Read TAITA BIBLE – Biblia Ilagho Jiboie Kwa Wandu Wose MITALO 1 Bible Online

MITALO 1 - TAITA BIBLE – Biblia Ilagho Jiboie Kwa Wandu Wose bible

MITALO 1

¹Ituku ja imbiri ja mori ghwa kawi, mwaka ghwa kawi nyuma ya kufuma isanga ja Misri, BWANA ukaghora na Musa aho kireti cha Sinai andenyi ya Hema ekwania ukighamba,

²“Tala izungu jose ja wandu wa Israeli, nyumba kwa nyumba, na kichuku kwa kichuku, kunugha marina gha kula mundu wa womi, mundu kwa mundu;

³kufuma wandu wa miaka mirongo iwi na kuchumba. Oho na Haruni mchawitala wandu wose wa Israeli mafungu mafungu widimagha kughenda wudenyi.

⁴Mkanye na mundu umweri wa kula kichuku, uko chongo cha nyumba ya mzawo.

⁵Wandu wichaamtesia ni awa: Kufuma kichuku cha Reubeni ni Elisuri mwana wa Shedeuri;

⁶kufuma kichuku cha Simeoni, ni Shelumieli mwana wa Surishadai;

⁷kufuma kichuku cha Juda, ni Nashoni mwana wa Aminadabu;

⁸kufuma kichuku cha Isakari, ni Nethaneli mwana wa Suari;

⁹kufuma kichuku cha Zebluni, ni Eliabu mwana wa Heloni;

¹⁰kufuma kwa wana wa Josefu, kichuku cha Efraimu, ni Elishama mwana wa Amihudi; na kichuku cha Manase, ni Gamalieli mwana wa Pedasuri.

¹¹Kufuma kichuku cha Benjamini, ni Abidani mwana wa Gideoni;

¹²kufuma kichuku cha Dani, ni Ahiezeri mwana wa Amishadai;

¹³kufuma kichuku cha Asheri, ni Pagieli mwana wa Okrani;

¹⁴kufuma kichuku cha Gadi, ni Elisafu mwana wa Deueli;

¹⁵kufuma kichuku cha Naftali, ni Ahira mwana wa Enani.”

¹⁶Awa niwo wandu weresaghuloghe kufumanya na ijo izungu; werekoghe vilongozi va vichuku va weke wawa wawo, nawo ni wabaa wa mbari ya Israeli.

¹⁷Musa na Haruni wikawidwa awo wandu,

¹⁸na ituku ja imbiri ja mori ghwa kawi, wikakwanya ijo izungu jose; wikakuandikisha nyumba kwa nyumba, kichuku kwa kichuku, na mundu kwa mundu; kunughana na mtalo ghwa marina kula mundu uvikie miaka mirongo iwi na kuchumba.

¹⁹Wikatalwa aho kireti cha Sinai, sa iji koni BWANA oremlaghirieghe Musa.

²⁰Kivalwa cha Reubeni, mwana wa imbiri wa Israeli wiendatalwa wose vichuku vawo, na nyumba rawo kwa marina ghawo, mundu wa womi udimagha kughenda wudenyi uvikie miaka mirongo iwi na kuchumba,

²¹mtalo ghwawo ghorekoghe elfu mirongo ina na irandadu na maghana masanu.

²²Kivalwa cha Simeoni wiendatalwa wose vichuku vawo, na nyumba rawo, kwa marina ghawo, mundu wa womi udimagha kughenda wudenyi uvikie miaka mirongo iwi na kuchumba,

²³mtalo ghwawo ghorekoghe elfu mirongo misanu na ikenda na maghana adadu.

²⁴Kivalwa cha Gadi wiendatalwa wose vichuku vawo, na nyumba rawo kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

²⁵mtalo ghwawo ghorekoghe elfu mirongo ina na isanu maghana arandadu na mirongo misanu.

²⁶Kivalwa cha Juda wiendatalwa wose vichuku vawo, na nyumba rawo kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

²⁷mtalo ghwawo ghorekoghe elfu mirongo mfungade na inya na maghana arandadu.

²⁸Kivalwa cha Isakari wiendatalwa wose vichuku vawo, na nyumba rawo kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

²⁹mtalo ghwawo ghorekoghe elfu mirongo misanu na inya na maghana ana.

³⁰Kivalwa cha Zebluni wiendatalwa wose vichuku vawo, na nyumba rawo kwa marina ghawo, mundu wa womi udimagha kughenda wudenyi uvikie miaka mirongo iwi na kuchumba,

³¹mtalo ghwawo ghorekoghe elfu mirongo misanu na mfungade, na maghana ana.

³²Kivalwa cha Josefu wiendatalwa wose wifumanye na Efraimu, vichuku vawo, na nyumba rawo kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

³³mtalo ghwawo ghorekoghe elfu mirongo ina na maghana masanu.

³⁴Awa wifumanye na Manase, vichuku vawo, na nyumba rawo kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

³⁵mtalo ghwawo ghorekoghe elfu mirongo idadu na iwi na maghana awi.

³⁶Kivalwa cha Benjamini wiendatalwa wose vichuku vawo, na nyumba rawo kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

³⁷mtalo ghwawo ghorekoghe elfu mirongo idadu na isanu na maghana ana.

³⁸Kivalwa cha Dani wiendatalwa wose vichuku vawo, na nyumba rawo, kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

³⁹mtalo ghwawo ghorekoghe elfu mirongo irandadu na iwi na maghana mfungade.

⁴⁰Kivalwa cha Asheri wiendatalwa wose vichuku vawo, na nyumba rawo kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

⁴¹mtalo ghwawo ghorekoghe elfu mirongo ina na imweri na maghana masanu.

⁴²Kivalwa cha Naftali wiendatalwa wose vichuku vawo, na nyumba rawo kwa marina ghawo, kula mundu wa womi udimagha kughenda wudenyi uvikie miaka mirongo iwi na kuchumba,

⁴³mtalo ghwawo ghorekoghe elfu mirongo misanu na idadu na maghana ana.

⁴⁴Awa niwo wandu weretaliloghe ni Musa na Haruni wikiteselwa ni vilongozi ikumi na viwi va Waisraeli kula mundu ukikaia wulalo ghwa kichuku chake.

⁴⁵Kwa huwo mtalo ghwa wandu wa Israeli kunughana na vichuku vawo, awo werekoghe wa miaka mirongo iwi na kuchumba; awo wose widimagha kughenda wudenyi,

⁴⁶ghorekoghe elfu maghana arandadu na idadu maghana masanu na mirongo misanu.

⁴⁷Kivalwa cha Lawi icho ndecheretaliloghe chiaimweri na wambao;

⁴⁸angu Mlungu oremzerieghe Musa,

⁴⁹“Kukakatala vichuku va Israeli, kusetale kichuku cha Lawi;

⁵⁰ela kuwiwike wikaie wazighaniri wa Hema ya andu kwapo kokaia, na vilambo varo vose. Wichakaia wikiiduka Hema na vilambo varo vose; nawo wichadunga kambi kuimara iyo Hema, na kuilindia.

⁵¹Iyo Hema ikakadukwa, Walawi niwo wiikuagha; na sena ikakawikirilwa, niwo weni wiidungagha. Mndungi mzima ukaisoghodera uchabwaghwa.

⁵²Wandu wa Israeli wichadunga hema rawo mafungu mafungu, kula umu kambinyi kwake andu bendera yake iko.

⁵³Ela Walawi wichapanga mbai-mbai ya Hema ya andu kwapo kokaia wiilindieghe, eri machu gha kubia kwapo ghisechewichea izungu ja wandu wa Israeli.”

⁵⁴Huwo niko wandu wa Israeli werebonyereghe sa iji koni BWANA oremlaghirieghe Musa.