Read TAITA BIBLE – Biblia Ilagho Jiboie Kwa Wandu Wose MITALO 35 Bible Online

MITALO 35 - TAITA BIBLE – Biblia Ilagho Jiboie Kwa Wandu Wose bible

MITALO 35

¹Nao BWANA ukamzera Musa aho kirindinyi cha Moabu kaavui na Jordani kulangaya Jeriko,

²“Kuwilaghira wandu wa Israeli wiwineke Walawi mizi ekaia kufuma kwa ifwa jawo, na oho kuwineke milamba elishira mbai-mbai ya iyo mizi.

³Iyo mizi ichakaia yawo ekaia, na milamba ichakaia kwa wundu ghwa mfugho rawo na nyamandu rawo rose.

⁴Iyo milamba kuchawineka Walawi ichazoya wurighenyi ghwa mizi cha sighadi na kughenda noko meta maghana ana na mirongo misanu chia rose;

⁵eri kukaie na kiwacha cha mraba ghwa meta maghana ikenda chia rose ra mashariki na mizi ghadi na ghadi kusinyi, magharibi na kaskazinyi ugho nigho ghuchaakaia mlamba ghwawo gholishira.

⁶Iyo mizi kuinekagha Walawi irandadu ekimbiria kwa wundu ghwa mkimbii wabwagha mundu; na chiaimweri nayo, kuwineke mizi mirongo ina na iwi.

⁷Mizi yose kuchaawineka Walawi ichakaia mirongo ina na wunyanya chiaimweri na milamba yaro elishira.

⁸Na iyo mizi kuchaawineka Walawi ichafunywa ni wandu wa Israeli. Ichi kivalwa chiko kingi chichafunya mizi mingi; na kivalwa chiko kitini, chichafunya mizi mitini; kunughana na ifwa ja isanga jawo.”

⁹Nao BWANA ukamzera Musa,

¹⁰“Wizere wandu wa Israeli huwu, iji mwaruwuka Jordani na kungia Kanaani,

¹¹msaghuo mizi ikaie ekimbiria kwa wundu ghonyu, eri mndungi ukabwagha mundu kwa ndengwa ukimbirie aho.

¹²Iyo mizi ichakaia andu konyu kokimbiria; eri uo m'bwaghi upate kumkimbia uja mundu ukundagha kulipia kisasi, usakembwagha hata wavikia kudeda kesi na kutanywa imbiri ya wandu.

¹³Mfunye mizi irandadu ekimbiria.

¹⁴Mizi idadu ikaie Jordani nakimonu, na idadu ikaie andenyi ya isanga ja Kanaani.

¹⁵Iyo mizi irandadu ichakaia mizi ekimbiria kwa wundu ghwa wandu wa Israeli, na kwa wundu ghwa mghenyi na mundu uidagha aghadi kwawo; eri mndungi ukabwagha mmbao kwa ndengwa ukimbirie aho.

¹⁶“Ela ikakaia ookaba mmbao na chuma ukafwa, uo mundu ukabie mmbao ni m'bwaghi; na m'bwaghi uchabwaghwa.

¹⁷Na ikakaia oomlasa na igho ukafwa, uo mundu ulasire mmbao ni m'bwaghi; na m'bwaghi uchabwaghwa.

¹⁸Angu ikakaia oomkaba na mudi ukafwa, uo mundu ukabie mmbao ni m'bwaghi, na m'bwaghi uchabwaghwa.

¹⁹Uo mundu olipia kisasi ukakwana na uo m'bwaghi, um'bwaghe.

²⁰Na ngera mundu wadazamilwa ni mmbao, nao umdunge na ndagha, angu umlalirie na kumsindika hata ufo,

²¹angu ummkabe nangonde hata ufo, uo ukabie mmbao uchabwaghwa; uo ni m'bwaghi, na mundu olipia kisasi ukakwana nao um'bwaghe.

²²“Ela ikakaia ommdunga na ndagha kwa ndengwa, angu kumlasa na kindo chingi kwa ndengwa,

²³angu ikakaia ookumba igho nao jikalasa mundu na kum'bwagha kwa ndengwa, uo mundu ulasiro ukafwa, ikakaia mundu umlasire nderekoghe m'maiza wake, angu kukunda kum'bonya kiwiwi;

²⁴wandu wichatanya aghadi ya uo ubwghie na mundu olipia kisasi, kunughana na iri sharia.

²⁵Wandu wichamkira uo mundu ubwaghie usebwagho ni mundu olipia kisasi, na kummbunja mzinyi ghwa wakimbii andu orekoghe wakimbiria, nao uchadua aho hata Mkohani M'baa uo oredungiloghe mavuda gha wueli wameria kufwa.

²⁶Ela uo mundu ubwaghie ukafuma muzi ghwa wakimbii andu orekimbirieghe, na kuchumba mwano ghwaro, ngelo iyo yose,

²⁷ukawona ni mundu olipia kisasi wachumba mwano ghwa muzi ghwa wakimbii nao um'bwaghe, uo mundu olipia kisasi ndena ikosa jingi.

²⁸Angu ni suti uo mundu ubwaghie ukaie ahoeni muzinyi ghwa wakimbii, hata Mkohani M'baa ufo; kawona Mkohani M'baa wafwa, uo mundu ubwaghie wadima kuwuya isangenyi kwake.

²⁹Maza iri richakaia sharia na malaghiro konyu kwa vivalwa vose, andu kose mchaakaia.

³⁰“Mndungi ukabwagha mundu, uchabwaghwa kwa kushuhudilwa ni washahidi; ela mndungi usebwagho kwa kuhushudilwa ni mundu umweri.

³¹Msakerumiria m'bwaghi ukombolo, nao ni mundu ufwane ubwagho. M'bwaghi uchabwaghwa.

³²Wokoni mserumirie wukomboli ghwa mundu wakimbia cha mzinyi ghwa wakimbii, wei uwuye kukaia isangenyi Mkohani M'baa usefue.

³³Kwa huwo msenone isanga ijo mwawuyajikaia, kwa kukaia kudia bagha kwadanona isanga, na isanga ndejilipilwagha kwa wundu ghwa iyo bagha idirilo andenyi yaro kwa chia zima, ela kwa bagha ya uo mundu moni uidirie.

³⁴Msekejilusha isanga mwawuyajikaia, kwa kukaia ini BWANA nadakaia aghadi ya wandu wa Israeli.”