Read TAITA BIBLE – Biblia Ilagho Jiboie Kwa Wandu Wose MITALO 25 Bible Online

MITALO 25 - TAITA BIBLE – Biblia Ilagho Jiboie Kwa Wandu Wose bible

MITALO 25

¹Nao iji wandu wa Israeli werekoghe wikikaia Shitimu, wandu wikazoya kulaka aja Moabu.

²Na awo wai wikazoya kuwikaribisha awo wandu vizongona va milimu yawo, nawo wikaja na kuighoghomia iyo milimu.

³Kwa huwo Waisraeli wikawada kutasa Baali wa Peori; na Mlungu ukajokwa ni machu aighu ya wandu wa Israeli.

⁴BWANA ukamzera Musa, “Wada wabaa wose wa wandu kuwibwaghe na kuwiwika airuwenyi imbiri yapo, eri machu ghapo ghiko mabaa aighu ya wandu wa Israeli ghipate kuhoa.”

⁵Musa ukawizera watanyi wa wandu wa Israeli, “Kula mundu onyu ndewibwaghe wandu wake awo watasa Baali wa Peori.”

⁶Nao ola mndumu wa Kiisraeli ukacha na muka wa Kimidiani nyumbenyi kwake worinyi, Musa na izungu jose ja wandu wa Israeli wikiwona, sena ingelo cheni werekoghe wikilila a Hemenyi ekwania.

⁷Hata iji Finehasi mwana wa Eleazari wawae mkohani Haruni wawona ilagho ijo, ukawuka na kujisigha izungu; ukawada ifumu,

⁸ukamnugha uja Muisraeli hata chumba cha ndenyi, ukawidunga na ifumu wose; uo Muisraeli na uo muka, hata jikadunga na kuida kifunyi cha uo muka. Kwa chia iyo saka ya ngawawi ikawisigha wandu wa Israeli.

⁹Elaima erekoghe yabwagha wandu elfu mirongo iwi na inya.

¹⁰BWANA ukamzera Musa,

¹¹“Finehasi mwana wa Eleazari wawae mkohani Haruni, wahoresha machu ghapo aighu ya wandu wa Israeli, kwa kulegharumaghia ugho wutasi ghwa milungu mizima iseko ini, nisechewimeria wandu wa Israeli.

¹²Kwa huwo mzere kukaia niabonya nao ilaghano japo ja sere;

¹³najo jichakaia kwake na kwa kivalwa chake nyuma yake ja kukaia na wukohani ghwa matuku ghose; kwa kukaia ndererumaghieghe wutasi ghwa milungu mizima, ela Mlungu wake; nao ukabonya wupatanisho kwa wundu ghwa kaung'a ra wandu wa Israeli.”

¹⁴Uo mundu orebwaghwanyeghe na muka wa Kimidiani orewangwagha Zimri mwana wa Salu, m'baa wa kinyumba chimu cha Wasimeoni.

¹⁵Na uo muka wa Kimidiani orewangwagha Kozbi mwai wa Suri uo orekoghe m'baa wa kinyumba cha wandu wamu wa Midiani.

¹⁶Nao BWANA ukamzera Musa,

¹⁷“Winyoghore Wamidiani, eri kuwikabe;

¹⁸angu wamjishire wasi kwa mikalo yawo, iyo weremkalieghe nayo aho Peori; na kwa maza ra Kozbi, uo mwai wa m'baa wa Wamidiani, orebwaghiloghe aho Peori ituku ja saka ya ngawawi.”