Read TAITA BIBLE – Biblia Ilagho Jiboie Kwa Wandu Wose MITALO 32 Bible Online

MITALO 32 - TAITA BIBLE – Biblia Ilagho Jiboie Kwa Wandu Wose bible

MITALO 32

¹Wandu wa kivalwa cha Reubeni na cha Gadi, werekoghe na izungu ibaa ja mfugho; nawo werezighanireghe wikawona angu isanga ja Jazeri na isanga ja Gileadi jafwane kwa mfugho.

²Niko wikamghendia Musa na mkohani Eleazari, na vilongozi va wandu wikawizera,

³“Isanga ja Atarothi, Diboni, Jazeri, Nimra, Heshboni, Eleale, Sebamu, Nebo, na Beoni,

⁴ijo isanga BWANA orejikabieghe imbiri ya izungu ja wandu wa Israeli, ni isanga ja mfugho; na isi wadumiki wako deko na mfugho.”

⁵Wikachuria kughamba, “Mkawona nicha dalomba isi wadumiki wenyu dineko ijo isanga dijiwuse; msakediruwusa Jordani.”

⁶Ela Musa ukawizera kivalwa cha Gadi na cha Reubeni, “Wanyinyu wighende wudenyii, nao inyo msigharike aeni aha?

⁷Kwaki mkunde kubwagha wandu wa Israeli ngolo wiseghende isanga BWANA uwinekie?

⁸Nechi huwo niko koni weke ndeyo werebonyereghe, iji nerewidumieghe wiendejizighana isanga kufuma Kadesh-barnea.

⁹Kwa kukaia wiendavika Vololo ya Eshkoli, na kujiwona isanga, weewuya na kuwibwagha wandu wa Israeli ngolo wiseghende isanga BWANA uwinekie.

¹⁰Na BWANA ukajokwa ni machu ijo ituku, hata ukaghema ukighamba,

¹¹‘Loli cheni ndekuwadie mndungi wa awandu werejokieghe kufuma Misri wa irika ja miaka mirongo iwi na kuchumba uchaajiwona ijo isanga nerelaghirieghe kukaia nichawineka Abrahamu, Isaaka, na Jakobo; angu wiseninughie nicha.’

¹²Ndekuwadie mndungi, ela Kalebu mwana wa Jefune, uo Mkenizi, na Joshua mwana wa Nuni; angu awo weremnughieghe BWANA nicha.

¹³Na BWANA ukajokwa ni machu aighu ya wandu wa Israeli, na kuwibonya wimare-mare kireti miaka mirongo ina, hata icho kivalwa chose cherebonyereghe mawiwi, chikasia.

¹⁴Idana wonenyi nenyo mwawuka wulalo ghwa weke ndeyo, kivalwa cha wandu wa kaung'a; mpate kughichuria agho machu ghibirie gha BWANA aighu ya Israeli!

¹⁵Angu mkasigha kumnugha, nao moni uchawida kireti sena, nenyo mchatotesha awandu wose.”

¹⁶Niko wikasoghoda kaavui na Musa wikaghamba, “Dichaagha maranu gha ng'ondi aha kwa wundu ghwa ng'ondi redu, na mizi kwa wundu ghwa wana wedu;

¹⁷ela dichawada maswagha, dike tayari kikiria imbiri ya wandu wa Israeli, hata diwivikishe andu kwawo. Na wana wedu wichakaia andenyi ya mizi ya ngome, wisechesumbulwa ni wandu wa aha.

¹⁸Ndedichaawuya mizinyi mzedu, hata wandu wa Israeli wose wameria kupata kula mundu ifwa jake.

¹⁹Angu isi ndediendapata ifwa jingi nawo ija chia cha Jordani na noko kimonu anduangi; kwa kukaia dameria kupata ifwa jedu iichia cha mashariki ya Jordani.”

²⁰Niko Musa ukawizera, “Mkabonya huwo, mmbwade maswagha na kughenda wudenyi imbiri ya BWANA,

²¹na kula umu onyu uruwuke Jordani urwae maswagha ukilongozwa ni BWANA, hata BWANA umerie kuwiwinga wamaiza wake imbiri yake,

²²na kujiwada isanga; aho niko mchaawuya na kukaia huru, mselawilwagha ilagho jingi ni BWANA, hata wandu wa Israeli; na isanga iji jichakaia ifwa jenyu mwanekwa ni BWANA.

²³Ela mkalegha huwo, mwameria kum'bonyera BWANA kaung'a; nenyo mkaie na loli kukaia kaung'a ichamfunya shighadi.

²⁴Aghenyi mizi kwa wundu ghwa wana wenyu, na maranu kwa wundu ghwa ng'ondi renyu; nao m'bonye sa iji koni mwalaghira.”

²⁵Mbari ya Gadi na mbari ya Reubeni wikamzera Musa, “Isi wadumiki wako dichabonya sa iji koni oho bwana odu kwalaghira.

²⁶Wana wedu, waka wedu, ng'ondi redu na ng'ombe redu rose, richasigharika aja mizinyi ya Gileadi;

²⁷ela isi wadumiki wako dichakiria dikilongozwa ni BWANA dirwae maswagha, dighende wudenyi sa iji kwalaghira bwana odu.”

²⁸Nao Musa ukafunya malaghiro aighu yawo kwa mkohani Eleazari, na kwa Joshua mwana wa Nuni, na kwa wabaa wa nyumba ra vichuku va wandu wa wandu wa Israeli;

²⁹ukaghamba, “Wandu wa kivalwa cha Gadi na cha Reubeni, wikaruwukanya nenyo Jordani wirwae maswagha wikilongozwa ni BWANA, na kujiwada isanga mkwanye, aho muwineke isanga ja Gileadi jikaie ifwa jawo.

³⁰Ela wikalegha kuruwuka chiaimweri, wirwae maswagha, wichapata ifwa aghadi konyu andenyi ya isanga ja Kanaani.”

³¹Wandu wa kivalwa cha Gadi, na cha Reubeni wikatumbulia, “Isi wadumiki wako dichabonya sa iji koni BWANA wadizera.

³²Dicharuwuka dirwae maswagha dikilongozwa ni BWANA, dingie isanga ja Kanaani; ela ifwa jedu jichasigharika Jordani nakimonu.”

³³Niko aho Musa ukawineka wandu wa kivalwa cha Gadi, na cha Reubeni, na nusu ya wandu wa kivalwa Manase mwana wa Josefu isanga ja Sihoni mzuri wa Waamori, na isanga ja Ogu mzuri wa Bashani chiaimweri na mizi yaro isangenyi kose.

³⁴Wandu wa kivalwa cha Gadi wikaagha mizi ya ngome na maranu gha ng'ondi aho Diboni, Atarothi, Aroeri,

³⁵Atiroth-shofani, Jazeri, Jogubeha,

³⁶Beth-nimra, na Beth-harani.

³⁷Na wandu wa kivalwa cha Reubeni wikaagha Heshboni, Eleale, Kiriathaimu,

³⁸Nebo, Baal-meoni (marina gharo ghecheeghaluswa), na Sibma; na iyo mizi wereiaghieghe, wikaineka marina mazima.

³⁹Na wandu wa kivalwa cha Makiri mwana wa Manase, wikaghenda wikawada isanga ja Gileadi, wikawisoka Waamoni awo werekoghe andenyi.

⁴⁰Musa ukawineka wandu wa kivalwa cha Makiri mwana wa Manase isanga ja Gileadi wikajikaia.

⁴¹Na Jairi wa kivalwa cha Manase, ukaghenda ukawada mizi yawo mitini-mitini, ukaiwanga Havoth-jairi.

⁴²Noba ukaghenda ukawada Kenathi na mizi yaro mitini-mitini; ukaiwanga Noba kunughana na irina jake.