Read TAITA BIBLE – Biblia Ilagho Jiboie Kwa Wandu Wose AMOSI 3 Bible Online

AMOSI 3 - TAITA BIBLE – Biblia Ilagho Jiboie Kwa Wandu Wose bible

AMOSI 3

¹Inyo wandu wa Israeli, sikirienyi ijo ilagho BWANA waghora aighu yenyu; aighu ya mbari yose oreijosereghe kufuma isanga ja Misri:

²“Ni inyo mmbeni neremmanyireghe aghadi ya mbari rose ra ndoenyi; kwa wundu ugho, nichamkaba kwa wundu ghwa makosa ghenyu ghose.”

³“Welee, wandu wawi wadima kughenda chiaimweri ngera wisepatane?

⁴Welee, shimba yarurumagha msidunyi, ngera isepatire madiwo? Welee, mwana wa shimba wakemagha mbangenyi usewadie kilambo chingi?

⁵Welee nyonyi yadima kuwadwa ni shaghala andonyi isedeghelo? Angu mdegho ghwadima kutarika ghoni ghusewadirilo ni kilambo chimu?

⁶Tarumbeta yadima kukabwa mzinyi nao wandu wilemo ni kuobua? Welee wuwiwi ghwadima kungia mzinyi ghuselaghirilo ni BWANA?

⁷Kwa loli Mlungu ndebonyagha ilagho jingi, usezoe kande kufunukua mpango ghwake kwa wadumiki wake walodi.

⁸Shimba yameria kururuma; nani useobuagha? BWANA wameria kughora; ni mlodi uao usefunyagha wulodi?”

⁹Tangazirenyi wandu wikaiagha ngome ra Ashdodi na ngome ra isanga ja Misri muwizere, “Kwanyikenyi aighu ya mighondi ya Samaria; mzighane iyo ndoghoi iko aho, na makorongo ghawuyabonyeka aghadi yaro.”

¹⁰BWANA waghamba, “Awandu ndewiichi kubonya hachi, waawuyachura ngome rawo na vilambo visokelo wandu na wutoi.”

¹¹Kwa huwo BWANA waghamba huwu, “M'maiza uchajimara isanga jako, na kuchikanya mawurigha ghako, na kuwusa vilambo viko andenyi ya ngome rako.”

¹²BWANA waghamba huwu, “Sa iji koni mlisha upatagha maghu awi angu kudu kwa ng'ondi kufuma momunyi kwa shimba, huwo koni wandu watinieri tu wa Israeli wikaiagha Samaria, awo wiseagha kidombo aighu ya makochi ghawo wichavuvulwa.

¹³Idana sikirenyi mpate kuwighoria wandu wa kivalwa cha Jakobo,” waghamba Bwana MLUNGU, uo Mlungu Uwadie-Ndighi-Rose.

¹⁴“Ituku niwikabagha wandu wa Israeli kwa wundu ghwa kaung'a rawo, nicharitotesha madhabahu ra Betheli. Nicharichikanya mbembe rose ra madhabahu hata andoenyi.

¹⁵Nicharichikanya nyumba ra sumesu na ra kwari. Na iro nyumba ripambilo na mbembe ra chovu nicharitotesha na iro nyumba mbaa richanonwa putu,” waghamba BWANA.