Read TAITA BIBLE – Biblia Ilagho Jiboie Kwa Wandu Wose MITALO 5 Bible Online

MITALO 5 - TAITA BIBLE – Biblia Ilagho Jiboie Kwa Wandu Wose bible

MITALO 5

¹Nao BWANA ukamzera Musa,

²“Kuwilaghire wandu wa Israeli wimfunye kambinyi kula mundu uko na sima, na uo ufunyagha wufia, na kula mundu ulushiro ni kuwada gharia.

³Kuwifunye shighadi ya kambi womi na waka wori, eri wiseilushe kambi yawo iyo nawuyaikaia.”

⁴Wandu wa Israeli wikabonya wokoni, wikawiwinga cha shighadi ya kambi, sa iji koni BWANA oremzerieghe Musa.

⁵BWANA ukamzera Musa,

⁶“Wizere wandu wa Israeli huwu, ngera mndungi wa womi angu wa waka wabonya kaung'a kwa kulemwa kukaia mloli kwa BWANA seji wandu wibonyagha nao ukaie mkosi,

⁷ucharumiria kaung'a yake uibonyere na kuilipia ikosa jake ukichuria mirongo iwi kwa ighana na kumneka uo mundu umkosere.

⁸Ela ngera uo mundu wafue, na mkichuku ungi wake wa kaavui ndeuko udimagha kunekwa agho malipo, ghichaghenjwa kwa BWANA kwa wundu ghwa mkohani chiaimweri na bauru ya wupatanisho.

⁹Na kula kizongona cha vilambo vieleshero va wandu wa Israeli viredwagha kwa BWANA vichawuya va mkohani;

¹⁰na vilambo va kula mundu viredwagha kwa BWANA icho chose chinekwagha mkohani, chichawuya cha mkohani.”

¹¹BWANA ukamzera Musa,

¹²“Wizere wandu wa Israeli huwu, ngera muka wa mundu walaghaya na kubonya malagho ghemuinjira mumi irumirio cha kwake,

¹³iji mndungi walala nao, na ilagho ijo jivisike kwa mumi, nao ukaie usemanyikie hata ngera wakulushire moni, na malagho agho ghisowe wuloli ghungi angu usewadilo ukibonya huwo.

¹⁴Mumi ukamgheshera mkake kiwiwi, kwa wundu ghwa kukaia na iriso nao, yadimika mkake ndekulushire, na mumi wakola wamgheshera kiwiwi;

¹⁵uo mundu uchamreda mkake kwa mkohani, ukidwa kizongona chikundikie kwa wundu ghwa mkake; nacho ni kilo imweri ya mufu ghwa shairi. Useghudunge mavuda ghangi, hata marumba, angu ni kizongona cha viro kwa wundu ghwa maghesho ghisene wuloli; ghewadwa ni iriso, eri wuwiwi ghupate kufunukulwa.

¹⁶“Niko mkohani uchamreda uo muka kaavui, na kummbika imbiri ya BWANA,

¹⁷nao udungirie machi ghieleshero andenyi ya chombo cha wongo, na kughidunga ndoe waribegha andonyi Hemenyi.

¹⁸Niko uo mkohani uchajifungua iridia ja uo muka, nyuma ya kummbika imbiri ya BWANA; na kuwika icho kizongona cha viro mkonunyi kwake, kwa wundu ghofunukua maghesho ghisene wuloli; mkohani ukiwadia agho machi ghiwawie ghereda njowe.

¹⁹Aho niko mkohani uchamghemesha uo muka ukighamba, ‘Ikakaia mndungi uselale nakumoni, na ikakaia kusekulushire na mundu mzima useko mmigho, agha machi ghiwawie ghereda njowe, ghisekubonye ilagho jingi.

²⁰Ela ikakaia kulagharie na kukulusha kwa kulala na mundu mzima useko mmigho,’

²¹(aho mkohani uchamghemesha uo muka ukimzera), ‘BWANA ndekubonye kuzame, kukaie na itiko aghadi ya wandu wako; ndebonye via vako veva vizame, na mumbi ghwako ghuvimbe.

²²Machi agha ghereda njowe, ndeghingie kifunyi kwako, na kughuvimbisha mumbi ghwako, na via vako veva vizame!’ Niko uo muka ucharumiria ‘Amen, Amen.’

²³“Niko uo mkohani uchariandika iro njowe chuonyi, na kuoghosha mbari raro andenyi ya agho machi ghiwawie,

²⁴na kumnyosha uo muka agho machi; nagho ghichamredia luwawo lubaa.

²⁵Aho mkohani uchawada icho kizongona cha viro kwa wundu ghwa maghesho ghisene wuloli kufuma mikonunyi kwa uo muka, na kuchisughusa imbiri ya BWANA, ima uchighenje madhabahunyi.

²⁶Na uo mkohani uchabegha ngonde ichue ya icho kizongona cha viro na kuchikora aighu ya madhabahu; konyuma umnyoshe uo muka agho machi.

²⁷Ukameria kumnyosha agho machi ghiredagha njowe, ghichamredia luwawo lubaa, iji umerie kukulusha kwa kulala na mndwawomi mzima. Aho mumbi ghwake ghuchavimba, na via vake vichazama; na uo muka uchazama aghadi ya wandu wake.

²⁸Ela ikakaia uo muka oko uelie usekulushire, ndechaawona ilagho jingi; nao uchadima kuruda na kuva wana.

²⁹“Ihi niyo sharia ya maza ra iriso iji muka walaghaya na kukulusha moni ngelo uko kwa mumi;

³⁰angu mundu ukangilwa ni maghesho ghisene wuloli, nao uwado ni iriso ja mkake. Uo mundu uchammbika uo muka imbiri ya BWANA, na mkohani uchakatisha sharia ihi yose ya uo muka.

³¹Mndwawomi ndechaakaia na makosa ghangi, ela muka uchaduka makosa ghake moni.”