Read TAITA BIBLE – Biblia Ilagho Jiboie Kwa Wandu Wose MITALO 24 Bible Online

MITALO 24 - TAITA BIBLE – Biblia Ilagho Jiboie Kwa Wandu Wose bible

MITALO 24

¹Nao iji Balaamu wawona angu erem'boieghe BWANA kuwirasimia wandu wa Israeli, ndecheghenda kulaghua sa imbiri, ela ukalangaya cha kireti.

²Hata iji wawusira meso ghake, ukawona wandu wa Israeli widungie kambi kichuku kwa kichuku. Roho wa Mlungu ukamchea aighu yake,

³ukawada kudeda ukaghamba, “Madedo gha Balaamu mwana wa Beori, madedo gha mundu uwonagha;

⁴madedo ghake uo uwonagha malagho gha Mlungu, uo uwonagha mawono gha Uo-Uwadie-Ndighi-Rose, ghikisea worinyi:

⁵Hema rako raghokie saki ee Jakobo, na kambi rako ee Israeli!

⁶Ni sa vololo ishabukie kula, sa mbuwa iko mbai-mbai ya moda, sa midi ya mishubiri uiwae BWANA, na sa misida iko mbai-mbai ya machi.

⁷Ndoo rake richachua machi na kudika-dika, na mbeu rake richanyosherwa machi mengi. Mzuri wake uchakaia m'baa kuchumba Agagi, na wuzuri ghwake ghuchakaia m'baa.

⁸Mlungu wamredie kufuma Misri, nao ooka na ndighi sa mbogho; ucharisima mbari riko wamaiza wake, uchaghichikanya maindi ghawo vipande vipande, na kuwilasa na mawanu ghake.

⁹Oredimieghe, ukalala andonyi sa shimba na sa shimba ya waka; nani udimagha kummbusira? Mundu uo ose uchaakurasimia ucharasimilwa, uo ose ukuwasiragha njowe ndewado ni njowe.”

¹⁰Niko Balaki ukajokwa ni machu nandighi aighu ya Balaamu, ukakaba chui rake ukamzera Balaamu, “Nedekuwanga kuchewasira wamaiza wapo njowe; zighana kwawirasimia mando agha adadu.

¹¹Kwa huwu idana kimbia kughale. Nereghambieghe nikulipa mafungu, ela BWANA wakughiria kuseghipate.”

¹²Balaamu ukamzera Balaki, “Kwani serewighorieghe wadumwa wako awo korewidumieghe kwapo kukaia,

¹³hata ngera Balaki kwadanineka feza na dhahabu richue nyumba yako, ndayadimikagha richumbe ilagho ja BWANA; nibonye jiboie angu jizamie kwa kukunda kwapo nimoni, ela kughora ijeni BWANA ujighoragha?”

¹⁴Balaamu ukamzera Balaki, “Ola idana niaghala cha mzedu, ela choo nikughorie seji awandu wichaawibonya wandu wako matuku ghichagha.”

¹⁵Nao ukawada kudeda ukaghamba, “Madedo gha Balaamu mwana wa Beori, madedo gha mundu uwonagha;

¹⁶madedo gha mundu usikiragha malagho gha Mlungu, na kumanya maza ra Uo-Uko-Aighu-Nandighi; uo uwonagha mawono gha Uo-Uwadie-Ndighi-Rose ghikisea worinyi:

¹⁷Nammbona, ela si idana; namzighana, ela ndeko kaavui; Mzuri uchafuma kwa Jakobo sa nyerinyeri, na uo ubonyagha nguma uchawuka andenyi ya Israeli; uchawikaba Wamoabu, na kuwinona-nona wana wose wa lung'eto.

¹⁸Uchawisoka wamaiza wake isanga, awo wamaiza wake Edomu na Seiri; Ingelo Israeli uchuriagha kusima.

¹⁹Wuzuri ghuchawadilwa ni kivalwa cha Israeli, na awo wisigharikagha andenyi ya mizi mibaa, wichatoteshwa!”

²⁰Niko Balaamu ukawizighana Waamaleki, ukawada kudeda ukaghamba, “Waamaleki werekoghe mbari ya imbiri, ela kutua ichatota putu.”

²¹Nao ukawizighana Wakeni, ukawada kudeda ukaghamba, “Andu kukaiagha kwamange, nako ni sa kijungu chiaghilo maghambenyi;

²²elaima sena, Inyo Wakeni mchatoteshwa, ingelo Waashuru wichaamdwa wunyika.”

²³Nao ukawada kudeda ukaghamba, “Da ima lee, nani uchaakaia moyo ingelo Mlungu wakabonya agho?

²⁴Ela wandu wichacha na meli kufuma Kupro, na kuwikoronga Waashuru na Waeberi ela na Wakupro weni wori wichatota wokoni.”

²⁵Niko Baalamu ukawuka ukaghala, na Balaki ukaghenda chia rake.