Read TAITA BIBLE – Biblia Ilagho Jiboie Kwa Wandu Wose MITALO 30 Bible Online

MITALO 30 - TAITA BIBLE – Biblia Ilagho Jiboie Kwa Wandu Wose bible

MITALO 30

¹Nao Musa ukawizera wabaa wa vichuku va wandu wa Israeli, “BWANA walaghirie huwu:

²Mundu ukabonya ighemi kwa BWANA, angu ukakubonyera maghema ghekufunga moni, ndechaghiinja, ela uchakatisha sa iji koni udedie.

³Angu muka ukabonya ighemi kwa BWANA, na kukufunga moni kwa ijo ighemi ingelo uko mwai nyumbenyi kwa ndee,

⁴na ndee usikire seji waghema na kukufunga moni kwa ijo ighemi, nao ukaie usemzerie mwai wake ilagho jingi, maghema ghake ghose ghichadua, na kula ighemi ukufungie najo jichadua.

⁵Ela ndee ukasikira na kumkania ijo ituku jeni, ndekuwadie ighemi jingi jake ukufungie najo jichaadua anduangi; na BWANA uchamfuya wughoma, angu ndee oremkanieghe.

⁶Na ikakaia walowolwa uko na ighemi jake, angu ukole wachumbwa ni momu kisha ukakufunga moni,

⁷na mumi usikire kukaia wamerie kubonya ighemi na ukaie usemzerie ilagho jingi ijo ituku, maghema ghake ghose ukufungie nagho ghichadua.

⁸Ela ngera mumi wasikira agho malagho, nao umkanie mkake ijo ituku jeni waghisikira, uchamfungua ijo ighemi jose orekufungieghe moni najo kwa kuchumbwa ni momu; na BWANA uchamfuya wughoma.

⁹Ela muka ufuilo ni mumi, angu utane na mumi, ukabonya ighemi jingi na kukufunga najo, jichadua jikimlawia.

¹⁰Na ikakaia odeghema uko nyumbenyi kwa mumi, na kukufunga moni na agho maghema,

¹¹na mumi uduasikira ndechededa ilagho jingi hata kumkania, maghema ghake ghose ghichadua na kula kifungo ukufungie nacho chichadua.

¹²Ela ituku mumi wasikira malagho gha ighemi jake, nao waghitala kukaia gha duu, ghiseko kilambo chingi, aho ilagho jingi uo muka uchaajighora aighu ya agho maghema ukufugie nagho, ndejichaadua; angu mumi wajitala kukaia si kilambo chingi, na BWANA uchamfuya wughoma.

¹³Ighemi ijo jose muka ukufungagha najo jem'bonya ukorongeke mumi wadima kujimangisha, angu ujibonye kutalika kukaia si kindo chingi.

¹⁴Ela mumi ukamnyamia kima toe, uaghimangisha agho maghema ghose gha mkake wawuyakaia nagho; uaghimangisha angu kufuma waghisikira ndemzerie mkake ilagho jingi.

¹⁵Ela ukaghitala kukaia si kindo chingi ngelo waghisikira, uchawusa makosa gha mkake.”

¹⁶Iri niro sharia BWANA oremlaghirieghe Musa aghadi ya mundu na mkake na mundu na mwai wake ngelo ya wuwai ghwake iji uko nyumbenyi kwa ndee.