Read TAITA BIBLE – Biblia Ilagho Jiboie Kwa Wandu Wose MITALO 6 Bible Online

MITALO 6 - TAITA BIBLE – Biblia Ilagho Jiboie Kwa Wandu Wose bible

MITALO 6

¹Nao BWANA ukamzera Musa,

²“Wizere wandu wa Israeli huwu: Iji mndwawomi angu muka ungi wabonya ighemi ja chiaro jewuya Mnaziri, eri ukutenge moni kwa wundu ghwa BWANA,

³usakenywa divei hata chofi ingi. Usakenywa siki ibonyero kufumanya na divei angu chofi; usenyo machi gha zabibu, hata useje zabibu riwurue angu riomerelo.

⁴Matuku ghose ukutenge; useje kindo chingi chibonyero kufumanya na mzabibu; ikaiagha ni ndembe raro, angu makanda gharo.

⁵Matuku ghose ukutenge; useare chongo chake, hata ngelo ya kukutenga kwake kwa wundu ghwa BWANA yakatia. Ukaie mweli, nao ulekere iridia jake jizoghuo ilacha.

⁶“Ngelo rose ra kukutenga kwake kwa wundu ghwa BWANA usesoghode kaavui na gharia;

⁷ikaiagha ni ya ndee wafwa angu mae, angu mruna wa womi angu wa waka. Usakekulusha moni, kwa kukaia kuja kukutenga kwake, kwawuyawonyera fwana yaro chongonyi kwake.

⁸Ngelo rose ukutengie, uo ni mweli wa BWANA.

⁹“Na iji mndungi wafwa ghafla kaavui nao, hata uvikie kulusha iridia ja wunaziri ghwake, uchaara ijo iridia jake ituku ja kukuelesha kwake; ijo ituku ja mfungade.

¹⁰Ituku ja wunyanya, urede tagho iwi ra mbughi kwa mkohani angu vana va maringo aho mnyangonyi ghwa Hema ekwania,

¹¹mkohani ucharifunya kizongona, imu kwa wundu ghwa kaung'a, na imu kwa wundu ghwa kizongona chekora; upate kubonya wupatanisho kwa wundu ghwake angu ushekerelo kubonya kaung'a ni ija gharia; ituku ijo jeni, uchawuria wunaziri ghwake,

¹²na kukutenga kwa wundu ghwa BWANA kunughana na agho matuku gha kutengwa kwake. Niko urede mwana wa ng'ondi wa womi wa mwaka ghumweri, ukaie kizongona kwa wundu ghwa makosa; ela iyo ngelo orezoeghe kukutenga, ndeichaatalwa; angu kukutenga kwake korelushiroghe.

¹³“Na ihi niyo sharia ya Mnaziri, iji ngelo ya kutengwa kwake yakata, ucharedwa mnyangonyi ghwa Hema ekwania,

¹⁴nao uchamfunyira BWANA inosi jake; mwana wa ng'ondi wa womi usewadie itiko, ukaie kizongona chekora; na mwana wa ng'ondi wa waka wa mwaka ghumweri, usewadie itiko, ukaie kizongona kwa wundu ghwa kaung'a, na bauru imweri isewadie itiko,

¹⁵na kikapu cha mikate isewadie chachu ya keki ra mufu ghudendere ghuranganyiro na mavuda, skozi rishingilo mavuda ni kizongona cha viro na cha kunywa.

¹⁶Na mkohani uchavisoghora imbiri ya BWANA vikaie kizongona kwa wundu ghwa kaung'a na kizongona chekora;

¹⁷nao uchafunya iyo bauru kwa BWANA, ikaie kizongona cha mapatano, chiaimweri na kikapu cha mikate isewadie chachu. Wokoni, mkohani uchafunya kizongona cha viro na cha kunywa.

¹⁸Na uo Mnaziri uchaara iridia ja wunaziri ghwake a mnyangonyi ghwa Hema ekwania na kujikumba modonyi ugho ghuko nandonyi ya icho kizongona cha mapatano.

¹⁹Kawona nyama ra bauru radoghoda mkohani uchawusa kuwoko, na mkate ghumweri ghusewadie chachu kufuma kikapunyi, na skozi imweri na kumneka Mnaziri nyuma ya kuara iridia.

²⁰Niko mkohani uchavisughusa vikaie kizongona chesughuswa imbiri ya BWANA; ivo ni vindo vieleshero va mkohani, chiaimweri na kidari chisughusiro, na bara; konyuma uo Mnaziri wadima kunywa divei.

²¹“Iyo niyo sharia ya Mnaziri ubonyagha ighemi. Mafunyo ghake kwa BWANA uchaaifunya kunughana na ighemi jake ja wunaziri, kula na mafunyo mazima agho udimagha kufunya. Huwo niko uchaabonya karakara na sharia, kunughana na ighemi ja kukutenga kwake sa Mnaziri.”

²²BWANA ukamzera Musa, “Zera Haruni na wana wake

²³wiwirasimie wandu wa Israeli huwu:

²⁴BWANA ndemrasimie na kumlindia;

²⁵BWANA ndemlangalishire mwengere ghwa wushu ghwake, na kum'bonyera mecha;

²⁶BWANA ndemzighane na kumneka sere.

²⁷“Kwa chia iyo, wichajimanyisha irina japo aghadi ya wandu wa Israeli, nani nichawirasimia.”