekutalagha oho ee mzuri, hata ndeitalagha ija sharia kuingirie sahihi, ela wadamlomba Mlungu mando adadu kwa ituku.”

¹⁴Mzuri uendasikira agho malagho, ukaja wasi nandighi, ukasindapima dii ukilola chia emkira Danieli, ukatima nandighi hata iruwa jikaneng'ena ukilola chia emkira.

¹⁵Niko waja wandu wikacha kwa nia imweri kwa mzuri, wikamzera, “Ee mzuri, sharia ija kuimanye ni ya Waamedi na Wapashia kukaia, momu ghungi ghwa mzuri ndeghudimagha kughaluswa.”

¹⁶Mzuri ukafunya momu Danieli uredo. Nao ukaredwa na kukumbwa andenyi ya kizimba cha shimba. Mzuri ukamzera Danieli, “Mlungu wako uo kumdumikiagha tuli tuli ukukire!”

¹⁷Igho jikaredwa na kuwikirilwa mnyangonyi ghwa icho kizimba; na mzuri ukajikaba mhuri ghwake ghoni, na mhuri ghwa wabaa wake, ilagho jingi jiseghaluso aighu ya Danieli.

¹⁸Mzuri ukawuya cha ngomenyi kwake, ukalalafunga tumu chee, na ngoma ringi nderikabilo, hata dilo rikaela.

¹⁹Nao mzuri ukawuka kokio ukaghenda shwa-shwa cha kizimbenyi cha shimba.

²⁰Hata iji orevikieghe kaavui andu Danieli orekumbiloghe, ukakema kwa lwaka lwa wasi, ukamzera Danieli, “Ee Danieli, mdumiki wa Mlungu uko moyo, welee, Mlungu wako kumdumikiagha tulituli wadimie kukukira kusejigho ni shimba?”

²¹Niko Danieli ukamtumbulia, “Ee mzuri dua moyo!

²²Mlungu wapo wamdumie malaika wake, na kuifunga memu ya shimba, naro nderinibonyere ilagho jingi anduangi, kwa kukaia serewonekieghe kukaia na ikosa jingi imbiri kwake; na hata imbiri kwako ee mzuri sibonyere ikosa jingi anduangi.”

²³Nao mzuri ukaboilwa nandighi; ukafunya momu Danieli ujoso na kufunywa kizimbenyi cha shimba. Niko Danieli ukajoswa na kufunywa kizimbenyi cha shimba, nao nderekoghe na alama ingi eshoghonolwa iwonekagha mumbinyi kwake, kwa kukaia orekoghe ukimrumiria Mlungu wake.

²⁴Mzuri ukafunya momu waja wandu weremshitakieghe Danieli wiredo na kukumbwa andenyi ya kizimba cha shimba; awo, na wana wawo, na waka wawo; Imbiri wisevikie kondonyi kizimbenyi, shimba rikawiwada na kuchikanya maindi ghawo.

²⁵Niko mzuri Dario ukawiandikia wandu wose wa mbari na viteto wikaiagha ndoenyi kose: “Sere ndeichurikie konyu.

²⁶Ini nafunya momu andenyi ya wuzuri ghwapo, wandu wiobuo na kusughisika imbiri ya Mlungu wa Danieli. Uo ni Mlungu uko moyo, uduagha kwa kala na kala; wuzuri ghwake ndeghuchaanonwa jingi; na nguma rake nderiwadie kutua kungi.

²⁷Wadakira na kuvuvua, wadabonya alama na mashiniko mlungunyi na ndoenyi. Wamkirie Danieli kufuma kwa ndighi ra shimba.”

²⁸Kwa huwo Danieli ukakaia nicha matuku ghose Dario na Koreshi, Mpashia werekoghe wikibonya nguma.