Read TAITA BIBLE – Biblia Ilagho Jiboie Kwa Wandu Wose JOELI 2 Bible Online

JOELI 2 - TAITA BIBLE – Biblia Ilagho Jiboie Kwa Wandu Wose bible

JOELI 2

¹Kabenyi tarumbeta; kabenyi nguli Sioni, ugho mghondi ghwa wueli ghwa Mlungu. Wandu wa Juda ndewisughusike, kwa kukaia ituku ja BWANA jeko kaavui kucha.

²Ni ituku ja kira na wasi, ituku ja mawingu na kira kibaa. Izungu ja zighe jangia na kufinikira mighondi. Jareda kukamba kwa kira jingi chisewonekie, hata ndechichaawoneka huwu sena anduangi.

³Riameria miwalwa yose sa modo; imbiri risechee isanga jedeeka sa Mbuwa ya Edeni; nyuma yawo isanga jikaawuya ikara. Ndekuwadie kindo chingi chisighilo chisejilo.

⁴Riawoneka sa farasi; riakimbia na iseghe sa farasi ra wuda.

⁵Riarama-rama aighu mighondinyi rikiruma sa magare, sa vikuli va nyasi viboboswagha ni modo. Radunga longo sa ijeshi jiwadie ndighi jawikwa tayari kwa wuda.

⁶Kucha kwawo kuaobosha wandu; mawushu ghose ghaawuya gha mshashu-mshashu.

⁷Rangiria vilambo sa mang'oni; rajoka wurigha sa masikari; raghenda kiimbiri chiaimweri kuseko kughaluka.

⁸Nderiadadanagha; kula imu yadanugha chia yake. Radaghenda kiimbiri kuseko kutangalwa ni mndungi.

⁹Raramia muzi na kukimbia aighu ya mawurigha; rajoka aighu na kungia nyumbenyi, rangia na madirisha sa vitoi.

¹⁰Ndoe yaawuyasughusika imbiri kwawo; mawingunyi kwaawuyazingizika. Iruwa na mori vawuya kira, na nyerinyeri raleka kung'ala-ng'ala.

¹¹BWANA wajifunyira momu ijeshi jake, najo ijeshi ja wandu wake wengi wiwadie ndighi jakatisha malaghiro ghake. Ituku ja BWANA ni ibaa jeobosha; nani udimagha kujirumaghia?

¹²BWANA waghamba, “Hata idana heenyi mmbuye kwapo kwa ngolo renyu rose; mkifunga na kulila kwa kudikwa ni mbori.

¹³Rashuonyi ngolo renyu nguwo mbai.” Wuyenyi kwa BWANA, Mlungu onyu. Uo wachua mvono na wughoma, wachua irumaghio, nao wadamaziria malaghiro ghake; wadafuya wughoma na kuleka kukaba.

¹⁴Kewada BWANA Mlungu onyu wadima kughalusa maghesho, umrasimie na kumneka mavalo mengi, mpate kumfunyira viro na divei.

¹⁵Kabenyi tarumbeta aighu ya Mghondi ghwa Sioni; funyenyi momu wandu wifunge tumu mmbange ikwanyiko.

¹⁶Wangenyi wandu chiaimweri muwieleshe; wangenyi waghosi na wanake, hata awo wiongagha. Wandu wibonyere arusi kafwani nawo weni wifume chumbenyi kwawo wiche.

¹⁷Wakohani wimdumikiagha BWANA ghadi na ghadi ya madhabahu na mnyango ghongia Hekalunyi ndewilile na kughamba, “Kuwifuye wughoma wandu wako ee BWANA; kusakesigha wandu wa mbari zima widiseke na kudimenya wikighamba, ‘Oke Mlungu onyu oko hao?’”

¹⁸Niko BWANA ukajizighana isanga jake, ukawifuya wughoma wandu wake.

¹⁹BWANA ukawitumbulia wandu wake ukighamba, “Olenyi nimredia viro, na divei na mavuda ghimkate; wandu wa iro mbari zima ndewichaammenya sena anduangi.

²⁰Nichajiinja ijeshi ja zighe rifumie kaskazinyi, nani nichawinga rimu cha kireti. Ifungu ja imbiri jichangia Bahari ya Chumbi, na ifungu ja nyuma jichangia Bahari ya Mediterania. Gharia raro richanuka. Nichawitotesha kwa wundu ghwa agho ghose wim'bonyere.

²¹“Kusakeobua ee isanga, boilwa na kuzuma, angu BWANA wakubonyera maza mbaa.

²²Inyo nyamandu ra isakenyi msakeobua, Milamba yabusa nyasi mbishi, na midi iava matunda. Tini na zabibu rachua na ndighi.

²³“Boilonyi inyo wandu wa Sioni, mumzumie BWANA, Mlungu onyu kwa agho um'bonyere. Wamnekie vua ya kwari na ya sumesu, wanyeshere vua sa iji koni orekoghe ukibonya imbiri.

²⁴Andu kochania kuchachua viro, vighombo viko kaavui na andu kokamia vichadika-dika divei na mavuda.

²⁵Nichammbunjira vindo va miaka yose vijilo ni izungu ja zighe; ni ini nerejidumieghe ijo izungu ja zighe konyu.

²⁶Idana mchaja na kughuda, nenyo mchamkasa BWANA Mlungu onyu um'bonyere maza ra mashiniko. Na jingi inyo wandu wapo ndemchaafushwa waya sena anduangi.

²⁷Niko inyo Israeli mchamanya kukaia neko aghadi konyu, na kukaia ini BWANA ne Mlungu onyu hata mzima ungi ndeuko. Na jingi inyo wandu ndemchaafushwa waya sena anduangi.

²⁸“Konyuma nichawidiria wandu wose roho wapo; wana wenyu wa womi na wa waka wichafunya ilagho japo. WAGHOSI wenyu wichaloda ndodo, na wandu wenyu wa irika wichawona mawono.

²⁹Ngelo iyo, nichadia roho wapo kwa wadumiki wa womi na wa waka;

³⁰“Nichawonyera alama na mashiniko gha jija ituku mawingunyi na ndoenyi, bagha na modo na makungughu gha mosi.

³¹Iruwa jichasera kira, na mori ghuchawuya ghwa ngundu sa bagha, imbiri ijo ituku ibaa ja BWANA jeobosha jisechee.

³²Ela uo uchaalomba wutesia ghwa BWANA uchakia. Na seji BWANA ughambie, ‘Weko wamu andenyi ya Jerusalemu wichaafufufunuka, awo niwisaghue wichakaia moyo.’”