Read TAITA BIBLE – Biblia Ilagho Jiboie Kwa Wandu Wose HOSEA 5 Bible Online

HOSEA 5 - TAITA BIBLE – Biblia Ilagho Jiboie Kwa Wandu Wose bible

HOSEA 5

¹“Sikirenyi agha inyo wakohani! Sikirenyi agha ee wandu wa Israeli! Sikirenyi inyo wandu wa kinyumba cha wuzuri! Kutanya uku ni aighu enyu; kwa kukaia mwamerie kuwuya mdegho kwa Mispa, nyavu ideghelo aighu ya Mghondi ghwa Tabori,

²mwawurie kina kibaa kwa muzi ghwa Akaiki, nani nichamkaba mmbose.

³Namwichi Israeli loli-loli, ndevisikie kwapo anduangi. Wasowie kukaia na wuloli kwapo, na wandu wake ndewifwanagha kunitasa.”

⁴Mawiwi wighibonyere ghawighirie wisewuye kwa Mlungu wawo. Wutasi milimu ghwawimaziria hata ndewidimagha kumrumiria BWANA anduangi.

⁵Kukukasa kwa wandu wa Israeli kwawuyawishuhudia. Kaung'a rawo rawikuwara wikaghwa, na wandu wa Juda wori wichaghwa chiaimweri.

⁶Wafunya mfugho rawo vizongona wikimlola BWANA, ela ndevitesiagha. Ndewimmbonagha angu uwisighie.

⁷Wasowie kukaia waloli kwa BWANA; wana wawo si wake wangi. Wose wichatoteshwa chiaimweri na isanga jawo kafwani.

⁸Kabenyi tarumbeta ya wuda aho Gibea! Kabenyi ndereri aho Rama! Kemenyi ngemi ya wuda aho Beth-aveni! Ngienyi wudenyi inyo wandu wa Benjamini.

⁹Ituku jekabwa jaawuyacha, na Israeli uchatoteshwa. Inyo wandu wa Israeli, loli agho malagho ghichacha!

¹⁰BWANA waghamba, “Nakaia na machu angu wabaa wa Juda wangiria Israeli na kuiwa isanga jawo. Nichawidiria adhabu sa kudwalwa ni machi mengi.

¹¹Israeli waawuyakorongeka; walaghashire isanga jerekoghe jake jeni, kwa kukaia orekoghe ukilola wutesia kwa wandu wisewadie kindo chingi.

¹²Nichawitotesha Israeli, na kuwinona wandu wa Juda.

¹³“Nao iji Israeli wawona seji uko mkongo, na Juda kuwona seji washoghonaka, Israeli ukaghenda cha Ashuru kulomba wutesia kwa m'baa wa isanga, ela ndereboisireghe hata kuhoa kushoghonoka kwake.

¹⁴Nichawikaba wandu wa Israeli na Juda sa shimba. Nichawirashua ini moni viluponge na kuwisigha. Ngelo nawifunya noko, ndekuchaakaia na mndungi owikira anduangi.

¹⁵“Nichawisigha wandu wapo hata witiriro ni kaung'a rawo kwa kukata; wiwonecha wikinilola. Kewada andenyi ya matiriro ghawo, wadima kunilola hata winiwone.”