Read TAITA BIBLE – Biblia Ilagho Jiboie Kwa Wandu Wose MITALO 31 Bible Online

MITALO 31 - TAITA BIBLE – Biblia Ilagho Jiboie Kwa Wandu Wose bible

MITALO 31

²“Kaba Wamidiani, kupate kulipia kisasi cha wandu wa Israeli; konyuma, kuchafwa na kutumbanywa andwamweri na wakenyu wiidie.”

³Nao Musa ukawizera wandu, “Rushenyi wandu wamu wenyu maswaghwa wipate kughenda na kumlipia BWANA kisasi aighu ya Wamidiani.

⁴Mghenje wandu elfu imweri kufuma kula kivalwa cha wandu wa Israeli.”

⁵Niko wandu wikafunywa kufuma kwa maelfu gha wandu wa Israeli, kula kivalwa wandu elfu imweri; nawo wikafuma wandu elfu ikumi na iwi wirwae maswagha wighendagha wudenyi.

⁶Musa ukawighenja wudenyi, kula mbari wandu elfu imweri; chiaimweri na Finehasi mwana wa mkohani Eleazari, uko na vilambo va Andu kwa Wueli mikonunyi kwake na tarumbeta ekaba lwaka loturusa.

⁷Wikalwa na Wamidiani, sa iji koni BWANA oremlaghirieghe Musa, wikabwagha kula mundu wa womi.

⁸Wikawibwagha wazuri wa Midiani chiaimweri na wandu; Evi, Rekemu, Suri, Huri, na Reba, wazuri wasanu. Wokoni wikam'bwagha Balaamu mwana wa Beori.

⁹Wandu wa Israeli wikawidwa wunyika waka wa Kimidiani, andwamweri na wana wawo; na ng'ombe rawo rose, ng'ondi rose, na vilambo vose.

¹⁰Wikaikora mizi yawo yose, na kambi rawo andu kose werekoghe wikikaia;

¹¹wikawusa vilambo vose, wandu na nyamandu.

¹²Wikareda vilambo vose kwa Musa na mkohani Eleazari, na izungu ja wandu wa Israeli jiko kirindinyi cha Moabu kulangaya Jeriko kaavui na Jordani.

¹³Musa na mkohani Eleazari, na wabaa wose wa izungu wikafuma kambinyi kuwimara majeshi.

¹⁴Musa ukazamilwa ni wabaa wa majeshi; vilongozi va maelfu na vilongozi va maghana awo werewurieghe kufuma wudenyi.

¹⁵Musa ukawizera, “Mwaasigha waka wose wimoo?

¹⁶Nechi niwo weni werewishekerieghe wandu wa Israeli wikabonya mikalo imbiri ya BWANA, kwa kulongozwa ni Balaamu aja Peori, na saka ya ngawawi ikawichea izungu ja BWANA.

¹⁷Idana mum'bwaghe kula mwana wa womi, na kula muka ulale na mndwawomi.

¹⁸Ela wai wose wiselale na mndwawomi ungi, muwisighe wikaie moyo kwa wundu ghonyu.

¹⁹Mundu onyu uo ose ubwaghie mundu, angu uadadire gharia ya mundu, ukaie shighadi ya kambi kwa matuku mfungade. Ituku ja kadadu na ja mfungade, mkueleshe mmbeni na ivo vilambo mdwae wunyika.

²⁰Mueleshe kula nguwo, na kula kindo cha mrongo, na kula kilambo chibonyero kwa mafuri gha mburi, na kula kilambo chibonyero kwa mbau.”

²¹Mkohani Eleazari ukawizera masikari awo wereghendieghe wudenyi, “Ihi ni sharia ya BWANA iyo oremlaghirieghe Musa

²²aighu ya dhahabu, feza, shaba, chuma, ibamba, na risasi viekeri,

²³kula kilambo chidimagha kurumaghia modo, kuchieleshe kwa kuchiisira modonyi, nacho chichaela. Hata huwo saki, chichaeleshwa na machi ghieleshagha vilambo viseelie, na icho chose chisedimagha kurumaghia modo, kuchieleshe na agho machi.

²⁴Suti muoghoshe nguwo renyu ituku ja mfungade, nenyo mchaela; konyuma mngie kambinyi.”

²⁵BWANA ukamzera Musa,

²⁶“Oho, na mkohani Eleazari, na wabaa wa nyumba ra wandu, muvitale ivo vilambo vidwalo; wandu, chiaimweri na nyamandu.

²⁷Nao muviwaghe mafungu awi; ifungu jimu jikaie ja masikari, na ifungu jimu jikaie ja wandu.

²⁸Kudumbuo mchango kwa wundu ghwa BWANA ifungu jimweri ja maghana masanu kufuma kwa masikari wereghendieghe wudenyi; ja wandu, ja ng'ombe, ja punda, na ja ng'ondi;

²⁹kuwade nusu yaro, kumneke mkohani Eleazari ikaie kizongona kwa BWANA.

³⁰Ifungu jimweri ja mirongo misanu ja ivo vinekwagha wandu wa Israeli, wandu, ng'ombe, punda, ng'ondi, na mfugho rose, kuwineke Walawi awo wawuyalindia Hema.”

³¹Musa na mkohani Eleazari, wikabonya sa iji koni BWANA oremlaghirieghe Musa.

³²Na ivo vilambo veredwaloghe wunyika ni awo masikari, verekoghe ng'ondi elfu maghana arandadu na mirongo mfungade na isanu,

³³ng'ombe elfu mirongo mfungade na iwi,

³⁴punda elfu mirongo irandadu na imweri

³⁵na wandu wose, elfu mirongo idadu na wawi; waka wiselale na mndwawomi ungi jingi.

³⁶Na nusu yaro, ijo ifungu jerewusiroghe ni awo wereghendieghe wudenyi, mtalo ghwaro ni ng'ondi elfu maghana adadu na mirongo idadu na mfungade na maghana masanu;

³⁷na mchango kwa wundu ghwa BWANA ghorekoghe ng'ondi maghana arandadu na mirongo mfungade na isanu.

³⁸Ng'ombe ni elfu mirongo idadu na irandadu, na mchango kwa wundu ghwa BWANA, ghorekoghe mirongo mfungade na iwi.

³⁹Weke punda ni elfu mirongo idadu na maghana masanu, na mchango kwa wundu ghwa BWANA ghorekoghe mirongo irandadu na imweri.

⁴⁰Wandu werekoghe elfu ikumi na irandadu, na mchango kwa wundu ghwa BWANA ghorekoghe wandu mirongo idadu na wawi.

⁴¹Musa ukamneka mkohani Eleazari ugho mchango ghukaie kizongona kwa BWANA sa iji koni BWANA oremlaghirieghe.

⁴²Kufumanya na ija nusu ya vilambo veredwaloghe wunyika, iyo Musa oretanyireghe na ija ya masikari ikaie kwa wundu ghwa wandu wa Israeli,

⁴³korekoghe na ng'ondi elfu maghana adadu mirongo idadu na mfungade, na maghana masanu;

⁴⁴ng'ombe, elfu mirongo idadu na irandadu;

⁴⁵weke punda, elfu mirongo idadu, na maghana masanu;

⁴⁶na wandu elfu ikumi na irandadu.

⁴⁷Na kufumanya na iyo nusu ya vilambo vidwalo wunyika kwa wundu ghwa wandu wa Israeli, Musa ukawusa ifungu jimweri kwa kula mirongo misanu, wandu chiaimweri na nyamandu; ukawineka Walawi awo werekoghe wikiilindia Hema, sa iji koni BWANA oremlaghirieghe.

⁴⁸Niko awo wabaa werekoghe aighu ya agho maelfu gha masikari, na vilongozi va masikari elfu, na va maghana, wikamsoghodera Musa

⁴⁹wikamzera, “Isi wadumiki wako datala masikari wiko aisi yedu, na mndungi odu ndesowekie anduangi.

⁵⁰Nesi dareda kwa BWANA mafunyo agho kula mundu upatire, dipate kubonya wupatanisho kwa wundu ghodu imbiri ya BWANA; vilambo va dhahabu, bangili na mazango, pete ra muhuri, vipuli, na ngange.”

⁵¹Musa na mkohani Eleazari wikaiwada iyo dhahabu; yose ya vilambo vibonyero.

⁵²Na dhahabu yose ya mafunyo awo wa wabaa wa maelfu gha masikari, na awo maghana weremfunyireghe BWANA, erekoghe kaavui kilo maghana awi.

⁵³(Masikari werewadieghe vilambo kula mundu kikwake).

⁵⁴Nao Musa na mkohani Eleazari wikaiwada iyo dhahabu kufuma kwa wabaa wa maelfu, na wa maghana wikaireda andenyi ya Hema Ekwania ikaie lukumbuso imbiri ya BWANA, kwa wundu ghwa wandu wa Israeli.