Read TAITA BIBLE – Biblia Ilagho Jiboie Kwa Wandu Wose MITALO 21 Bible Online

MITALO 21 - TAITA BIBLE – Biblia Ilagho Jiboie Kwa Wandu Wose bible

MITALO 21

¹Nao iji mzuri wa Aradi, Mkanaani ukaiagha Negebu wasikira kukaia wandu wa Israeli wiachaidia chia ya Atharimu, ukafuma kulwa nawo; ukawada wamu na kuwidwa wunyika.

²Wandu wa Israeli wikabonya ighemi kwa BWANA wikighamba, “Ngera loli kwadadidimisha kuwisima wandu awa, dichaitotesha mizi yawo putu.”

³Niko BWANA ukawisikira wandu wa Israeli, nao ukawidimisha kuwisima Wakanaani na kuwitotesha putu, chiaimweri na mizi yawo; na andu aho kukawangwa Horma.

⁴Nao wandu wa Israeli wikazoya charo Mghondi ghwa Hori, wikadamba kuidiria chia ighendagha cha Bahari ya Shamu, wipate kuidia mbai mbai ya isanga ja Edomu; na wandu wikafwa ngolo kwa wundu ghwa ija chia.

⁵Nawo wikadeda kiwiwi aighu ya Mlungu na Musa wikighamba, “Kwaki koredifunyagha Misri na kudireda dichefuya kireti? Vindo ndeviko, machi ndeghiko, nesi dakoja ivi vindo va kisha.”

⁶Niko BWANA ukareda choka ribirie aghadi ya wandu, rikawiluma; na wandu wengi wa Israeli wikafwa.

⁷Wandu wikacha kwa Musa na kughamba, “Dabonyere kaung'a angu didedie kiwiwi aighu ya BWANA na aighu kwako wori; dilombie kwa BWANA upate kudiinjira iri choka.” Niko Musa ukawilombia wandu.

⁸BWANA ukamzera Musa, “Bonya choka ya shaba kuijose aighu nguronyi, na kula mundu walumwa ukaizighana uchakaia moyo.”

⁹Nao Musa ukabonya choka ya shaba, ukaijosa aighu nguronyi; na iji mndungi orelumiloghe ni choka, nao uizighane iyo choka ya shaba, wadakaia moyo.

¹⁰Niko wandu wa Israeli wikazoya charo, wikadunga kambi Obothi.

¹¹Wikafuma Obothi wikaghenda na kudunga kambi Iye-abarimu, kireti chilangayagha Moabu chiko ii chia iruwa jibukiagha.

¹²Kufuma aho wikaghenda na kudunga kambi vololonyi ya Zeredi.

¹³Kufuma aho wikaghenda na kudunga kambi Arnoni ii chia cha kireti chiwadane na mpaka ghwa Waamori; kwa kukaia Arnoni ni mpaka ghuko ghadi na ghadi ya Moabu na Waamori.

¹⁴Kwa wundu ugho niko ikaghorwa andenyi ya Chuo cha Wuda ghwa BWANA huwu: “Mizi ya Wahebu iko Sufa na vololo ra Moda ghwa Arnoni,

¹⁵na lughongo lwa iro vololo, luseagha hata kuvikia muzi ghwa Ari, na kuida noko cha mpaka na Moabu.”

¹⁶Kufuma aho wikaghenda cha Beeri, nacho nicho kiriwa andu BWANA oremzerieghe Musa, “Kwanya wandu chiaimweri, nani nichawineka machi.”

¹⁷Niko Waisraeli wikabora lumbo ulu: “Vumbuluka machi ee kiriwa, nesi dichakuboria;

¹⁸icho kiriwa cherekoteroghe ni wabaa, na wandu wikumikie wikachirua na mzata ghwa nguma, na iro zobo rawo.” Kufuma kireti, wikaghenda cha Matana,

¹⁹na kufuma Matana wikaghenda Nahalieli, na kufuma Nahalieli wikaghenda Bamothi,

²⁰na kufuma Bamothi wikaghenda cha vololonyi iko isanga ja Moabu iwonekagha kufuma koighu mghondinyi ghwa Pisga, kulangaya nokoisi cha kireti.

²¹Niko Waisraeli wikaduma wandu kwa Sihoni mzuri wa Waamori wikighamba,

²²“Leka diidie isangenyi kwako; ndedichaaghaluka na mbai dingie mbuwenyi renyu, angu mbuwa renyu ra mizabibu, hata ndedichaanywa machi ghenyu gha kiriwa, ela dichaghenda na Chia Mbaa ya mzuri, hata damerie kuida isangenyi kwako.”

²³Ela Sihoni ukawighiria wandu wa Israeli wiseide isangenyi kwake. Ukakwanya wandu wake wose, ukafuma kwendalwa na Waisraeli kireti; ukacha aja Jahazi, ukalwa nawo.

²⁴Wandu wa Israeli wikabwagha wandu wengi kwa lufu na kuwada isanga jawo kufuma Arnoni hata Jaboki; wikavikia Jaseri[4] ugho mpaka ghwa Waamoni.

²⁵Waisraeli wikawada mizi yose ya Waamori na kukaia andenyi. Wikakaia andenyi ya Heshboni, na iyo mizi yaro mitini-mitini.

²⁶Muzi ghwa Heshboni ghorekoghe ghwa Sihoni mzuri wa Waamori; nao orekoghe walwa na mzuri wa Wamoabu uo orekoghe ukikaia aho imbiri, ukamsoka isanga jake hata kuvikia Arnoni.

²⁷Kwa huwo awo wiboragha kwa makatanisho waghamba huwu, “Choonyi Heshboni; muzi ghwa Sihoni ndeghuagho na kumangishwa.

²⁸Angu modo ghwafumie Heshboni, lumu lwa modo lukafuma mzinyi kwa Sihoni. Ghorekorieghe Ari muzi ghwa Moabu, na awo wabaa wa ighu wa Arnoni.

²⁹Ni bugha kwako ee Moabu! Mwamerie kutoteshwa inyo ee wandu wa Kemoshi! Wabonyere wana wake wa womi wikawuya wakimbii, na wai wake wikawuya wedwalwa wunyika kwa Sihoni mzuri wa Waamori.

³⁰Kwa huwo kivalwa chawo chatoteshero, kufuma Heshboni hata Diboni; nesi damerie kuwisaghisa, na modo ghukaera kufuma Nofa hata Medeba.”

³¹Kwa huwo wandu wa Israeli wikakaia isanga ja Waamori.

³²Nao Musa ukaduma washeki kujizighana isanga ja Jaseri, wikaiwada mizi yaro mitini mitini, na kuwiwinga awo Waamori werekoghe aho.

³³Niko wikaghaluka, wikajokeria na chia eghenda Bashani; na Ogu mzuri wa Bashani ukafuma na wandu wake wose, wilo na wandu wa Israeli aja Edrei.

³⁴BWANA ukamzera Musa, “Kusakemuobua; angu nameria kukuneka wusimi aighu yake na wandu wake na isanga jake jose; na oho kucham'bonya seji koni korem'bonyereghe Sihoni mzuri wa Waamori uo orekoghe Heshboni.”

³⁵Kwa huwo wikam'bwagha andwamweri na wana wake, na wandu wake wose, hata ndeweresighieghe mndungi, wikawusa isanga jake.