Read TAITA BIBLE – Biblia Ilagho Jiboie Kwa Wandu Wose HOSEA 11 Bible Online

HOSEA 11 - TAITA BIBLE – Biblia Ilagho Jiboie Kwa Wandu Wose bible

HOSEA 11

¹BWANA waghamba, “Iji Israeli orekoghe mwanake, neremkundeghe; kufuma Misri ngammbanga mwanwapo.

²Seji koni nerekoghe ngimmbanga, niko orechurieghe kughenda kula nani. Wandu wapo wikam'bwaghia Baali vizongona, na kuifukiria milimu marumba.

³Elaima sena ni ini moni nimfundishire Israeli kughenda, ngawidwa wandu wapo mikonunyi kwapo; ela ndewerenitalieghe kukaia ni ini niwilindirie.

⁴Nerewirudieghe cha kwapo kwa wughoma, ngawimaziria kwa lukundo; ngakaia kwawo sa mundu ufunguagha ghongolo kufuma singonyi kwawo, ngaghomeka nipate kuwijisha.

⁵“Na angu wileghie kuwuya cha kwapo, wichawuya cha isanga ja Misri, na Ashuru uchawuya mzuri wawo.

⁶Wuda ghuchabuka na mizi yawo ichanonwa, na kuchikanya minyango ya mbenge rawo; nawo wichamerelwa andenyi ya ngome rawo.

⁷Wandu wapo wachuria kughaluka na kunilegha. Wichalila kwa wundu ghwa ghongolo iko kwawo, ela ndekuwadie mndungi uchaaiinja kufuma kwawo.

⁸“Nidima wada kukuleka ee Israeli? Nidima wada kulegha kukutala? Nidima wada kukubonya sa Adma, angu kukubonyera sa Zeboiimu? Lukundo lwapo cha kwako looka lubaa, nani sidimagha kukubonyera kiwiwi.

⁹Sichaakukaba kwa machu ghapo anduangi; sichaamtotesha Israeli sena, kwa kukaia ini ne Mlungu se mdamu ungi; ini Mweli neko aghadi konyu, na ini sichaamchea na machu.

¹⁰“Wandu wapo wichaninugha, iji nawirurumia wamaiza wawo sa shimba. Wichashashira kunikimbiria wikisughusika kufuma magharibi.

¹¹Wichacha shwa-shwa sa nyonyi kufuma Misri, wichacha sa mbughi kufuma Ashuru, nani nichawireda mizinyi kwawo, ini BWANA naghamba.”

¹²BWANA waghamba, “Wandu wa Israeli wanimara chia rose kwa mikalo na tee, na wandu wa Juda waduagha wikinilegha ini, mloli na Mlungu mweli.