Read TAITA BIBLE – Biblia Ilagho Jiboie Kwa Wandu Wose MITALO 16 Bible Online

MITALO 16 - TAITA BIBLE – Biblia Ilagho Jiboie Kwa Wandu Wose bible

MITALO 16

¹Nao Kora mwana wa Ishari wawae Kohathi wa kivalwa cha Lawi, na Dothani, na Abiramu, wana wa Eliabu na Oni mwana wa Pedethi wa kivalwa cha Reubeni,

²wikawadana na wandu maghana awi na mirongo misanu, wiko vilongozi va wandu wa Israeli wimanyikie loli loli, wikakunda kumtangala Musa.

³Wikawikwanyikia Musa na Haruni, wikamzera, “Inyo mwaazidi! Kwa kukaia izungu jose ja wandu jaelie, na BWANA oko aghadi kwawo; idana mukujoseraki huwu aighu ya ikwanyiko ja BWANA?”

⁴Musa uendasikira huwo, ukaghwa kijimijimi,

⁵ukamzera Kora na wandu wake, “Kesho BWANA uchawonyera u mundu uko wake, nao nani uelie; na uo mundu umsaghuagha ucham'bonya usoghode kaavui nao.

⁶Idana bonyenyi huwu: Kora na wandu wake wose, ndewiwade chuwigha,

⁷wikumbe modo andenyi, na kuwikiria marumba aighu yaro imbiri ya BWANA; na uo mundu BWANA uchaamsaghua nuo moni mweli. Inyo ninyo mwazidi wana wa Lawi!”

⁸Musa ukamzera Kora, “Idana sikirenyi inyo wana wa Lawi;

⁹huwu moowona ni ilagho iting'ini konyu kusaghulwa ni Mlungu wa Israeli aghadi ya izungu jake na kumreda mumdumikieghe andenyi ya Hema yake, mkikaia kimusi imbiri ya izungu na kujidumikia?

¹⁰Mlungu wamredie kaavui nao chiaimweri na wanyinyu Walawi wose mumdumikieghe; da sena mualola na wukohani wori?

¹¹Inyo mmanye mwaawuyalwa na BWANA; kwani Haruni nani, mumzughunukiagha?”

¹²Nao Musa ukawidumiria Dathani na Abiramu, awo wana wa Eliabu, wiche; nawo wikaghamba, “Ndedichagha.

¹³Kuaghesha ni ilagho itini kudifunya isanga jinorie, na kudireda kuchedibwaghia kireti, nao sena kookunda kuwuye m'baa aighu yedu?

¹⁴Chiaimweri na agho, ndekudighenjere ijo isanga jinorie, hata kudineka ifwa jingi ja mbuwa, hata mbuwa ra mizabibu. Kookunda kudiwunja vitungure? Ndedichagha.”

¹⁵Musa ukazamilwa nandighi ukamzera BWANA, “Kuserumirie kizongona chawo. Ini siwusire punda wa mndungi, hata sim'bonyere mndungi wawo ilagho jingi anduangi.”

¹⁶Nao Musa ukamzera Kora, “Kesho, oho na wandu wako muche mkaie imbiri ya BWANA, chiaimweri na Haruni.

¹⁷Kula mundu onyu udo luwigha lwake, luko na marumba andenyi, na kuvireda imbiri ya BWANA, chuwigha maghana awi na mirongo misanu; oho na Haruni msesighe chuwigha renyu.”

¹⁸Niko kula mundu ukawada luwigha lwake ukakumba modo andenyi, na kuwikiria marumba aighu yaro; wikakaia kimusi mnyangonyi ghwa Hema ekwania, andwamweri na Musa na Haruni.

¹⁹Na Kora ukajikwanya izungu jose ja wandu mnyangonyi ghwa Hema ekwania kuwilangaya Musa na Haruni; na ugho wubaa ghwa BWANA ghukawoneka izungunyi jose ja wandu.

²⁰BWANA ukawizera Musa na Haruni,

²¹“Kutanyenyi na awandu niwone-wimeria shwa wori.”

²²Musa na Haruni wikaghwa kijimijimi wikaghamba, “Ee Mlungu, kuko Mlungu wa roho ra mimbi yose, wele mundu umweri ukakosa, kuajibonyera machu izungu jose?”

²³Nao BWANA ukamzera Musa,

²⁴“Ghoria izungu ja wandu jiinjike andu Kora, Dathani na Abiramu wawuyakaia.”

²⁵Niko Musa ukaghenda kwa Dathani na Abiramu, na waghosi wa wandu wa Israeli wikamnugha.

²⁶Nao ukajizera izungu ja wandu, “Namlomba mfume hemenyi kwa awa wandu wawiwi, hata mseadade kindo chingi chawo, msechemerelwanya nawo kwa wundu ghwa kaung'a rawo.”

²⁷Nao wikafuma hemenyi kwa Kora, na Dathani na Abiramu; Dathani na Abiramu wikafuma na kukaia minyangonyi ya hema rawo, chiaimweri na waka wawo na wana wawo.

²⁸Nao Musa ukaghamba, “Mchamanya kwa chia ihi kukaia BWANA wanidumie niribonye iri kazi rose, hata siwueribonya kwa kukunda kwapo anduangi.

²⁹Wandu awa wikafwa kwa kifwa icheni cha wandu wose, angu kupatwa ni ndengwa iwipatagha wandu wose, BWANA ndenidumie.

³⁰Ela BWANA ukabonya ilagho iwishi, nao ndoe ibarike, na kuwimila chiaimweri na vilambo vawo vose, nawo wiriko na kusea Andu kwa Wafu wimoo, niko mchaamanya awandu wammenyere BWANA.”

³¹Musa uendameria kudeda agho malagho woruwo, ndoe ikabarika nandonyi yawo,

³²ikatambaruka, na kuwimila Kora, chiaimweri na wandu wa nyumbenyi kwake, na wandu wose werekwanyeghe, na vilambo vawo vose.

³³Awo wandu chiaimweri na vilambo vawo vose, wikarikwa kwa chia iyo na kusea Andu kwa Wafu wimoo; na ndoe ikawuriana na kuwirughia, nawo wikatota na kusoweka ikwanyikonyi.

³⁴Na wandu wose wa Israeli werekoghe mbai mbai yawo wiendasikira awo wandu wikikema wikakimbia wikighamba, “Ndedikimbie disechemilwa ni ndoe.”

³⁵Na modo ghukafuma kwa BWANA, ghukawikora awo wandu maghana awi na mirongo misanu werekoghe wikifukira marumba.

³⁶Niko BWANA ukamzera Musa,

³⁷“Mzere Eleazari mwana wa mkohani Haruni ushoo iro chuwigha rasigharika modonyi, ugho ghwawikora awo wandu, nao usasare ugho modo kula ii chia na ii chia; angu iro chuwigha raelie.

³⁸Rereelesheroghe ingelo rereredeloghe madhabahunyi kwa BWANA. Kwa huwo kurishoo iro chuwigha ra awo wandu wafwa kwa wundu ghwa kaung'a rawo, nao kurichane riwuye sahani refinikiragha madhabahu. Na kwa chia iyo, richakaia maonyo kwa wandu wa Israeli.”

³⁹Niko mkohani Eleazari ukawusa iro chuwigha ra shaba, iro rerefunyiroghe ni awo wandu werekoreloghe, naro rikachanwa rikaie vifinikiro va madhabahu;

⁴⁰na kukaia lukumbuso kwa wandu wa Israeli eri mndungi useko mkohani wa kivalwa cha Haruni usechesoghoda kufukira marumba imbiri ya BWANA ucheka sa Kora na wandu wake seji BWANA oremghorieghe Eleazari kwa kumtumia Musa.

⁴¹Ela nakesho yaro, izungu jose ja wandu wa Israeli jikawizughunukia Musa na Haruni jikaghamba, “Mwabwaghie wandu wa BWANA.”

⁴²Nao iji ijo izungu ja wandu jawikwanyikia Musa na Haruni, jikaghaluka kuzighana cha Hemenyi ekwania, jikawona Hema yafinikirwa ni iwingu, na wubaa ghwa BWANA ghukawoneka.

⁴³Musa na Haruni wikaghenda na kukaia kimusi imbiri ya Hema ekwania,

⁴⁴na BWANA ukamzera Musa,

⁴⁵“Injikenyi izungunyi ja awo wandu nipate kuwimeria shwa wori.” Nao wikaghwa kijimijimi hata mawushu ghawo ghikadunga andonyi.

⁴⁶Musa ukamzera Haruni, “Shoa luwigha lwako, kuwuse modo kufuma madhabahunyi na kughukumbiria; nao kuwikirie marumba aighu yaro, na kulughenja izungunyi shwa-shwa, eri kubonye wupatanisho kwa wundu ghwawo, kwa kukaia BWANA wamerie kujokwa ni machu, na saka ya ngawawi yazoya.”

⁴⁷Niko Haruni ukashoa luwigha seji koni Musa oremzerieghe, ukakimbia na kungia izungunyi. Iyo saka ya ngawawi erekoghe yameria kuzoya kuwada wandu na Haruni ukawikiria marumba luwighenyi, na kubonya wupatanisho kwa wundu ghwa wandu.

⁴⁸Ukakaia kimusi ghadi na ghadi ya wandu wafwa na awo wiko moyo; saka ikaghirilwa.

⁴⁹Na awo wandu werebwaghiloghe ni saka, werekoghe elfu ikumi na inya na maghana mfungade; waja werefueghe kwa maza ra Kora wiko mbai.

⁵⁰Saka iendaghirilwa, Haruni ukawuya kwa Musa mnyangonyi ghwa Hema ekwania.