Read TAITA BIBLE – Biblia Ilagho Jiboie Kwa Wandu Wose MITALO 14 Bible Online

MITALO 14 - TAITA BIBLE – Biblia Ilagho Jiboie Kwa Wandu Wose bible

MITALO 14

¹Niko izungu jose ja wandu jikawoka kukema na kulila; wikalalalila chee icho kio.

²Wandu wose wa Israeli wikawizughunukia Musa na Haruni, wikighamba, “Si nicha derefuyagha Misri angu aha eni kireti!

³Kwaki BWANA udighenjagha ijo isanga diendebwaghwa wudenyi na waka na wana wedu widwalo wunyika; si baa diwuye Misri?”

⁴Kwa huwo wikazerana weni na weni, “Ndedisaghuo kilongozi, diwuye Misri.”

⁵Niko Musa na Haruni wikaghwa kijimijimi imbiri ya jija izungu jose ja wandu wa Israeli.

⁶Joshua mwana wa Nuni, na Kalebu mwana wa Jefune, awo wereghendanyeghe na waja wandu wereghendieghe kujizighana isanga, wikarashua nguwo rawo;

⁷wikajizera izungu jose ja wandu wa Israeli, “Ijo isanga dereidieghe aghadi yaro kujizighana, jaboie nandighi.

⁸Kamanya BWANA uboilwagha ni isi, uchadighenja na kudineka ijo isanga; ni isanga jinorie nandighi.

⁹Inyo ni bora msemleghe BWANA, hata msewiobuo waisanga waro, angu awo ni sa vindo vedu; ndewiwadie wulindiri ghungi, ela BWANA oko andwamweri nesi; msakewiobua.”

¹⁰Ela izungu jose jikaghamba wiwilase na magho. Niko wubaa ghwa BWANA ghukawoneka aighu ya Hema ekwania.

¹¹BWANA ukamzera Musa, “Awa wandu winimenya hata lii? Widua wisenirumirie hata lii kunughana na awa weke mwakilimbiti wose nibonyere aghadi kwawo?

¹²Nichawikaba na saka izamie na kuwitotesha; nani nichakubonya kukaia mbari mbaa kuwichumba awo.”

¹³Ela Musa ukamzera BWANA, “Wamisri wadima kusikira agho malagho. Awandu kodewifunya kwawo kwa ndighi,

¹⁴nawo wadima kuwighoria waisanga wa aha seji kwawibonya wandu wako. Waisanga wa aha nawo wamerie kusikira angu oho BWANA kwadakaia aghadi kodu, na kuwoneka worinyi; iwingu jako jadakaia aighu yawo, na oho kwadakiria imbiri yawo kuko andenyi ya iwingu nadime, na nguro ya modo nakio.

¹⁵Idana kukawibwagha awandu kwa indo jimweri, nechi mbari ra wandu wisikire sare yako wichaghamba

¹⁶kukaia BWANA oolemwa ni kuwighenja awandu isanga orewighemieghe uchawineka, na idana hawo wadima wawibwaghia kireti.

¹⁷Idana nakulomba BWANA kuwonyere ndighi rako mbaa sa iji kulaghirie kukighamba,

¹⁸‘Ini BWANA sijokwagha ni machu shwa-shwa; neko na lukundo lubaa, nani nadafuya wughoma na kuleka makosa; simtalagha mkosi kukaia ndekosere; nadawitalia wana makosa gha weke ndee hata kivalwa cha kadadu na cha kana’.

¹⁹Nakulomba kuwifuye wughoma wandu awa ikosa jawo, karakara na wungi ghwa lukundo lwako, na karakara na seji koni korekoghe kwawifuya wughoma kufuma Misri hata idana.”

²⁰Niko BWANA ukaghamba, “Nawifuya wughoma sa iji koni kwaghamba,

²¹ela loli sa iji ini niko moyo, na sa iji ndoenyi kuchaachulwa ni wubaa ghwapo,

²²mndungi wa awo wighuwonie wubaa ghwapo, na weke mwakilimbiti wapo niwibonyere Misri na aho kireti, nawo wikanitima agha mando ikumi wikilegha kulusikira lwaka lwapo,

²³ndewichaajiwona ijo isanga nerelaghirieghe kuwineka weke ndee; mndungi wa awo unimenyere, ndechaajiwona anduangi.

²⁴Ela mdumiki wapo Kalebu, kwa kukaia uko wuzima, nao wawuyaninugha tiki, nichamghenja ijo isanga orejighendieghe na kivalwa chake chichajiwusa.

²⁵Idana kwa kukaia Waamaleki na Wakanaani wadakaia vololonyi ya ijo isanga, ghalukenyi cha kireti kesho, mnughe chia ya Bahari ya Shamu.”

²⁶Niko BWANA ukawizera Musa na Haruni,

²⁷“Iji izungu ja wandu wawiwi jidua jikinizughunukia hata lii? Nasikire seji wandu wa Israeli, winizughunukiagha.

²⁸Wizere huwu, ‘Naghema sa iji niko moyo agho malagho mwaghora ngisikira nicham'bonyera wokoni;

²⁹Na inyo mmbose muko wandu wa irika ja mika, mirongo iwi na kuchumba munizughunukie, mchafwa; na gharia renyu richasasarika aeni aha kireti;

³⁰ndeuko mndungi uchaavika ijo isanga andu nerelaghirieghe mchakaia; ela Kalebu mwana wa Jefune na Joshua mwana wa Nuni weni.

³¹Ela wana wenyu, awo mghambie wichadwalwa wunyika nichawingira ijo isanga mujileghie.

³²Ela inyo gharia renyu richasasarika aeni aha kireti.

³³Wana wenyu wichalisha kireti miaka mirongo ina, nawo wichaja wasi kwa kulegha kurumiria konyu hata mundu onyu wa kutua wasaghia kireti.

³⁴Mchaduka msigo ghwa ikosa jenyu kwa miaka mirongo ina kara kara na seji moreghendieghe mkajizighana isanga kwa matuku mirongo ina; kula ituku mwaka mlazi, nenyo mchamanya seji nizamilo!

³⁵Ini BWANA, naghamba; loli nichajibonyera huwu izungu iji jose ja wandu wawiwi winitangalagha: wichasiria aeni aha kireti putu, nawo wichafuya aeni aha.’”

³⁶Na awo wandu weredumiloghe ni Musa wiendejizighana ijo isanga, wikawuya na kujishekeria ijo izungu jose ja wandu jimzugunukie Musa kwa agho malagho ghizamie wereghiredieghe.

³⁷Wikabwaghwa ni BWANA kwa saka ya ngawawi.

³⁸Kwa awo wandu wereghendieghe kujizighana isanga, Joshua mwana wa Nuni na Kalebu mwana wa Jefune wiekeri niwo weresigharikieghe moyo.

³⁹Niko Musa ukawighoria wandu wa Israeli agho malagho ghose, nawo wikalila nandighi.

⁴⁰Nao wikawuka nakesho kio, wikajoka koighu isanga ja mighondinyi wikighamba, “Wona davika aha; diajoka dingie andu BWANA udilaghirie, dachawona dabonyere kaung'a?”

⁴¹Ela Musa ukawizera, “Da kwaki msemsikiragha BWANA? Ndemchaasima.

⁴²Msejoke mchendabwaghwa ni wamaiza wenyu, kwa kukaia BWANA ndekwanye nenyo.

⁴³Waamaleki na Wakanaani weko naimbiri, m'bwaghwa; kwa kukaia mwaleghie kughendanya na BWANA, BWANA nao ndechaakanya nenyo kungi.”

⁴⁴Ela wikafunga ndighi wikajoka koighu isanga ja mighondinyi, hata ngera Sanduku ya Ilaghano na Musa nderefumieghe kambinyi.

⁴⁵Niko Waamaleki na Wakanaani awo werekoghe wikikaia isanga ja mighondinyi wikasea, wikawisima Waisraeli na kuwiwinga hata Horma.