Read TAITA BIBLE – Biblia Ilagho Jiboie Kwa Wandu Wose OBADIA 1 Bible Online

OBADIA 1 - TAITA BIBLE – Biblia Ilagho Jiboie Kwa Wandu Wose bible

OBADIA 1

¹Ughu ni wulodi ghwa Obadia seji BWANA Mlungu ughorie aighu ya wandu wa Edomu. BWANA wamdumie mdumwa wake kwa iro mbari zima; damsikire ukighora malagho agha: “Wukenyi dilo na Edomu!”

²BWANA waizera Edomu, “Nichakubonya mnyonge aghadi ya mbari zima, na oho kuchamenyeka nandighi.

³Lukaso lwako lookukalia, Muzi ghwako m'baa ghooka na ngome riaghilo na magho ghikurie; nyumba yako eeka aighu mghondinyi; niko kwawuyaghamba, ‘Nani udimagha kunighusha andonyi?’

⁴Hata ngera kwabonyere muzi ghwako ghukakaia ighu sa kijungi cha indu, hata ghuwonekeghe seji ghooka nyerinyerinyi, ela nichakupotua andonyi.

⁵“Vitoi vikacha nakio, vadawusa vilambo wikunde. Wandu wikakawaya zabibu, wasigharagha rimu ndinieri. Ela wamaiza wako weekumeria putu.

⁶Inyo kivalwa cha Esau, mali yako yawusiro kwa ndighi.

⁷Waghenyi wako weekukalia; wakuwingie kufuma isangenyi jako. Wandu werekoghe na sere na oho, wakusima. Waghenyi wako morejanyagha wakudeghia shaghala; waghora aighu yako, ‘Ugho wuing'oni orekoghe nagho ghuao?’

⁸“Ngelo niikabagha Edomu, nichawitotesha wandu waro wiko na suku, na kuinja putu hikima yawo.

⁹Wandu wako wa wuda ee Temani, wichangirwa kiture, na kula asikari wa isanga ja Edomu, uchabwaghwa.

¹⁰“Kwa kukaia kwawisokie na kuwibwagha wanyinyu, awo wana wa Jakobo, kuchatoteshwa na kusowelwa ishima kwa kala na kala.

¹¹Ituku wamaiza werechikanyireghe mbenge rawo, korekoghe kimusi aeni. Korekoghe mmbiwi karakara na waja waghenyi weredukagha mali ra Jerusalemu na kuwaghiana weni na weni.

¹²Ndekoredimagha kuboilwa ni kusokwa kwa wanyinyu werekoghe Juda. Ndekoredimagha kuboilwa ituku werenonwagha. Ndekoredimagha kuwiseka ngelo wiko andenyi ya wasi ghwawo.

¹³Ndekoredimagha kungia muzi ghwa wandu wapo, na kuboilwa ni matiriro ghawo, na kuwada vilambo vawo, wikikaia andenyi ya wasi ghwawo.

¹⁴Ndekoredimagha kukaia kimusi chia ra matano, na kuwada awo werekoghe wikikimbia; ndekoredimagha kuwinekeria wamaiza ngelo ya wasi ghwawo.

¹⁵“Ituku jalighisa ja ini BWANA kutanya mbari rose. Oho Edomu, kuchabonyerwa agho korebonyereghe. Kuchalipwa agheni kubonyere.

¹⁶Wandu wapo wanyue kikombe chibirie cha makabo aighu ya mghondi ghwapo ghwa wueli. Ela mbari rose riko mbai-mbai richanywa kikombe chekabwa chibirie kuchumba; wichachinywa chose hata wisie.

¹⁷“Ela kuchakaia na wandu wifufunukagha aighu ya Mghondi ghwa Sioni, na aho kuchakaia andu kwa wueli. Wandu wa Jakobo wichawusa isanga jiko mali yawo cheni.

¹⁸Wandu wa Jakobo na nyumba ya Josefu, wichakaia sa modo; wichawitotesha wandu wa Esau, seji modo ghukoragha matasa. Ndekuwadie mndungi wa kivalwa cha Esau uchaasigharika; ini BWANA naghamba.

¹⁹“Wandu wa Juda ya kusinyi wichawusa Edomu; wandu wifumie kirimba cha mighondi ya magharibi, wichawusa isanga ja Wafilisti; Waisraeli wichawusa masanga gha Efraimu na Samaria; na wandu wa Benjamini wichawusa Gileadi.

²⁰Ijeshi ja wubarishonyi jerefumieghe Israeli ya kaskazinyi, wichawuya na kusima Foinike hata cha kaskazinyi kuvikia Zarefathi. Na wandu wa wubarishonyi Jerusalemu, werefumieghe na kukaia Saridi, wichaiwada mizi ya Juda ya kusinyi.

²¹Wasimi wa Jerusalemu wichaikaba Edomu na kuibonyera nguma na BWANA moni uchakaia mzuri.”