Read TAITA BIBLE – Biblia Ilagho Jiboie Kwa Wandu Wose MITALO 18 Bible Online

MITALO 18 - TAITA BIBLE – Biblia Ilagho Jiboie Kwa Wandu Wose bible

MITALO 18

¹Nao BWANA ukamzera Haruni, “Makosa ghibonyekagha andenyi ya Hema ekwania, ghichakotelwa kwako na kwa wana wako, na kwa Walawi; ela makosa ghibonyekagha kwa wudumiki ghwa wukohani, ghichakotelwa kwako oho kuekeri, na wana wako.

²Kuwirede wanyinyu wori, awo wandu wa kichuku cha Lawi, wiwadane na oho eri wikudumikieghe ingelo oho na wana wako wawuyadumika andenyi ya Hema.

³Wichakudumikia na kubonya kazi rose ra Hema; ela wisesoghode kaavui na vilambo va Andu kwa Wueli, na kaavui na madhabahu wichefwa; awo na oho wori.

⁴Wichawadana na oho, wibonye kazi rose ra Hema ekwania; ela mndungi mzima usesoghode kaavui nakumoni.

⁵Oho chiaimweri na wana wako kuchabonya kazi ra Andu kwa Wueli na ra madhabahu, eri machu ghapo ini BWANA ghisewuekaia sena aighu ya wandu wa Israeli.

⁶Zighana nawiwusa wanyinyu Walawi kufuma kwa wandu wa Israeli; ni inosi jako jinekelo BWANA kwa wundu ghodumika andenyi ya Hema ekwania.

⁷Ela oho na wana wako, mchabonya kazi ra wukohani madhabahunyi, na iro ra Andu kwa wueli kuchumbie. Wukohani ni inosi jenyu nimnekie na mndungi ukaghusoghodera, uchabwaghwa.”

⁸Niko BWANA ukamzera Haruni, “Ola nakuneka vilambo vose nifunyirwagha; ivo vilambo vose viwikwaghwa wakfu va wandu wa Israeli. Vilambo ivo, ni ifungu jako na hachi yako na wana wako matuku ghose.

⁹Ivo vilambo va wueli kuchumba viseko vekora vichakaia venyu. Kula kizongona chawo cha viro, na kula kizongona chawo winirediagha kwa wundu ghwa makosa, ni vindo va wueli kuchumba navo vichakaia vako na wana wako.

¹⁰Muvijie andu kuko kwa wueli kuchumba; kula mundu wa womi wadima kuja, ni vindo vielie konyu.

¹¹“Na ivi wori vichakaia venyu: vizongona va manosi ghawo, na vizongona vesughuswa va wandu wa Israeli, nakuneka oho, na wana wako wa womi na wa waka; ni hachi yenyu ya matuku ghose. Kula mundu nyumbenyi kwako uelie, wadima kuja.

¹²Mavuda ghose ghiboie kuchumba, divei yose na viro viboie kuchumba, nagho ni mavalo gha imbiri gha wandu wa Israeli wimnekagha BWANA nigho namneka inyo.

¹³Mavalo gha imbiri ghose ghiko isangenyi kwawo wimrediagha BWANA, ghichakaia ghenyu; kula mundu nyumbenyi kwako uelie wadima kuja.

¹⁴Kula kindo chiko andenyi ya Israeli chiwikilo wakfu ni chako.

¹⁵“Kula kindo chivalwaghwa cha imbiri na kufunywa kwa BWANA, ngera ni mundu angu nyamandu, chichakaia chenyu. Elaima mundu, na nyamandu riseelie rivalwaghwa ra imbiri, mcharikombua.

¹⁶Ighuri jewikombua, (wikavika irika ja mori ghumweri,) jichakaia vibelele va feza visanu kunughana na vipimo viwikilo.

¹⁷Ela wavalwa wa imbiri wa ng'ombe, angu ng'ondi, angu mburi, awo waelie msakewikombua; ni wapo wefunywa kizongona. Bagha yaro muchaimichira madhabahunyi, na mavuda gharo muchaghikora ghikaie kizongona chekora; irumba jininukiagha nicha.

¹⁸Ela nyama ni yenyu, sa iji koni nyama ya kizongona chesughuswa ya kidari, na nyama ya bara ya mkonu ghwa kiwomi vikaiagha.

¹⁹Mafunyo ghose gha wueli ghielie gha wandu wa Israeli wighiredagha kwapo, nakuneka oho na wana wako wa womi na wa waka ghikaie hachi yenyu ya matuku ghose. Ijo ni ilaghano kwa wundu ghonyu na wana wenyu jisedimagha kunoneka imbiri yapo kwa kala na kala.”

²⁰Sena BWANA ukamzera Haruni, “Oho ndekuchaakaia na ifwa jingi isangenyi, hata ifungu jingi aghadi ya wandu wa Israeli anduangi. Ini ne ifungu jako na ifwa jako aghadi kwawo.

²¹“Kula ifungu ja ikumi jifunywagha ni wandu wa Israeli kwa wundu ghwa wudumiki ghwawo andenyi ya Hema ekwania, nawineka Walawi jikaie ifwa jawo.

²²Kufuma idana wandu wa Israeli ndewichaaisoghodera Hema ekwania, wisechekuredia kifwa kwa wundu ghwa kaung'a rawo.

²³Ela Walawi wichabonya wudumiki ghwa Hema ekwania, na makosa ghichaabonyeka aho ghichakaia aighu kwawo. Iyo ni sharia ya matuku ghose kwa vivalwa venyu. Walawi ndewichaakaia na ifwa jingi aghadi ya wandu wa Israeli anduangi.

²⁴Ijo ifungu ja ikumi ja wandu wa Israeli wijiredagha kwapo sa mafunyo ghawo, nawineka Walawi jikaie ifwa jawo; kwa huwo naghamba awo ndewichaakaia na ifwa jingi aghadi ya wandu wa Israeli anduangi.”

²⁵Nao BWANA ukamzera Musa

²⁶“Iji mwawusa ifungu ja ikumi kufuma kwa wandu wa Israeli, ijo mnekelo ni BWANA jikaie ifwa jenyu, nenyo mrede mafunyo kwa BWANA; ifungu ja ikumi ja ivo mwapata.

²⁷Na mafunyo ghenyu ghichatalwa sa mafunyo gha viro na gha divei.

²⁸Kwa chia ihi, wori mchamfunyira BWANA ifungu jenyu ja ikumi ja ivo vose mpatagha kufuma kwa wandu wa Israeli; na kufumanya najo, mchamneka mkohani Haruni agho mafunyo gha BWANA.

²⁹Mrede kula ifunyo jiko ja BWANA, kufumanya na manosi ghose mpatagha; mfunye agho ghiboie kuchumba, sena ghikaie gha wueli.

³⁰Mkameria kufunya icho chiboie kuchumba, icho chasigharika chichawuya chenyu sa iji koni uwusagha masighariko gha viro angu divei ya vizongona vawo.

³¹Mwadima kuvija andu uko kose chiaimweri na wandu wa nyumbenyi konyu, kwa kukaia ni mafungu ghenyu gha kazi ya wudumiki ghwa Hema ekwania.

³²Aho ndemchaakaia na kaung'a ingi mkameria kufunya icho chiboie kuchumba. Kwa huwo msevilushe vilambo vafunywa ni wandu wa Israeli kwa kuzoya kuvija msefunyire mchefwa.”