Read TAITA BIBLE – Biblia Ilagho Jiboie Kwa Wandu Wose AMOSI 5 Bible Online

AMOSI 5 - TAITA BIBLE – Biblia Ilagho Jiboie Kwa Wandu Wose bible

AMOSI 5

¹Sikirenyi ulu lumbo lolila inyo wandu wa Israeli:

²Mwai Israeli wamerie kughwa; usechaadima kuwuka sena! Oosighwa ulale andonyi; kuseko na mndungi omtesia.

³Bwana MLUNGU waghamba, “Muzi ghwa Israeli ghudumagha masikari elfu imweri wudenyi ghuchawurilwa ni masikari ighana jimweri tu; na ugho ghudumagha ighana, ghuchawurilwa ni ikumi tu.”

⁴BWANA Mlungu wawizera wandu wa Israeli huwu: “Nilolenyi mpate kukaia moyo.

⁵Msenilole Betheli; mseghende Gilgali hata mseghende Beer-sheba kutasa; kwa kukaia loli wandu wa Gilgali wichadwalwa wunyika, na Betheli ichasighwa nduu.”

⁶Mghendienyi BWANA mpate kukaia moyo, usechemseria sa modo andenyi ya wandu wa Israeli. Modo ghuchawikora wandu wa Betheli, hata usepatike mndungi oghurimisha.

⁷Ni bugha konyu inyo muighaluagha hachi iwuye kuwawa, na kuilaghasha loli.

⁸BWANA wabonyere nyerinyeri, Piadisi na Orioni, na kughalusa kira chiwuye mwengere, na mwengere ghuwuye kira. Uwangagha machi gha baharinyi, na kughidia andoenyi, irina jake ni BWANA.

⁹Uo uredagha kunoneka aighu ya wabaa, na kughusha ngome rawo.

¹⁰Inyo mwadazamilwa ni mundu ukemiagha wuwiwi, na kughora loli kotinyi.

¹¹Mwawikorongie wakiwa kwa kuwisoka viro vawo. Kwa huwo ndemchaarikaia iro nyumba ra magho muriaghie, hata kunywa divei iboie ifumagha kwa iyo mizabibu iboie muiwae.

¹²Naichi makosa ghenyu mengi, na kaung'a renyu seji riko mbaa. Mwadawitirira wandu wecha, na kuhongwa; mwadamtangala mkiwa usepate hachi yake kotinyi.

¹³Kwa huwo kunyama kima niko kuchaakaia suku ngelo iyo, kwa kukaia ni ngelo mbiwi.

¹⁴Lolenyi kubonya mecha, msighe mawiwi; mpate kukaia moyo; niko huwo BWANA, uo Mlungu Uwadie-Ndighi-Rose, uchaakaia chiaimweri nenyo, sa iji koni mlalaaghamba oko aeni.

¹⁵Menyenyi mawiwi, mkunde mecha, mtanye hachi kotinyi. Kewada BWANA uchawiwonia wughoma masighariko gha wandu wa mbari ihi.

¹⁶Kwa huwo BWANA, uo Mlungu Uwadie-Ndighi-Rose waghamba huwu: “Kuchakaia na kililo achienyi mbaa, na andu kose chienyi wandu wichakaia wikighamba, Weei ngai, Weei ngai! Wichawiwanga walimi wiche ifonyi; na kuwilipa awo wiko mafundi ghelila wichelila;

¹⁷wandu wichakaia wikilila andenyi ya mbuwa rose ra mizabibu, kwa kukaia nichaida aghadi konyu ngimkaba;” waghamba BWANA.

¹⁸Ni bugha kwa awo wiweseragha ijo ituku ja BWANA! Kwaki mkunde kujiwona ituku ja BWANA! Ni ituku ja kira jisewadie mwengere;

¹⁹jeeka seji mundu uikimbiagha shimba nao ukwane na kibarabara angu seji mundu ungiagha nyumbenyi, nao eukusaghikagha na wurigha, ulumo ni choka.

²⁰Welee, huwo ituku ja BWANA ndejeeka kira jisewadie mwengere, ituku ja kira cha ndindi jisena mwengere ghungi anguwada?

²¹BWANA waghamba, “Nadazamilwa ni ndima renyu ra dini, sidimagha kurirumaghia.

²²Hata ngera mwanifunyira vizongona venyu vekora na vizongona va viro, sichaavirumiria anduangi; sichaavirumiria vizongona venyu va nyamandu ribandie anduangi.

²³Sighenyi kunibara madu na chumbo renyu, sikunde kusikiria chwaka ra vinubi venyu.

²⁴Ela hachi ndeidike-dike sa machi, na loli idike sa kamoda kiseomagha.

²⁵“Wandu wa Israeli, seremlombieghe vizongona na mafunyo ghangi andenyi ya iyo miaka mirongo ina ngimlongoza kireti.

²⁶Ela idana, angu mtasire fwana ra Sakuthi, mzuri onyu mlungu, na Kaiwani mlungu ghonyu ghwa nyerinyeri, mchariduka iro fwana renyu

²⁷ingelo nichamfunya mdwalo wunyika cha isanga jiko kimonu cha Dameshki;” waghamba BWANA uo uwangwagha Mlungu Uwadie-Ndighi-Rose.