Read TAITA BIBLE – Biblia Ilagho Jiboie Kwa Wandu Wose MITALO 2 Bible Online

MITALO 2 - TAITA BIBLE – Biblia Ilagho Jiboie Kwa Wandu Wose bible

MITALO 2

¹Nao BWANA ukawizera Musa na Haruni,

²“Wandu wa Israeli widunge kambi kunughana na bendera ra vichuku vawo, na kula mundu alama ya nyumba ya mzawo; nawo wipange kulangaya Hema ekwania chia rose.

³Awandu wichaapanga iichia cha mashariki andu iruwa jibukiagha, ni wa bendera ya kambi ya kichuku cha Juda, kwa mafungu ghawo; na kilongozi wawo uchakaia Nashoni mwana wa Aminadabu.

⁴Ijeshi seji jitalilo, ni elfu mirongo mfungade na inya, na maghana arandadu.

⁵Wandu wichaapanga kunughana na kichuku cha Juda, ni kichuku cha Isakari; na kilongozi chawo ni Nethaneli mwana wa Suari.

⁶Ijeshi jake seji jitalilo, ni elfu mirongo misanu na inya na maghana ana.

⁷Wandu winughagha ni kichuku cha Zebluni, na kilongozi chawo ni Eliabu mwana wa Heloni.

⁸Ijeshi jawo seji jitalilo, ni elfu mirongo misanu na mfungade na maghana ana.

⁹Mtalo ghwa wandu wose wa kambi ya Juda kwa mafungu ghawo, ni elfu ighana na mirongo wunyanya na irandadu na maghana ana. Awo niwo wichaakaia wikizoya kughenda.

¹⁰“Wandu wichaapanga ii chia cha kusinyi, ni wa bendera ya kambi ya kichuku cha Reubeni kwa mafungu ghwawo; na kilongozi chawo ni Elisuri mwana wa Shedeuri.

¹¹Ijeshi jake seji jitalilo ni elfu mirongo ina na irandadu na maghana masanu.

¹²Wandu wichaapanga kunughana na kichuku cha Reubeni, ni kichuku cha Simeoni, na kilongozi chawo ni Shelumieli mwana wa Surishadai.

¹³Ijeshi jake seji jitalilo ni elfu mirongo misanu na ikenda na maghana adadu.

¹⁴Wandu winughagha ni kichuku cha Gadi; na kilongozi chawo ni Eliasafu mwana wa Dueli.

¹⁵Ijeshi jake seji jitalilo, ni elfu mirongo ina na isanu na mirongo misanu.

¹⁶Mtalo ghwa wandu wose wa kambi ya Reubeni kwa mafungu ghawo, ni elfu ighana na mirongo misanu na imweri maghana ana na mirongo misanu. Awo wichakaia wa kawi kuzoya kughenda.

¹⁷“Niko wandu wa kichuku cha Lawi wichaiduka ija Hema Ekwania na kuzoya kughenda, wikikaia ghadi na ghadi sa iji koni kambi rawo rerekoghe; nawo wichaghenda kunughana na bendera rawo.

¹⁸“Wandu wichaapanga ii chia cha magharibi, ni wa bendera ya kambi ya kichuku cha Efraimu kwa mafungu ghawo, kilongozi chawo ni Elishama mwana wa Amihudi.

¹⁹Ijeshi jake seji jitalilo ni elfu mirongo ina na maghana masanu.

²⁰Wandu winughagha ni wa kichuku cha Manase; na kilongozi chawo ni Gamalieli mwana wa Pedasuri.

²¹Ijeshi jake seji jitalilo ni elfu mirongo idadu na iwi na maghana awi.

²²Niko kichuku cha Benjamini chichanugha; na kilongozi chawo ni Abidani mwana wa Gideoni.

²³Ijeshi jake seji jitalilo, ni elfu mirongo idadu na isanu na maghana ana.

²⁴Mtalo ghwa wandu wose wa kambi ya Efraimu kwa mafungu ghawo, ni elfu ighana na wunyanya na ighana jimweri. Wichakaia wa kadadu kuzoya kughenda.

²⁵“Wandu wichaapanga ii chia cha kaskazinyi, ni wa bendera ya kambi ya kichuku cha Dani kwa mafungu ghawo; na kilongozi chawo ni Ahiezeri mwana wa Amishadai.

²⁶Ijeshi jake seji jitalilo ni elfu mirongo irandadu na iwi na maghana mfungade.

²⁷Na awo wichaapanga kunughana nawo, ni wandu wa kichuku cha Asheri; na kilongozi chawo ni Pagieli mwana wa Okrani.

²⁸Ijeshi jake seji jitalilo ni elfu mirongo ina na iweri na maghana masanu.

²⁹Niko kichuku cha Naftali chichanugha; na kilongozi chawo ni Ahira mwana wa Enani.

³⁰Ijeshi jake seji jitalilo, ni elfu mirongo misanu na idadu na maghana ana.

³¹Mtalo ghwa wandu wose wa kambi ya Dani, ni elfu ighana na mirongo misanu na mfungade, na maghana arandadu. Nawo wichakaia wa kutua kughenda, kunughana na bendera rawo.”

³²Awo niwo wandu wa Israeli weretaliloghe kunughana na vichuku vawo. Wandu wose werekoghe kambinyi na kutalwa kwa mafungu ghawo, werekoghe elfu maghana arandadu na idadu maghana masanu na mirongo misanu.

³³Ela kichuku cha Lawi ndecheretaliloghe aghadi ya wandu wa Israeli, sa iji koni BWANA oremlaghirieghe Musa.

³⁴Huwo niko wandu wa Israeli werebonyereghe. Werebonyereghe kambi kunughana na bendera rawo, wikaghenda kula umu kinyumba chake na kichuku chake, sa iji koni BWANA oremlaghirieghe Musa.