Read TAITA BIBLE – Biblia Ilagho Jiboie Kwa Wandu Wose MITALO 33 Bible Online

MITALO 33 - TAITA BIBLE – Biblia Ilagho Jiboie Kwa Wandu Wose bible

MITALO 33

¹Ivi nivo vipalo va wandu wa Israeli werekoghe wikidunga kambi kunughana na vichuku vawo nyuma ya kufuma isanga ja Misri, wikilongozwa ni Musa na Haruni.

²Musa ukalaghirwa ni Mlungu uandike kula kipalo weredungieghe kambi; na vipalo vawo kufuma wazoya charo niwo ivi.

³Ituku ja ikumi na isanu, ja mori ghwa imbiri nyuma ya Pasaka, wandu wa Israeli werefumieghe Ramesesi kwa wuwana m'baa Wamisri wose wikiwona; kituo kwa kituo kufuma andu werezoeghe; na vituo varo nivo ivi kunughana na seji wizoe.

⁴Ingelo Wamisri werekoghe wikirika wavalwa wawo wa imbiri, awo BWANA orewibwaghieghe aghadi kwawo, ukiwonyera seji uko na ndighi kuchumba milungu yawo.

⁵Nao wandu wa Israeli wikazoya kughenda kufuma Ramesesi, wikadunga kambi Sukothi.

⁶Wikafuma Sukothi, wikaghenda na kudunga kambi Ethamu aho kutuonyi kwa kireti.

⁷Wikafuma Ethamu, wikaghaluka na nyuma kughenda Pi-hahirothi iko chia ya mashariki ya Baal-zefoni; wikadunga kambi kaavui na Migdoli.

⁸Wikafuma Pi-hahirothi, wikaida ghadi na ghadi ya bahari na kungia kireti; wikadamba charo cha matuku adadu kireti cha Ethamu, na kudunga kambi Mara.

⁹Wikafuma Mara, wikaghenda Elimu; aho Elimu korekoghe na ndoria ra machi ikumi na iwi na mitende mirongo mfungade, wikadunga kambi aho.

¹⁰Wikafuma Elimu, wikaghenda na kudunga kambi kaavui na Bahari ya Shamu.

¹¹Wikafuma Bahari ya Shamu, wikaghenda na kudunga kambi kireti cha Sini.

¹²Wikafuma kireti cha Sini, wikaghenda na kudunga kambi Dofka.

¹³Wikafuma Dofka, wikaghenda na kudunga kambi Alushi.

¹⁴Wikafuma Alushi wikaghenda na kudunga kambi Refidimu, andu kuserekoghe na machi ghenywa.

¹⁵Wikafuma Refidimu wikaghenda na kudunga kambi kireti cha Sinai.

¹⁶Wikafuma kireti cha Sinai, wikaghenda na kudunga kambi Kibrothi-hataava.

¹⁷Wikafuma Kibrothi-hataava, wikaghenda na kudunga kambi Hazerothi.

¹⁸Wikafuma Hazerothi, wikaghenda na kudunga kambi Rithma.

¹⁹Wikafuma Rithma, wikaghenda na kudunga kambi Rimoni-perezi.

²⁰Wikafuma Rimoni-perezi, wikaghenda na kudunga kambi Libna.

²¹Wikafuma Libna, wikaghenda na kudunga kambi Risa.

²²Wikafuma Risa, wikaghenda na kudunga kambi Kehelatha.

²³Wikafuma Kehelatha, wikaghenda na kudunga kambi mghondi ghwa Sheferi.

²⁴Wikafuma mghondi ghwa Sheferi, wikaghenda na kudunga kambi Harada.

²⁵Wikafuma Harada, wikaghenda na kudunga kambi Makelothi.

²⁶Wikafuma Makelothi, wikaghenda na kudunga kambi Tahathi.

²⁷Wikafuma Tahathi wikaghenda na kudunga kambi Tera.

²⁸Wikafuma Tera wikaghenda na kudunga kambi Mithka.

²⁹Wikafuma Mithka wikaghenda na kudunga kambi Hashmona.

³⁰Wikafuma Hashmona, wikaghenda na kudunga kambi Moserothi.

³¹Wikafuma Moserothi wikaghenda na kudunga kambi Bene-jaakani.

³²Wikafuma Bene-jaakani wikaghenda na kudunga kambi Horhagidgadi.

³³Wikafuma Horhagidgadi wikaghenda na kudunga kambi Jotbatha.

³⁴Wikafuma Jotbatha wikaghenda na kudunga kambi Abrona.

³⁵Wikafuma Abrona wikaghenda na kudunga kambi Ezion-geberi.

³⁶Wikafuma Ezion-geberi wikaghenda na kudunga kambi kireti cha Sini (niko kuwangwaghwa Kadeshi)

³⁷Wikafuma Kadeshi wikaghenda na kudunga kambi mghondi ghwa Hori, aho kutuonyi kwa isanga ja Edomu.

³⁸Nao mkohani Haruni ukalaghirwa ni BWANA ujoke mghondi ghwa Hori, ukafwa aho mwaka ghwa mirongo ina, ituku ja imbiri ja mori ghwa kasanu, nyuma ya wandu wa Israeli kufuma isanga ja Misri.

³⁹Haruni orekoghe na irika ja miaka ighana na mirongo iwi na idadu iji orefueghe aighu ya mghondi ghwa Hori.

⁴⁰Niko mzuri wa Aradi, Mkanaani orekoghe ukikaia Negebu isanga ja Kanaani, ukasikira malagho gha kucha kwa wandu wa Israeli.

⁴¹Nao Wandu wa Israeli wikafuma Mghondi ghwa Hori, wikaghenda na kudunga kambi Zalmona.

⁴²Wikafuma Zalmona, wikaghenda na kudunga kambi Punoni.

⁴³Wikafuma Punoni wikaghenda na kudunga kambi Obothi.

⁴⁴Wikafuma Obothi, wikaghenda na kudunga kambi Iye-abarimu andenyi ya isanga ja Moabu.

⁴⁵Wikafuma Iye-abarimu, wikaghenda na kudunga kambi Dibon-gadi.

⁴⁶Wikafuma Dibon-gadi, wikaghenda na kudunga kambi Almon-diblathaimu.

⁴⁷Wikafuma Almon-diblathaimu, wikaghenda na kudunga kambi Abarimu kaavui na Nebo.

⁴⁸Wikafuma Abarimu, wikaghenda na kudunga kambi kirindinyi cha Moabu, kaavui na Jordani kulangaya Jeriko.

⁴⁹Weredungieghe kambi kaavui na Jordani kufuma Beth-Jeshimothi hata kuvika Abel-shitimu kirindinyi cha Moabu.

⁵⁰Nao BWANA ukamzera Musa kirindinyi cha Moabu, kaavui na Jordani kulangaya Jeriko.

⁵¹“Wizere wandu wa Israeli huwu, iji mwaruwuka Jordani na kungia isanga ja Kanaani,

⁵²muwiwinge waisanga wose wiko imbiri konyu, mnone milimu yawo ya magho ghiwachilo, na fwana rawo richanilo, na kuvuchua andu kwawo kose kotasira;

⁵³nenyo mchajiwusa isanga na kukaia andenyi yaro, angu namnekie ijo isanga mujiwuse.

⁵⁴Mchajiwusa ijo isanga jikaie ifwa jenyu kwa kukaba kura, kunughana na nyumba renyu. Mbari mbaa muineke ifwa ibaa, na mbari ndini muineke ifwa itini; aeni kura ya mundu ichaaghuya niko koni kuchaakaia kwake; ifwa jenyu jichanughana na vichuku va weke ndeyo.

⁵⁵Ela mkakaia msewiwingie awo waisanga wisigharikagha, wichakaia sa vilambo vedunga meso ghenyu, na sa minjwa edunga mbarunyi konyu; nawo wichamsumbua andenyi ya isanga mchaajikaia.

⁵⁶Na icho kiwiwi nerekundeghe kuwibonya, nichachibonya konyu.”