Read TAITA BIBLE – Biblia Ilagho Jiboie Kwa Wandu Wose AMOSI 6 Bible Online

AMOSI 6 - TAITA BIBLE – Biblia Ilagho Jiboie Kwa Wandu Wose bible

AMOSI 6

¹Ni bugha konyu inyo mkaiagha kwa raha Sioni na kwa inyo mmbonagha kukaia moko nicha Samaria; inyo wandu wabaa wa iyo mbari mbaa ya Israeli wesuwirilwa ni wandu wa Israeli.

²Marenyi muzi ghwa Kalno mzighane mmbone; na kufuma aho mghende ghuja muzi m'baa ghwa Hamathi; sena muide msee hata Gathi, muzi ghwa Wafilisti. Welee, weko nicha kuchumba agha mawuzuri gha Juda na Israeli? Angu, weko na isanga ibaa kuchumba jenyu?

³Inyo mleghagha kurumiria wei ijo ituku jekabwa jalighisa, ela sena agho mughibonyagha ghaawuyashashira ijo ituku jimchee.

⁴Ni bugha konyu inyo mkuhoreshagha aighu ya mawuli gha mbembe ra chovu, na kukughorua aighu ya makochi, mkija nyama ra ng'ondi kufuma chaghenyi, na nyama ra ngache kufuma boronyi;

⁵inyo m'boragha chumbo mkitumia vinubi, na kukubonyera vombo vebora sa Daudi.

⁶Mnywagha divei na bakuli, na kukushinga mavuda gha marumba mecha, ela msetalagha kunoneka kwa Israeli.

⁷Kwa huwo mchakaia wa imbiri kudwalwa wunyika; karamu na maseko ghenyu ghichasia.

⁸Bwana MLUNGU waghema kwa uo moni, ukighamba, “Nazamilwa ni uko kukujosa kwa wandu wa Israeli na iro ngome rawo; nani nichaghufunya muzi ghwawo na vose viko andenyi yaro kwa wamaiza.”

⁹Iji wandu ikumi wasigharika andenyi ya nyumba, wichafwa wose.

¹⁰Mkichuku wa mundu ufue, uo uko kilongozi cha mariko uchaghufunya ugho mumbi nyumbenyi. Uja mkichuku uchawanga mundu uo ose wasigharika nyumbenyi, “Wele mokwanye na mndungi aho?” Ukatumbulia, “Hata!” Uchaghamba, “Shii! Nyama kima, disesikirike dikijighora irina ja BWANA.”

¹¹BWANA ukafunya momu, nyumba mbaa na ndini richachikanywa vipande vipande.

¹²Welee, farasi rakimbiagha aighu lwalenyi? Welee, mndungi walimagha na ighembe ja ng'ombe a baharinyi? Ela inyo mwaighalusire hachi iwuye sumu, na itunda ja hachi jiwuye sa kilambo chiwawie.

¹³Inyo mwawuyaboilwanya na Lo-debari[3] mkighamba, “Welee, ndededewada muzi ghwa Karnaimu kwa ndighi redu diweni?”

¹⁴BWANA Uwadie-Ndighi-Rose waghamba, “Olenyi nichamredia ijeshi ja kighenyi isangenyi konyu, ee wandu wa Israeli, nawo wichamkoronga kufuma mbembe ya Hamathi cha kaskazinyi hata kamoda ka Araba cha kusinyi.”