Read TAITA BIBLE – Biblia Ilagho Jiboie Kwa Wandu Wose JOELI 1 Bible Online

JOELI 1 - TAITA BIBLE – Biblia Ilagho Jiboie Kwa Wandu Wose bible

JOELI 1

¹Iji ni ilagho ja BWANA jeremchieghe Joeli mwana wa Pethueli:

²Zighanenyi agha malagho inyo waghosi, sikirenyi inyo mmbose wandu wa Juda; welee, jingi mwawonie ilagho sa iji, ngelo renyu angu ngelo ra weke ndeyo?

³Jighorienyi wana wenyu, na wana wenyu wiwighorie wana, na wana wawo wichighorie kivalwa chichagha.

⁴Izungu ja zighe jawuyanughana jakaria aighu ya miwalwa. Izungu jimu ja zighe jikaja na kusighara, izungu jimu jiameria ivo veresighiloghe.

⁵Wukenyi mlile inyo wawongeri; kemenyi inyo mnywagha divei; zabibu reboisa divei mbishi ranonwa putu.

⁶Ijeshi ja zighe jangia isangenyi kodu, jawadie ndighi jisetalikagha; maghegho ghawo ghakalie sa gha shimba.

⁷Ranonie mizabibu yedu putu; rikaja mitini yedu putu. Rakonue makoko gha midi yaro; mbashu raro rikadawoneka ra chokwa.

⁸Inyo wandu, lilenyi sa mwai umliliagha mchumba wake wafwa.

⁹Viro na divei vifunywagha Hekalunyi ndeviko; wakohani waawuyalila kwa kusowa mafunyo ghemfunyira BWANA.

¹⁰Mbuwa reewuya ikara; ndoe yaoma, angu viro vanonwa, mizabibu yaoma, na mizeituni yaoma.

¹¹Fonyi waya inyo walimi, kemenyi inyo mlimagha mbuwa ra mizabibu; kwa kukaia ngano na shairi, na miwalwa yose yameria kunonwa.

¹²Mizabibu na mizeituni enyaya; midi yose ya matunda enyaya na kuoma. Maboilo ghose gha wandu gheemeria kusia.

¹³Ronyi nguwo ra magunia mlile ee Wakohani; inyo mdumikagha madhabahunyi, lilenyi ahoeni. Choonyi mlale mrwae nguwo ra magunia inyo mdumikagha imbiri ya Mlungu wapo! Kwa kukaia mafunyo gha viro na gha kunywa, ghasoweka Hekalunyi kwa Mlungu onyu.

¹⁴Ereshenyi kufunga tumu, mmbange ikwanyiko; Kwanyenyi vilongozi na wandu wose wa Juda, wiche Hekalunyi kwa BWANA Mlungu onyu, mumkemie uo.

¹⁵Ituku ja BWANA jameria kuvika! Ituku BWANA wawuyareda kunoneka. Uo-Uwadie-Ndighi-Rose uchareda kunoneka koobosha ituku ijo.

¹⁶Viro vedu vaawuyatoteshwa dikiwona woruwu; ndekuwadie kuboilwa kungi Hekalunyi kwa Mlungu odu.

¹⁷Mbeu reeomia amalowenyi; viro vewika vasoweka, na nganya rewika viro reenonwa.

¹⁸Ng'ombe raawuyadoka kwa wasi ghosowa nyasi; ng'ondi raawuyaja wasi wokoni.

¹⁹Nakukemia oho ee BWANA, kwa kukaia malisho ghose na midi eeoma putu; seji eekorwa.

²⁰Hata nyamandu ra isakenyi riakukemia oho, kwa kukaia ndoria rose ra machi reeoma, na milamba yose eeoma.