Read TAITA BIBLE – Biblia Ilagho Jiboie Kwa Wandu Wose MITALO 36 Bible Online

MITALO 36 - TAITA BIBLE – Biblia Ilagho Jiboie Kwa Wandu Wose bible

MITALO 36

¹Nao vilongozi va nyumba ra wadawana wa Gileadi mwana wa Makiri, wawae Manase mwana wa Josefu wikamchea Musa na vilongozi, awo wabaa wa vichuku va wandu wa Israeli,

²wikaghamba, “BWANA orekulaghirieghe oho bwana odu kuwineke wandu wa Israeli ifwa kwa kukaba kura. Na oho bwana odu korelaghiriloghe ni BWANA kukaia ifwa ja mwanidu Selofehadi kujineke wai wake.

³Ela wikalowolwa ni wadawana wa kivalwa kizima cha wandu wa ifwa ja awo jiainjwa kwa weke aba, na kukwanywa na ifwa na awo wandu wiwilowue; kwa wundu ugho, ifwa jedu jichalaghaya.

⁴Na iji jubilii ya wandu wa Israeli yavika, ifwa jawo jichakwanywa na ifwa ja icho kivalwa chiwilowue; najo jichainjwa kufuma kwa ifwa ja weke aba.”

⁵Niko Musa ukawilaghira wandu wa Israeli seji wazerwa ni BWANA, “Kivalwa cha Josefu chaghora loli.

⁶BWANA walaghira huwu aighu ya wai wa Selofehadi, ‘Ndewilowolo ni wandu awo wiwiboiagha, ela wilowolo ni kivalwa cha mzawo cheni.

⁷Ifwa ja wandu wa Israeli ndejidimagha kufunywa kwa kivalwa cha wandu wa Israeli chichakaia na ifwa ja weke ndee.

⁸Na kula mwai uwadie ifwa andenyi ya kivalwa cha wandu wa Israeli, uchakaia muka wa mundu wa kinyumba cha kivalwa cha ndee, eri kula Muisraeli uwadie ifwa ja weke ndee.

⁹Kwa huwo, ndekuwadie ifwa jingi jichaafunywa kwa wandu wa Israeli, chichawadia ifwa jawo weni.’”

¹⁰Wai wa Selefehadi wikabonya sa iji koni BWANA oremlaghirieghe Musa;

¹¹kwa kukaia Mahla, Tirza, Hogla, Milka na Noa wai wa Selefehadi werelowologhe ni weke mwandee.

¹²Wikaalowolwa ni kinyumba cha wadawana wa Manase mwana wa Josefu, na ifwa jawo jikasigharika aeni kwa kivalwa cha weke ndee.

¹³Iri niro sharia na malaghiro BWANA orewikieghe wandu wa Israeli ukimtumia Musa wiko kirindinyi cha Moabu kaavui na Jordani kulangaya Jeriko.