Read TAITA BIBLE – Biblia Ilagho Jiboie Kwa Wandu Wose MITALO 28 Bible Online

MITALO 28 - TAITA BIBLE – Biblia Ilagho Jiboie Kwa Wandu Wose bible

MITALO 28

¹BWANA ukamlaghira Musa

²uwifundishe wandu wa Israeli kukaia mafunyo wimfunyiragha Mlungu kwa ngelo raro vikaie viboie vinukie nicha.

³Mafunyo mchaakaia mkimfunyira BWANA kwa wundu ghwa vizongona vekora tuli tuli kula ituku nigho agha: Wana wa ng'ondi wa womi wawi, wa mwaka ghumweri wisewadie itiko jingi.

⁴Luma lwa nakesho mchafunya mwana wa ng'ondi umweri, na luma lwa kenyi mfunye umu;

⁵kula umu mumfunyanye na mafunyo gha viro, kilo imweri ya mufu ghudendere ghuranganyiro na lita imweri ya mavuda.

⁶Icho ni kizongona chekora cha kula ituku cherezoeghe kufunywa Mghondi ghwa Sinai. Ni irumba jinukie nicha kwa BWANA.

⁷Kizongona charo cha kunywa chichakaia lita imweri ya divei irudie kwa kula mwana wa ng'ondi ngelo ya nakesho aighu ya madhabahu, ni irumba jinukie kwa BWANA.

⁸Uo mwana wa ng'ondi wa kawi mchaamfunya luma lwa kenyi, ukaie kizongona chekora, sa iji koni m'bonyereghe nakesho, chiaimweri na mafunyo gha viro na mafunyo gha kunywa. Ni irumba jinukie nicha kwa BWANA.

⁹Ituku ja Sabato, mfunye wana wa ng'ondi wawi wa mwaka ghumweri wisewadie itiko jingi, chiaimweri na mufu ghudendere ghwa kilo iwi ghuranganyiro na mavuda gha zeituni, chiaimweri na ifunyo ja kunywa.

¹⁰Icho kizongona chekora chifunyo ituku ja Sabato, kuchuria vija vizongona va kula ituku chiaimweri na vizongona varo va kunywa.

¹¹Kula ituku jezoya mori muchamfunyira BWANA kizongona chekora cha wana wa njau wawi, bauru imweri, na wana wa ng'ondi wa womi mfungade wa mwaka ghumweri wisewadie itiko jingi.

¹²Wokoni mfunye kizongona cha viro kilo idadu ra mufu ghudendere ghuranganyiro na mavuda kwa kula mwana wa njau umweri, na kilo iwi kwa bauru imweri;

¹³na kilo imweri ya mufu ghudendere ghuranganyiro na mavuda, ghikaie kizongona cha viro kwa kula mwana wa ng'ondi, chikaie kizongona chekora. Ni irumba jinukie nicha kwa BWANA.

¹⁴Vizongona varo va kunywa lita iwi ra divei kwa kula njau, na lita imweri na nusu kwa kula bauru, na lita imweri kwa kula mwana wa ng'ondi. Icho nicho kizongona chekora cha kula mori, mwaka ghose.

¹⁵Wokoni fwandi imweri ichafunywa kizongona kwa BWANA kwa wundu ghwa kaung'a aighu ya ghaja mafunyo ghekora na gha kunywa gha tulituli ghiko mbai.

¹⁶Ituku ja ikumi na inya ja mori ghwa imbiri ni Pasaka ya BWANA.

¹⁷Ituku ja ikumi na isanu ja ugho mori kuchakaia na ndima ya matuku mfungade, mseje mikate iko na chachu.

¹⁸Ituku ja imbiri mkwanyike kwa wutasi; mndungi usebonye kazi;

¹⁹Mumfunyire BWANA kizongona chekora cha wana wa njau wawi, bauru imweri, na wana wa ng'ondi wa womi mfungade wa mwaka ghumweri, wose wisewadie itiko jingi.

²⁰Mfunye kizongona cha viro kilo idadu ra mufu ghudendere ghuranganyiro na mavuda, kwa kula njau, na kilo iwi kwa bauru,

²¹na kilo imweri ya mufu kwa kula umu wa awo wana wa ng'ondi mfungade;

²²na fwandi imweri ikaie kizongona kwa wundu ghwa kaung'a chikaie wupatanisho kwa wundu ghonyu.

²³Vizongona ivi vichafunywa kula na vija vekora va tulituli va luma lwa nakesho.

²⁴Mchafunya vizongona ivo mkitumia iyo chia cheni kula ituku kwa matuku mfungade. Ni irumba jinukie nicha kwa BWANA. Mchafunya vizongona ivi aighu ya vija va tulituli vifunywagha vekora na venywa.

²⁵Ituku ja mfungade mkwanyike kwa wutasi; msebonye kazi.

²⁶Ituku ja imbiri ja Ndima ya Makuwido, ingelo mfunyagha kizongona cha viro viwishi kwa BWANA, mkwanyike kwa wutasi; msebonye kazi.

²⁷Mfunye kizongona chekora chikaie irumba jimnukiagha BWANA nicha. Mfunye wana wa njau wawi, bauru imweri, na wana wa ng'ondi mfungade wa womi wa mwaka ghumweri wisewadie itiko jingi.

²⁸Wokoni mfunye kizongona cha viro, kilo idadu ra mufu ghudendere ghuranganyiro na mavuda kwa kula njau, na kilo iwi kwa bauru,

²⁹na kilo imweri kwa kula umu wa wana wa ng'ondi mfungade;

³⁰chiaimweri na fwandi imweri ebonya wupatanisho kwa wundu ghonyu.

³¹Mchafunya icho kizongona chekora na cha kunywa aighu ya vija vizongona vekora va tuli tuli. Lindia ivo vizongona visekaie na itiko jingi.